រាជធានីភ្នំពេញ ៖ ម៉ា ឆៃម៉ូវ មកពីក្លិបឃ្លាំងមឿងកីឡា និង ចាន់ សំអាត មកពីក្លិបកងពលតូចអន្តរាគមន៍លេខ៨ភ្នំទ្រព្យ នឹងជួបប្រកួតជាមួយកីឡាករថៃនៅលើសង្វៀនទូរទស្សន៍CTN ថ្ងៃសៅរ៍ទី២០ សីហា ខានស្អែកនេះហើយ ។ មកដល់ពេលនេះ មិនទាន់ដឹងថា តើកីឡាករកម្ពុជាទាំងពីររូបនេះ អាចសម្រេចគោលដៅរបស់ខ្លួន ឬយ៉ាងណាទេ ខណៈកីឡាករថៃត្រូវគេដឹងថា មានសមត្ថភាពខ្លាំងមិនធម្មតាបែបនេះនោះ ។
ម៉ា ឆៃម៉ូវ ត្រូវជួបប្រកួតជាមួយកីឡាករថៃឈ្មោះJack Siam Singprabក្នុងប្រភេទទម្ងន់៨៧គីឡូក្រាម ។ ទោះបីកីឡាករថៃរូបនេះ មិនធ្លាប់មកប្រកួតនៅស្រុកខ្មែរប៉ុន្តែបើតាមការអះអាងពីអ្នករៀបចំកម្មវិធីប្រកួតថា គេជាអ្នកប្រដាល់ជើងខ្លាំងមួយរូបដែលមានបទពិសោធន៍ ប្រកួតមិនតិចឆ្នាំទេ ។ Jack Siam Singprab ធ្លាប់ប្រកួត១៣០ដង ឈ្នះ៨០ដង ចាញ់៣៥ដង ស្មើ១៥ដង និងធ្លាប់ផ្ដួលគូប្រកួតឱ្យសន្លប់បាន១៥ដង ។ ចំណែកម៉ា ឆៃម៉ូវ ធ្លាប់ប្រកួតបានត្រឹម៤១ដងក្នុងនោះឈ្នះ២៩ដង ចាញ់១០ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៥ដង ។ ទោះបីម៉ា ឆៃម៉ូវ មានប្រវត្តិប្រកួតតិចជាងកីឡាករថៃក្ដីក៏អ្នកគាំទ្រនៅតែផ្ដល់ទំនុកចិត្តលើកីឡាកររូបនេះដដែល ព្រោះគេធ្លាប់ដឹងរួចមកហើយថា ម៉ា ឆៃម៉ូវ ជាអ្នកប្រដាល់មួយរូបដែលមាន ចិត្តសឿងខ្លាំងណាស់ ទម្លាប់របស់គេវាយមិនចេះដកថយឡើយ ។
ចំណែក ចាន់ សំអាត ត្រូវជួបប្រកួតជាមួយកីឡាករថៃឈ្មោះ Kwannrong Mor Matvisetក្នុងប្រភេទទម្ងន់៦០គីឡូក្រាម ។ អ្នកប្រដាល់ថៃរូបនេះមិនធ្លាប់មកប្រកួតនៅស្រុកខ្មែរទេ ប៉ុន្តែបើមើលលើប្រវត្តិប្រកួតរបស់គេ គឺមិនធម្មតាឡើយ ។ កីឡាករថៃគូនេះធ្លាប់ប្រកួតបានរហូតដល់ទៅ៧០ដង ឈ្នះ៥០ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១០ដង ។ រីឯ អាំង សំអាត ធ្លាប់ប្រកួតបានត្រឹមតែ៣៩ដងប៉ុណ្ណោះ ឈ្នះ២៥ដង ចាញ់១៣ដង ស្មើ១ដង និងផ្ដួលគូប្រកួតបាន១៥ដង ។
នៅលើសង្វៀនដដែលក៏មានការប្រកួតមិត្តភាពរវាងកីឡាករកម្ពុជា និងកម្ពុជាដូចជាកីឡាករ ហាក់ ប៉ាន់ធី មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ តូច ទូ មកពីសមាគមកីឡាប្រដាល់ក្រសួងការពារជាតិ។ កីឡាករ សល់ អាមូល មកពីក្លិបកុសល ប្រកួត ជាមួយកីឡាករ យ៉ាំ ខេម៉ា មកពីក្លិបរស្មីកុមារកំព្រា និងកីឡាករ អ៊ុំ វណ្ណេត មកពីក្លិបការិយាល័យទី៥កងទ័ពជើងគោក ប្រកួតជាមួយកីឡាករ ផន ផល្លា មកពីក្លិបតាព្រហ្មមានជ័យ ៕
ចែករំលែកព័តមាននេះ