ជនសង្ស័យសកម្មខាងឆក់ ត្រូវអស់លក្ខណ៍ហើយ
ខេត្តកណ្ដាល ៖ មុខសញ្ញាជនសង្ស័យពីរនាក់ ដែលសកម្មខាងឆក់កាបូប និងទូសព្ទ័តាមផ្លូវ ត្រូវបានអស់លក្ខណ៍ ដោយនគរបាលស្រុកស្អាង ស្ទាក់ចាប់បានបន្ទាប់ពី
ខេត្តកណ្ដាល ៖ មុខសញ្ញាជនសង្ស័យពីរនាក់ ដែលសកម្មខាងឆក់កាបូប និងទូសព្ទ័តាមផ្លូវ ត្រូវបានអស់លក្ខណ៍ ដោយនគរបាលស្រុកស្អាង ស្ទាក់ចាប់បានបន្ទាប់ពីបានធ្វើសកម្មភាព ជិះម៉តូឆក់អាយផេតមួយគ្រឿងបានសម្រេច ពីអ្នកធ្វើដំណើរតាមផ្លូវ កាលពីម៉ោង១០ និង១០នាទី ព្រឹកថ្ងៃទី២០ ខែសីហា នៅចំណុចលើផ្លូវលេខ២១ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ហើយបើកម៉ូតូគេចទៅស្រុកស្អាង។
មន្ត្រីនគរបាលក្រុងតាខ្មៅបានឱ្យដឹងថា ជនសង្ស័យដែលបានចាប់ខ្លួនទី១-ឈ្មោះ មុត រដ្ឋា ភេទប្រុស អាយុ២០ឆ្នាំ ទីលំនៅភូមិចំពុះក្អែកសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ មុខរបរមិនពិតប្រាកដ។ ទី២-ឈ្មោះ សុង ហេងទី ភេទប្រុស អាយុ១៦ឆ្នាំ ទីលំនៅភូមិ សង្កាត់ជាមួយគ្នា។ ចំណែកជនរងគ្រោះឈ្មោះ អៀង ស្រីអូន ភេទស្រី អាយុ២០ឆ្នាំ ទីលំនៅភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរបុគ្គលិកសណ្ឋាគារត្រានីកា ត្រូវជនសង្ស័យឆក់យកបាត់បង់អាយផេត ពណ៌ស ០១គ្រឿង និងប្រាក់១០០ដុល្លារ។
មន្ត្រីនគរបាលបានឱ្យដឹងបន្ថែមថា នៅវេលាកើតហេតុខាងលើ ពេលដែលជនរងគ្រោះកំពុងតែជិះម៉ូតូជាមួយម្តាយរបស់ខ្លួនដើម្បីត្រឡប់ទៅផ្ទះវិញដល់ចំណុចកើតហេតុខាងលើ ស្រាប់តែជនសង្ស័យទាំង០២នាក់ បានជិះម៉ូតូមកដល់ទន្ទឹមហើយម្នាក់ឈ្មោះ មុត រដ្ឋា អង្គុយខាងក្រោយបានធ្វើសកម្មភាព ឆក់យកអាយផេត និងលុយ ១០០ដុល្លារ កាន់ជាប់នឹងដៃ ហើយបានជិះម៉ូតូគេចខ្លួនឆ្ពោះទៅទិសខាងត្បូង តាមផ្លូវលេខ២១ សំដៅទៅស្រុកស្អាង។
ភ្លាមនោះជនរងគ្រោះបានស្រែកថាចោរៗ ស្របពេលនោះសមត្ថកិច្ចនគរបាលក្រុងតាខ្មៅបានចុះអន្តរាគមន៍ សហការណ៍ជាមួយនគរបាលស្រុកស្អាង ដេញតាមធ្វើការឃាត់ខ្លួនជនសង្ស័យបានទាំង០២នាក់ រួមទាំងមធ្យោបាយធ្វើសកម្មភាព នៅឃុំ សិត្បូ ស្រុកស្អាង និងបាននាំខ្លួនមកសាកសួរនៅអធិការនគរបាលលក្រុងតាខ្មៅ។ ចំពោះវត្ថុតាង ជនសង្ស័យបានបោះចោលរកពុំឃើញឡើយ។ នៅចំពោះមុខនគរបាលជនសង្ស័យបានសារភាពថា ខ្លួន និងបក្ខពួកពិតជាបានឆក់យកអាយផេតរបស់ជនរងគ្រោះពិតប្រាកដមែន។
ជនសង្ស័យឈ្មោះ មុត រដ្ឋា បានឆ្លើយសារភាពទៀតថា កន្លងមកខ្លួន និងបក្ខពួក៥នាក់ទៀត ធ្លាប់ធ្វើសកម្មភាពឆក់កាបូបលុយ និងទូរស័ព្ទចំនួន៨លើករួចមកហើយ គឺនៅតាខ្មៅ៥លើក និងនៅច្បារអំពៅ៣លើក។ ចំណែកបញ្ហាគ្រឿងញៀនវិញ គឺធ្លាប់បានប្រើប្រាស់រយៈពេលជិត១ឆ្នាំមកហើយមិនទាន់ឈប់ប្រើនៅឡើយទេ។ ជនសង្ស័យត្រូវបាននគរបាលក្រុងតាខ្មៅកសាងសំណុំរឿងបន្តចាត់ការតាមនីតិវិធី៕
ចែករំលែកព័តមាននេះ