ក្នុងឱកាសនៃពិធីមួយដោយមានវត្តមានរបស់ប្រធានាធិបតីលោកហាសាន់ រ៉ូហានី និងរដ្ឋមន្ត្រីការពារប្រទេស លោក HOSSEIN DEHGHAN អីុរ៉ង់បានបង្ហាញជាលើកដំបូងកាលពីថ្ងៃទី២១ សីហា ដល់សារព័ត៌មាននូវប្រព័ន្ធការពារអាកាសថ្មីរបស់ខ្លួនធុន BAVAR 373 ផលិតក្នុងស្រុក ហើយមានប្រសិទ្ធភាពដូចប្រព័ន្ធការពារអាកាស S-300 របស់រុស្ស៊ី ។
ប្រទេសអីុរ៉ង់សម្រេចជំរុញគម្រោងផលិតអាវុធធុននេះ ពេលរុស្ស៊ីផ្អាកកុងត្រាផ្តល់ប្រព័ន្ធ S-300 កាលពីឆ្នាំ២០១០ ដោយសារទណ្ឌកម្មអន្តរជាតិប្រកាសដោយក្រុមប្រឹក្សាសន្តិសុខ អ.ស.ប ប្រឆាំងកម្មវិធីនុយក្លេអ៊ែរអីុរ៉ង់ ។
កាលពីឆ្នាំ២០១៥ មុនការចុះហត្ថលេខាលើកិច្ចព្រមព្រៀងអន្តរជាតិស្តីពីកម្មវិធីនុយក្លេអ៊ែរអីុរ៉ង់ ដែលនាំទៅដល់ការលុបចោលជាបន្តបន្ទាប់នូវទណ្ឌកម្ម ក្រុងមូស្គូ អនុញ្ញាតជាថ្មីដល់ការប្រគល់ប្រព័ន្ធមីស៊ីល S-300 ដល់អីុរ៉ង់វិញ ។
រដ្ឋមន្ត្រីការពារប្រទេសអីុរ៉ង់ ឧត្តមសេនីយ៍ DEHGHAN ថ្លែងកាលពីថ្ងៃទី២០ សីហា ថា យើងបានសម្រេចកសាងប្រព័ន្ធការពារអាកាសមួយដែលយើងហៅឈ្មោះថា BAVAR 373។ ប្រព័ន្ធនេះមានសមត្ថភាពដូច S-300 ដែរ ។
រួចកាលពីខែឧសភា លោកធ្លាប់ថ្លែងថា ប្រព័ន្ធការពារនេះអាចកម្ទេចបណ្តាមីស៊ីលបណ្តែត យន្តហោះគ្មានមនុស្សបើក យន្តហោះប្រយុទ្ធ និងមីស៊ីលបាលីស្ទិក ហើយអាចកម្ទេចគោលដៅជាច្រើនក្នុងពេលជាមួយគ្នា ៕
ចែករំលែកព័តមាននេះ