ខេត្តព្រះវិហារ ៖ គណៈប្រតិភូសហគមន៍អ៊ិស្លាមកម្ពុជាដឹកនាំដោយលោកឧកញ៉ា អូស្មាន ហាស្សាន់ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាប្រធានអង្គ ការមូលនិធិអភិវឌ្ឍន៍មុស្លីមកម្ពុជា បានចុះសួរសុខទុក្ខកងពលលេខ៨ ដែលកំពុងឈរជើងការពារបូរណភាពទឹកដីនៅសមរភូមិមុខតំបន់ប្រាសាទព្រះវិហារ និងនាំយកអំណោយជាថវិកា និងគ្រឿងឧបភោគបរិភោគទៅចែកជូនដល់កងទ័ពកាលពីថ្ងៃទី២៧ កុម្ភៈ ឆ្នាំ២០១១ ។
ក្នុងដំណើរអញ្ជើញសាកសួរសុខទុក្ខយុទ្ធជនសមរភូមិមុខនាឱកាសនោះ មានការចូលរួមអមដំណើរដោយលោកឧកញ៉ា សុះ កំរី ចាងហ្វាងនៃគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា សមាជិករដ្ឋសភា រដ្ឋលេខាធិការ អនុរដ្ឋលេខាធិការ គណៈអ៊ីម៉ាំរាជធានី-ខេត្ត គណៈអ៊ីម៉ាំស្រុក នៅទូទាំងព្រះរាជាណាចក្រកម្ពុជា និងយុវជនអ៊ិស្លាមកម្ពុជាមួយចំនួនផងដែរ ។
លោកនាយឧត្តមសេនីយ៍ ជា តារា អគ្គមេបញ្ជាការរងកងយោធពលខេមរភូមិន្ទ និងជាប្រធានគណៈបញ្ជាការឯកភាពសមរភូមិមុខទិសយោធភូមិភាគទី៤ បានមានប្រសាសន៍ក្នុងពិធីនោះថា លោកមានក្តីរំភើបរីករាយណាស់ ដែលបានឃើញចលនាស្នេហាជាតិពិតប្រាកដចំពោះកិច្ចការពារបូរណភាពទឹកដីខ្មែរដ៏បវរនៃយើង របស់ប្រជាពលរដ្ឋខ្មែរគ្រប់ស្រទាប់តាំងពីសា្ថប័នព្រះមហាក្សត្រ ព្រឹទ្ធសភា រដ្ឋសភា រាជរដ្ឋាភិបាល និងប្រជាជនទូទៅ។ ជាក់ស្តែងដូចជាពេលនេះ ប្រជាពលរដ្ឋជាសាសនិកអ៊ិស្លាមទូទាំងប្រទេសបានពាំនាំអំណោយមកជូនយុទ្ធជនដ៏អង់អាចក្លាហាននៅសមរភូមិមុខរបស់យើង ។
លោកនាយឧត្តមសេនីយ៍ បានថ្លែងអំណរគុណចំពោះទឹកចិត្តសប្បុរសធម៌របស់ថ្នាក់ដឹកនាំអ៊ិស្លាមកម្ពុជា ព្រមទាំងសាសនិកអ៊ិស្លាមទូទាំងប្រទេសកម្ពុជា ដែលបានលះបង់ទ្រព្យសម្បត្តិផ្ទាល់ខ្លួន ផ្តល់ជាសំភារ ថវិកា គ្រឿងឧបភោគបរិភោគ ជូនដល់វីរយុទ្ធជនយើងដែលកំពុងឈរជើងការពារបូរណភាពទឹកដីយា៉ងអង់អាចក្លាហាន ។ លោកឧកញ៉ា អូស្មាន ហាស្សាន់ បានមានប្រសាសន៍ពីការផ្សារភ្ជាប់រវាងសមរភូមិមុខ និងសមរភូមិក្រោយថា ពិតជាបានផ្តល់នូវការលើកទឹកចិត្តចំពោះកងទ័ពយើង។ ជាក់ស្តែងសំភារ ថវិកា និងគ្រឿងឧបភោគបរិភោគដែលបាននាំយកមកនៅថ្ងៃនេះ គឺបានមកពីការចូលរួមចំណែករបស់ប្រជាពលរដ្ឋតាមរាជធានី-ខេត្តទូទាំងប្រទេស ដើម្បីរួមចំណែកគាំទ្រដល់កងទ័ពកម្ពុជាយើង ដែលបានលះបង់អ្វីៗគ្រប់បែបយា៉ងក្នុងបុព្វហេតុការពារបូរណភាពទឹកដីមិនឱ្យសត្រូវសៀមឈ្លានពានបានឡើយ ។
លោកឧកញ៉ាបានមានប្រសាសន៍ថា សាសនិកអ៊ិស្លាមនៅកម្ពុជាតែងតែគាំទ្រ និងចូលរួមជានិច្ចក្នុងសកម្មភាពរបស់រាជរដ្ឋាភិបាល ដោយបានចលនាស្វែងរកជំនួយមនុស្សធម៌សម្រាប់កងទ័ពនៅសមរភូមិមុខ ដោយបានផ្តល់ថវិកាតាមរយៈអាជ្ញាធរដែនដី-មូលនិធិបាយ័ន ក៏ដូចជាមូលនិធិ CTN ផងដែរ ព្រោះកិច្ចការពារបូរណភាពទឹកដី ជាកិច្ចការរួមសម្រាប់ប្រជាពលរដ្ឋទាំងអស់ត្រូវចូលរួមចំណែក ហើយបើមានករណីចាំបាច់ប្រទេសជាតិត្រូវការ សហគមន៍អ៊ិស្លាមនឹងចូលធ្វើកងទ័ពកាន់កាំភ្លើង ដើម្បីរួមចំណែកការពារទឹកដីមាតុភូមិកម្ពុជាមិនឱ្យខ្មាំងសត្រូវសៀមឈ្លានពានបានឡើយ ។
លោកឧកញ៉ា អូស្មាន ហាស្សាន់ បានបន្តថា លើសពីនេះទៅទៀតលោកឧកញ៉ា សុះ កំរី ក៏បានដឹកនាំបួងសួងទៅព្រះអាឡាហ៍ជាម្ចាស់ ជាមួយនឹងសាសនិកអ៊ិស្លាមដទៃទៀត ដើម្បីប្រទាននូវជោគជ័យដល់កងទ័ពរបស់យើងនៅសមរភូមិមុខ នៅគ្រប់ពេលវេលានៃការប្រយុទ្ធតតាំងនឹងសត្រូវឈ្លានពាន។ ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន សាសនិកអ៊ិស្លាមកម្ពុជា ពិតជាមានឱកាសយ៉ាងច្រើនទាំងមន្ត្រីការងារ នយោបាយ សិទ្ធិសេរីភាពគោរពប្រណិប័តន៍សាសនា និងកំណើនជីវភាពរស់នៅល្អប្រសើរជាងសម័យណាៗទាំងអស់។
អំណោយដែលត្រូវបានចែកជូនដល់យុទ្ធ ជនសមរភូមិមុខនៅទីបញ្ជាការកងពលលេខ៨ រួមមាន មីយើង៥២០កេស ត្រីខរូបស្រីបីនាក់១០០កេស ទឹកដោះគោ១០០កេស ទឹកបរិសុទ្ធវីតាល់១៨៩កេស ស្ករស១០០គីឡូក្រាម គ្រែចំនួន២០។ ក្នុងឱកាសនោះផងដែរលោកឧកញ៉ា អូស្មាន ហាស្សាន់ និងលោកជំទាវ បានពាំនាំថវិកាសម្តេចអគ្គមហាសេនាបតីតេជោ ហ៊ុន សែន និងលោកជំទាវបណ្ឌិត ប៊ុន រ៉ានី ហ៊ុន សែន ចំនួន៥០លានរៀល ចែកជូនដល់យុទ្ធជនជួរមុខ១.០០០នាក់ ដែលម្នាក់ៗទទួលបាន៥០.០០០រៀល សរុបរួមជាថវិកាចំនួន១០៨.៥៣៩.០០០រៀល ។
បន្ទាប់មក លោកនាយឧត្តមសេនីយ៍ គន់ គីម អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាអនុគណៈបញ្ជាការឯកភាពសមរភូមិមុខព្រំដែនកម្ពុជា-ថៃ បានមានប្រសាសន៍ថ្លែងអំណរគុណ និងនឹករំលឹកក្នុងនាមនាយទាហាន នាយទាហានរង និងពលទាហានទាំងអស់ដែលកំពុងប្រចាំការនៅសមរភូមិមុខ ជូនដល់សាសនិកអ៊ិស្លាមនៅទូទាំងប្រទេស ដែលបានខិតខំអំពាវនាវ និងចលនាស្វែងរកជំនួយមនុស្សធម៌សម្រាប់យកមកប្រគល់ជូននាយទាហាន នាយទាហានរង និងពលទាហានដ៏អង់អាចក្លាហានរបស់យើងនាពេលនេះ។ លោកនាយឧត្តមសេនីយ៍បានសន្យាថា នឹងប្រគល់អំណោយទាំងនេះជូនដល់ដៃនាយទាហាន នាយទាហានរង និងពលទាហានទាំងអស់ ៕
ចែករំលែកព័តមាននេះ