ខេត្តរតនគិរី ៖ របរដឹកជញ្ជូនឈើយកទៅលក់ស្រុកយួនតាមច្រកទ្វារព្រំដែនអូរយ៉ាដាវ កំពុងតែមានប្រជាប្រិយភាពនិងឈានមុខគេយ៉ាងសកម្មបំផុតប្រចាំតំបន់ភូមិភាគឦសាននាខេត្តរតនគិរី កំពុងកក្រើកឡើងវិញហើយ ប្រៀបដូចខានស៊ីយូរនាំគ្នាស្ដារដើម ។
តាមប្រភពពីប្រជាពលរដ្ឋនៅមូលដ្ឋានប្រាប់ថា មានមេការធំម្នាក់ឈ្មោះ មករា ជាតំណាងឈ្មួញឈើដុះស្លែម្នាក់ជាអតីតមេប៉ូលិស ប្រធានវរៈការពារព្រំដែនគោក នៅតំបន់នោះអ្នកណាក៏ស្គាល់ដែរ ។ កំពុងតែបន្តដឹកជញ្ជូនឈើយ៉ាងសកម្មខ្លាំងណាស់ ចេញពីតំបន់ភ្នំកុក ភូមិទាមក្រោមនៃស្រុកវើនសៃ ខេត្តរតនគិរីមកស្តុកទុកមួយស្របក់នៅក្នុងឃ្លាំងមួយត្រង់ចំណុចចុះចំណោតភ្នំខាងជើងបឹងយក្យឡោម នាក្រុងបានលុងទីរួមខេត្តខេត្តរតនគិរី ។ រួចដឹកបន្តឆ្ពោះទៅច្រកទ្វារអន្តរជាតិអូរយ៉ាដាវចូលទៅលក់ឱ្យឈ្មួញយួនមួយក្រុម បានយ៉ាងងាយមិនមានទាក់ក្រសែភ្នែកសមត្ថកិច្ចណាមួយឡើយ ព្រោះគេបានរត់ការបុកបែកទ្រូងបែកភ្នែកអស់ទៅ
ហើយ ។
ប្រភពព័ត៌មានពីមន្ត្រីព្រៃឈើតូចតាចម្នាក់ សុំមិនបញ្ចេញឈ្មោះប្រាប់ថា មេការដឹកជញ្ជូនឈើឈ្មោះ មករា ដែលជាតំណាងឱ្យមេឈ្មួញធំម្នាក់ប្រើប្រាស់រូបភាពរថយន្តសាំយ៉ុងរហូតដល់ទៅ៤គ្រឿង តែគេរត់ការប្រាប់សមត្ថកិច្ចថាតែពីរគ្រឿងទេ មានសមត្ថកិច្ចខ្លះដឹងខ្លះមិនដឹងទេ ។
ក្នុងចំណោមរថយន្តទាំង៤គ្រឿងនោះ គេប្រើផ្លាកលេខដូចៗគ្នាតែមួយ៤០៤៩ ចំនួនពីរគ្រឿង ។ ឯពីរគ្រឿងទៀតអត់មានផ្លាកលេខទេងាយស្រួលបន្លំភ្នែកសមត្ថកិច្ច និងមហាជន ។ តែមហាជនខ្លះគេមិនខ្វល់ឈឺក្បាលជាមួយឡើយព្រោះរូបភាពដឹកជញ្ជូនបែបនោះជាទម្លាប់ទៅហើយសម្រាប់ខេត្តរតនគិរីនេះ របស់អតីតមេប៉ូលិសព្រំដែនម្នាក់នេះ រកស៊ីឈើតាំងពីនៅមានអំណាចរហូតដល់រ៉ឺត្រែតក៏មិនបោះបង់ដែរ ព្រោះកាក់កបពេកមុខរបរបំផ្លាញជាតិនេះ ។
គេតែងឃើញរថយន្តសាំយុងនោះដឹកជញ្ជូនឈើពីស្រុកវ៉ើនសៃ ឆ្លងកាត់ក្រុងបានលុង ទីរួមខេត្តរតនគិរី ទាំងថ្ងៃទាំងយប់និងវេលាទៀបភ្លឺ នៅតាមផ្លូវជាតិលេខ ៧៨A ឆ្ពោះនៅច្រកទ្វារអន្តរជាតិអូរយ៉ាដាវសម្ងំនៅចម្ការស្វាយចន្ទី ក្បែរបង្គោលអង់តែនសេវាទូរស័ព្ទ ០៩៧ រង់ចាំបារ៉ាស់ព្រំដែនបើកនៅពេលព្រឹកឡើង បើកឆ្លងចូលស្រុកយួនយ៉ាងរលូនគ្មានទើសត្រង់ណាឡើយ និងធ្វើសកម្មភាពរយៈពេលជាង២ខែមកដល់បច្ចុប្បន្ន ដែលក្នុងមួយថ្ងៃៗរថយន្តមួយគ្រឿងមិនក្រោមពី៥ជើងនោះទេ ។
រថយន្ដសាំយ៉ុងទាំង៤គ្រឿងរបស់មេការ មករា សម្រាប់ប្រើប្រាស់ដឹកឈើនេះមិនមានលក្ខណៈគ្រប់គ្រាន់តាមបច្ចេកទេសច្បាប់ចរាចរណ៍នោះឡើយ ខុសពីរថយន្តដឹកទំនិញផ្សេងៗទៀត គឺគេយកមកប្រើប្រាស់សម្រាប់តែដឹកឈើប្រណីតទាំងដុលៗដែលឈ្មួញយួនត្រូវការទិញ ។ លោកឃឹម ចិត្រា ប្រធានច្រកទ្វារអន្តរជាតិអូរយ៉ាដាវ មិនអាចរកការបំភ្លឺបានទេជុំវិញបទល្មើសឆ្លងដែនខាងលើនេះ ព្រោះសុទ្ធតែទទឹកស្លាបអស់ទៅហើយ ។
ឯសមត្ថកិច្ចជំនាញនៅក្នុងខេត្តវិញចំពោះរថយន្តសាំយ៉ុងដឹកឈើនោះ បើសិនជាមានការស្នើសុំសហការបង្ក្រាបណាមួយនោះតែងឆ្លើយដោះសារថាជាប់រវល់ទៅនេះទៅនោះហើយសមត្ថកិច្ចខ្លះនិយាយត្រង់ៗតែម្តងថា រថយន្តដឹកឈើឈ្មោះមករានោះមិនអាបង្ក្រាបបានទេ ព្រោះសមត្ថកិច្ចគ្រប់ស្ថាប័នគេត្រូវរូវគ្នារត់ការតាំងពីថ្នាក់ខេត្តរហូតដល់ថ្នាក់ក្រោមយ៉ាងរលូនអស់ហើយ ។ គេប្រាប់វិញដោយត្រង់ៗថា បើជំនាញយើងតែឯងបង្ក្រាបវាហាក់ទៅឆ្វេងតែឯង គ្មានអ្នកណាសហការទេហើយអត់ប្រាក់ទៀត ម៉្លោះហើយទុកឱ្យគេទៅតាមដំណើរចុះ ៕
ចែករំលែកព័តមាននេះ