ឃាត់ខ្លួនមុខសញ្ញាជួញដូរ និងប្រើប្រាស់គ្រឿងញៀ.ន៤នាក់
ខេត្តកណ្ដាល ៖ ពិតជាគួរឲ្យចាប់អារម្មណ៍ខ្លាំងណាស់ និងមិនអាចមើលរំលងបានឡើយ ចំពោះបញ្ហាបទល្មើសគ្រឿងញៀ.ន ដែលកំពុងកើតមានស្ទើរតែគ្រប់ទិសទី
ខេត្តកណ្ដាល ៖ ពិតជាគួរឲ្យចាប់អារម្មណ៍ខ្លាំងណាស់ និងមិនអាចមើលរំលងបានឡើយ ចំពោះបញ្ហាបទល្មើសគ្រឿងញៀន ដែលកំពុងកើតមានស្ទើរតែគ្រប់ទិសទី ហើយគេសង្កេតឃើញថា កម្លាំងសមត្ថកិច្ចទាំងនគរបាល និងកងរាជអាវុធហត្ថ បានខិតខំធ្វើការបង្ក្រាប និងចាប់ខ្លួនបានជាបន្តបន្ទាប់ស្ទើរតែរាល់ថ្ងៃ ប៉ុន្តែហាក់ដូចជា ការវែកចក គឺចាប់មិនចេះអស់ទាល់តែសោះ។
ការជួញដូរតូចធំនៅតែមាន ដោយមិនដឹងថាធ្វើបែបណា ទើបត្រូវកំចាត់ក្រុមសង្គមងងឹតគ្រឿងញៀនទាំងនេះឲ្យអស់នោះឡើយ។ ទាន់ទិនទៅនឹងបញ្ហាបទល្មើស គ្រឿងញៀននោះ កម្លាំងនគរបាលស្រុកអង្គស្នួល បានធ្វើការបង្ក្រាប និងចាប់ខ្លួនបានជាហូរហែ។ ជាក់ស្ដែងកាលពី វេលាម៉ោង១៦ និង៣០នាទីល្ងាច ថ្ងៃទី២០ ខែសីហា ឆ្នាំ២០១៦ កម្លាំងនគរបាល បានធ្វើការចាប់ខ្លួន ក្រុមជួញដូរ និងប្រើប្រាស់គ្រឿងញៀន បានចំនួន៤នាក់ក្នុងខណៈដែលក្រុមទាំងនោះ កំពុងធ្វើសកម្មភាពជួញដូរ នៅចំណុចសាលាឆទានស្ថិត ក្នុងភូមិចំការស្លែង ឃុំព្រៃពួច និងបន្តឆែកឆេរផ្ទះមេខ្លោងមួយកន្លែងទៀត ស្ថិតនៅក្នុង ភូមិបូរីកម្មករ ឃុំបែកចាន ស្រុកអង្គស្នួល ខេត្តកណ្តាល។
ជនសង្ស័យទាំង៤នាក់នោះមាន ១.ឈ្មោះ ផាត ផល្លី ភេទប្រុស អាយុ ៣៣ឆ្នាំ ជនជាតិខ្មែរ មុខរបរជាងសំណង់ ២.ឈ្មោះ រៀម ណាវី ភេទស្រី អាយុ៣០ឆ្នាំ ជនជាតិខ្មែរ មុខរបរកសិករ ៣.ឈ្មោះ ហ៊ួន ម៉ាប់ ភេទប្រុស អាយុ២៧ឆ្នាំជនជាតិខ្មែរ មុខរបរជាងផ្សាដែក ទាំង៣នាក់នេះគឺជាមុខសញ្ញាជួញដូរ និង ៤.ឈ្មោះ រៀម ង៉ែត ភេទប្រុស អាយុ៤១ឆ្នាំ ជនជាតិខ្មែរ មុខរបរជាងសំណង់ ហើយជននេះគឺជាអ្នកប្រើប្រាស់ ស្នាក់នៅភូមិចំការស្លែង ឃុំព្រៃពួច ស្រុកអង្គស្នួល ខេត្តកណ្ដាល។
កម្លាំងនគរបាលបានដកហូតបានថ្នាំញៀន ពីជនសង្ស័យទាំង៤នាក់នោះ បានចំនួន៣កញ្ចប់មធ្យម ចំណែកមេខ្លោងម្នាក់ទៀត បានរត់គេចខ្លួន ប៉ុន្តែនគរបាលបានឆែកឆេររកឃើញថ្នាំញៀនប្រភេទម៉ាទឹកកកចំនួន២កញ្ចប់ធំ និងថ្នាំញៀនប្រភេទយ៉ាម៉ាពណ៌ទឹកក្រូច១កញ្ចប់ និងសម្ភារមួយចំនួនទៀត។ វត្ថុតាងត្រូវដកហូតទាំងពីរកន្លែងនោះ សរុបមានចំនួន៦កញ្ចប់ ក្នុងនោះមានប្រភេទម៉ាទឹកកក កញ្ចប់មធ្យមចំនួន៣កញ្ចប់ កញ្ចប់ធំចំនួន២កញ្ចប់ និងថ្នាំយ៉ាម៉ា១កញ្ចប់តូច ដបដាក់ទឹក១ ចានទ្រចំនួន១ និងឧបករណ៍មួយចំនួនទៀត។
នគរបាលបានឲ្យដឹងថា នៅវេលាម៉ោងខាងលើកម្លាំងផ្នែកព្រហ្មទណ្ឌ នគរបាលស្រុក បានទទួលព័ត៌មានពីប្រជាពលរដ្ឋថា មានមុខសញ្ញាជួញដូរថ្នាំញៀន កំពុងធ្វើសកម្មភាព នៅចំណុចខាងលើ ខណៈនោះកម្លាំងបានចុះទៅធ្វើការបង្ក្រាប និងចាប់ខ្លួនបាន ជាបន្តបន្ទាប់តែម្ដង។ ក្រោយពេលចាប់ខ្លួនបាន និងដកហូតបានគ្រឿងញៀនចំនួន៣កញ្ចប់មធ្យម កម្លាំងបាននាំទៅធ្វើការសាកសួរ ហើយជននោះបាន សារភាពរថា ខ្លួនបានទិញថ្នាំញៀនខាងលើពីឈ្មោះ ឌុច ណារ៉ុង ភេទប្រុស អាយុ៣៥ឆ្នាំ ជនជាតិខ្មែរ មុខរបរមិនពិត ស្នាក់នៅក្នុងភូមិបូរីកម្មករ ឃុំបែកចាន ស្រុកអង្គស្នួល ខេត្តកណ្ដល។
ទើបកម្លាំងព្រហ្មទណ្ឌស្រុកបានសហការណ៍ជាមួយ កម្លាំងប៉ុស្តិ៍បែកចាន មេភូមិបុរីកម្មករ និង ក្រុមប្រឹក្សាឃុំបែកចាន ចុះទៅ ធ្វើការឆែឆេរផ្ទះរបស់ជនជាមេខ្លោងនោះ ប៉ុន្តែជននោះបានគេចខ្លួនបាត់ស្រមោល។ ជាមួយគ្នានោះកម្លាំងបានរកឃើញថ្នាំញៀន២កញ្ចប់ធំប្រភេទម៉ាទឹកកក និងថ្នាំយ៉ាម៉ាពណ៌ផ្កាឈូក១កញ្ចប់តូច និងដបទឹកចម្រាញ់១ដប ចានទ្រ១ ដែកកេះ១។ បន្ទាប់មកទើបមបញ្ជូនទៅកាន់អធិការដ្ឋាននគរបាលស្រុក ដើម្បីកសាងសំណុំរឿងបញ្ជូនទៅសាលាដំបូងខេត្តកណ្ដាល ចាត់ការបន្ត៕
ចែករំលែកព័តមាននេះ