រាជធានីភ្នំពេញ ៖ នៅថ្ងៃសៅរ៍ទី២០ សីហា ស្អែកនេះ ខារ៉ាបាវ នឹងបើកឆាកប្រដាល់ដណ្ដើមខ្សែក្រវាត់អន្តរជាតិរបស់ខ្លួនជាផ្លូវការ បន្ទាប់ពីបានរៀបចំការប្រកួតលក្ខណៈមិត្តភាពអស់២សប្ដាហ៍មក ។ កីឡាករចំនួន៤រួប ដែល២រូបមកពីខាងកម្ពុជា និង២រូបមកពីខាងបរទេសនឹងត្រូវប៉ះគ្នាជាលើកទី១នៅវេលារសៀលនេះនៅលើសង្វៀនទូរទស្សន៍អាស៊ីអាគ្នេយ៍។
លោក ញាណ សុធី អ្នករៀបចំការប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា ការប្រដាល់ដែលមានឈ្មោះថា «ប្រដាល់អន្តរជាតិជើងឯកខ្សែក្រវាត់ខារ៉ាបាវ» សម្រេចបើករេញប្រកួតសន្សំពិន្ទុនៅថ្ងៃនេះហើយ ដោយមានសុទ្ធតែកីឡាករវ័យក្មេង និងខ្លាំងក្នុងប្រភេទទម្ងន់៦៣,៥គីឡូក្រាមប៉ះគ្នា ។ លោកថានៅក្នុងព្រឹត្តិការណ៍នេះមានកីឡាករសរុបចំនួន៨រូបដូចជាម្ចាស់ខ្សែក្រវាត់ K-Cement ឆៃ សារ៉ា មកពីសមាគមកីឡាប្រដាល់ក្រសួងការពារជាតិ កីឡាករម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក កីឡាកររឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ និងកីឡាករ ឌុម កែវដា មកពីក្លិបមកុដរាជសីហ៍ សម្រាប់ភាគីកម្ពុជា និង កីឡាករ Aram Boy កីឡាករ Pha Yalek កីឡាករ Pra Vit និងកីឡាករ Yort Sayam សម្រាប់ភាគីថៃ ។
យ៉ាងណាក៏ដោយលោកថា នៅរសៀលម៉ោង២ស្អែកនេះ គឺមានតែកីឡាករ៤រូបប៉ុណ្ណោះប៉ះគ្នាដណ្ដើមពិន្ទុក្នុងជុំទី១ ។ ព្រឹត្តិការណ៍ប្រដាល់ខារ៉ាបាវនេះលោកថា កីឡាករកម្ពុជាឈរមួយពូល ហើយកីឡាករថៃឈរមួយពូល តែក្រុមទាំងពីរអត់ប្រកួតគ្នាឯងនោះទេ ដោយពួកគេត្រូវប្រកួតខ្វែងពូល គឺកម្ពុជាប្រកួតជាមួយថៃចុះឡើងៗរហូតទាល់តែអស់សមាជិក ហើយទើបយកពិន្ទុទៅសរុបក្នុងពូលរៀងខ្លួន ដោយកីឡាករកម្ពុជា និងថៃ២រូបណាមានពិន្ទុនាំមុខគេបានឡើងបន្ត។
សមាសភាពអ្នកមានមុខឡើងប្រកួតបើកឆាកថ្ងៃស្អែកនេះរួមមាន កីឡាករឆៃ សារ៉ា ប៉ះជាមួយកីឡាករថៃឈ្មោះ Pha Yaklek និងកីឡាករម៉ន ចាន់ដារ៉ា ប៉ះប្រកួតជាមួយកីឡាករថៃ Aram Boy ។ ជំនួបរវាងពួកគេសុទ្ធតែមានអ្នកគាំទ្ររៀងខ្លួនយល់ថា នឹងអាចដណ្ដើមបាន៣ពិន្ទុមុនមិនខុសគ្នា ដោយសារតែកីឡាករម្ខាងៗសុទ្ធតែមានក្រេឌីតមិនណយដូចគ្នា ។ សម្រាប់គូឆៃ សារ៉ា គេជឿភាគច្រើនថាកីឡាករម្ចាស់ខ្សែក្រវាត់ទើបទទួលបានរូបនេះនឹងយកបាន៣ពិន្ទុបើកឆាក ដោយផ្អែកតាមគេតាំងពីបានក្លាយខ្លួនជាកីឡាករដែលមានខ្សែក្រវាត់ជាប់ខ្លួនមកគឺមានលទ្ធផលឈ្នះកីឡាករថៃស្ទើរតែគ្រប់ពេលឡើងរេញអន្តរជាតិនៅលើសង្វៀនទូរទស្សន៍អាស៊ីអាគ្នេយ៍។ បើទោះជាកីឡាកររូបនេះមានប្រពន្ធ និងកូនហើយ ប៉ុន្តែគេកត់សម្គាល់ថា ឆៃ សារ៉ា មិនអន់កម្លាំង និងមានបច្ចេកទេសវាយសម្រុកទៅលើគូប្រកួតមិនធម្មតានោះទេ ទើបការយកឈ្នះកីឡាករថៃនៅរសៀលស្អែកថ្ងៃនេះអាចមិនមែនជាឧបសគ្គ ។
ទោះបីយ៉ាងណា អ្នកគាំទ្រកីឡាករថៃមិនយល់ដូច្នោះនោះទេ បន្ទាប់ពីកីឡាករ Pha Yalekបានបំបាក់កីឡាករខ្លាំងៗកម្ពុជានៅលើសង្វៀនទូរទស្សន៍អាស៊ីអាគ្នេយ៍ឱ្យគេបានស្គាល់ពីថ្វីដៃច្រើនមកហើយ ។ ក្រុមអ្នកយល់ឃើញនោះគិតថា ឆៃ សារ៉ា អាចយកមុខមាត់ជាម្ចាស់ខ្សែក្រវាត់របស់ខ្លួនទៅចាក់ចោលកណ្ដាលរេញខារ៉ាបាវនៅថ្ងៃនេះផង ប្រសិនបើការប្រកួតរបស់គេមិនមានបច្ចេកទេសខ្ពស់ណាមួយ។ គូនេះអ្វីដែលគេទស្សន៍ទាយ គឺអ្នកឈ្នះ និងអ្នកចាញ់នឹងទ្រមខ្លួនមិនខុសគ្នាដោយសារតែម្នាក់ៗសុទ្ធតែចង់បាន៣ពិន្ទុពីកម្មវិធី ។ កីឡាករឆៃ សារ៉ា ធ្លាប់ប្រកួតបាន៥៩លើក ឈ្នះ៤៨លើក ចាញ់១០លើក និងស្មើ១លើក ក្នុងពេលដែលកីឡាករថៃប្រកួតបានរហូតដល់៦៨លើក ឈ្នះ៥៧លើក និងចាញ់១១លើក។
មួយគូទៀតគឺជាជំនួបរវាងកីឡាករម៉ន ចាន់ដារ៉ា និងកីឡាករថៃឈ្មោះ Aram Boy ។ គូនេះមានអ្នកគាំទ្រភាគច្រើនយល់ថា ជើងខ្លាំងមកពីថៃនឹងមានក្រេឌីតខ្លាំងជាង ដោយសារតែមុនឡើងប្រកួតនៅក្នុងព្រឹត្តិការណ៍អន្តរជាតិខារ៉ាបាវរសៀលស្អែកនេះ គឺគេខ្លាំងរួចទៅហើយនៅលើសង្វៀនក្នុងការប៉ះប្រកួតជាមួយកីឡាករខ្មែរល្អៗកន្លងមក ។ ទោះបីយ៉ាងណា ម៉ន ចាន់ដារ៉ា ក៏មិនអន់ឱ្យកីឡាករថៃយក៣ពិន្ទុបានមុននោះដែរ ទើបពួកគេដាច់ខាតត្រូវតែបញ្ចេញអស់សមត្ថភាពរៀងខ្លួន ។ កីឡាករថៃធ្លាប់ប្រកួតបាន៦៧លើក ឈ្នះ៥៤លើក និងចាញ់១៣លើក ក្នុងពេលកីឡាករកម្ពុជាធ្លាប់ប្រកួតបាន៦១លើក ឈ្នះ៥០លើក ចាញ់១០លើក និងស្មើ១លើក៕
ចែករំលែកព័តមាននេះ