អ្នកវិទ្យាសាស្ត្រពីអង្គការគ្រប់គ្រងអវកាសនិងការហោះហើររបស់អាមេរិក (NASA) បានបញ្ជាក់ថា អាចមានឱកាសខ្ពស់ដល់ទៅ៩៩,៩% ដែលក្រុងឡូសអេនចឺឡេស ជាទីជម្រករបស់ពលរដ្ឋជាង១៣លាននាក់ និងជាក្រុងធំលំដាប់ទី២របស់អាមេរិក ប្រឈមមុខនឹងការរញ្ជួយដីក្នុងរយៈពេល២ឆ្នាំខាងមុខ ។
អាជ្ញាធររដ្ឋកាលីហ្វ៊័រនីញ៉ាសហរដ្ឋអាមេរិក បានរកឃើញទិន្នន័យផ្នែកវិទ្យាសាស្ត្របញ្ជាក់ថា មានឱកាសខ្ពស់ដល់ទៅ៩៩,៩% អាចកើតមានរញ្ជួយដីដ៏ធំមួយនៅក្រុងឡូសអេនចឺឡេស ក្នុងរយៈពេល២ឆ្នាំខាងមុខ ឬនៅមុនខែមេសា ឆ្នាំ២០១៨ ។ រញ្ជួយដីកម្រិត៥,១រិកស្ទ័រ ដែលកើតនៅឆ្នាំ២០១៤ ក្នុងក្រុងឡាហាប្រា ភាគខាងត្បូងរដ្ឋកាលីហ្វ៊័រនីញ៉ានោះនៅតែមានសល់ឥទ្ធិពលនៅក្នុងដី និងនៅលើសម្បកផែនដី ។ នៅក្នុងហេតុការណ៍រញ្ជួយដីនៅក្រុងឡាហាប្រា នោះត្រូវក្រុមអ្នកវិទ្យាសាស្ត្ររបស់ «NASA» បញ្ជាក់ថា ជាប្រភពដ៏សំខាន់ឈានឆ្ពោះទៅរកការរញ្ជួយដីថ្មីជាច្រើនលើកនៅខែមេសា ២០១៨ នៅលើទីតាំងរបស់រដ្ឋកាលីហ្វ៊័រនីញ៉ា និងជាទីជម្រករបស់ពលរដ្ឋជាង១៣លាននាក់ បន្ទាប់ពីក្រុងញូវយ៉ក ។
កាលពីខែមករា១៩៩៤ នៅជ្រលងភ្នំ «San Fernando» រដ្ឋកាលីហ្វ៊័រនីញ៉ា សហរដ្ឋអាមេរិក ប្រឈមមុខនឹងរញ្ជួយដីកម្រិតធ្ងន់៦,៧រិកស្ទ័រ ដោយចាត់ទុកថាជាផ្នែកមួយក្នុងរញ្ជួយដីដ៏អាក្រក់ក្នុងប្រវត្តិសាស្ត្រ ។ ការរញ្ជួយដីនោះកើតឡើងក្នុងរយៈពេលប្រហែល២០វិនាទី បង្កឱ្យមានអ្នកស្លាប់ចំនួន៥៧នាក់ និងរបួសជាង៨៧០០នាក់ ។ ការខូចខាតដែលកើតឡើងពីរញ្ជួយដីនោះក្នុងកម្រិតខ្ពស់ដល់ទៅ៤០.០០០លានដុល្លារ ៕
ចែករំលែកព័តមាននេះ