រាជធានីភ្នំពេញ ៖ នៅព្រឹកថ្ងៃអាទិត្យ ទី២១ សីហា កីឡាករជើងខ្លាំងកម្ពុជា២រូប គឺឡៅ ចិត្រា និងសេក គឹមរួន នឹងក្លាយជាបេក្ខភាព២រូបឡើងប្រកួតជាមួយថៃនៅលើសង្វៀន K-Cement របស់ទូរទស្សន៍អាស៊ីអាគ្នេយ៍ ។ ជំនួបរបស់អ្នកទាំង៤ក៏មានការចាប់អារម្មណ៍មិនអន់នោះដែរក្នុងចំណោមអ្នកស្នេហាវិស័យប្រដាល់ ។
សមាសភាពកីឡាករឡើងប្រកួតមើលទៅទាក់ទាញទាំងកីឡាករកម្ពុជា និងកីឡាករថៃ ធ្វើឱ្យអ្នកស្នេហាការប្រដាល់ជជែកដេញដោលគ្នាមិនដាច់ពីរឿងថាតើកីឡាករណាខ្លះនឹងសម្រេចគោលដៅ ។ ព្រឹត្តិការណ៍នេះ មានការរំពឹងយ៉ាងខ្លាំងថានឹងមានអ្នកទស្សនាណែនណាន់តាន់តាប់មិនខុសពីសព្វមួយដងដែលសឹងមិនមានកន្លែងឈរទស្សនា ។ អ្នករៀបចំការប្រកួតបានអះអាងថា នៅព្រឹកថ្ងៃអាទិត្យនោះ កីឡាករដែលខ្លួនដាក់ឱ្យប្រកួតគឺសុទ្ធតែក្មេងៗពេញកម្លាំងហើយមានឈ្មោះបោះសំឡេងនៅក្នុងពិភពប្រដាល់ទៀតផង ។
កីឡាករ ឡៅ ចិត្រា មកពីក្លិបកងពលតូចឆត្រយោង៩១១ នឹងជួបប្រកួតជាមួយកីឡាករថៃឈ្មោះឃុំ ឡេក ដែលល្បីឈ្មោះនៅក្នុងប្រទេសថៃ ។ ជំនួបពួកគេមានការរំពឹងខ្ពស់ថានឹងបែកផ្កាភ្លើងនៅលើសង្វៀនទូរទស្សន៍អាស៊ីអាគ្នេយ៍ ដោយសារតែអ្នកទាំងពីរសុទ្ធតែត្រូវការឈ្នះដើម្បីរក្សាមុខមាត់ និងក្រេឌីត ។ ផ្អែកតាមបទពិសោធន៍ប្រកួត អ្នកទាំងពីរមានកម្រិតខុសគ្នា ដោយកីឡាករកម្ពុជាមានប្រវត្តិប្រកួតតិចជាងតែខ្លាំងមិនចាញ់កីឡាករថៃដែលមានប្រវត្តិប្រកួតច្រើនជាងនៅលើសង្វៀន។
លោក ញាណ សុធី អ្នករៀបចំការប្រកួតបានអះអាងថា លោកបានសម្រេចដាក់ឱ្យកីឡាករទាំងពីរប៉ះគ្នា ដោយសារតែ ឡៅ ចិត្រា កាន់តែស្ទុះឡើងកូដ និងកាន់តែមានក្រេឌីតនៅលើសង្វៀនប្រដាល់អន្តរជាតិនាពេលចុងក្រោយ ក្នុងពេលដែលគ្រូបង្វឹករបស់គេក៏បានប្រកាសថាគេបានហ្វឹកហាត់គ្រប់គ្រាន់មុនពេលផ្គូផ្គង។ លោកថា កីឡាករថៃល្អ ហើយក៏ល្បីណាស់ដែរនៅលើសង្វៀនថៃ ប៉ុន្តែមកពីចង់ឱ្យឡៅ ចិត្រា បានសាងកេរ្តិ៍ឈ្មោះឱ្យកាន់តែលឿន ទើបរៀបចំឱ្យអ្នកទាំងពីរប៉ះគ្នាដែលមិនខុសពីលើកកីឡាករកម្ពុជាឱ្យគេឆាប់ស្គាល់ ។ លោកថា កីឡាករកម្ពុជាធ្លាប់ប្រកួតបាន២៦លើក ឈ្នះ២០លើក ចាញ់៤លើក និងស្មើ២លើក ក្នុងពេលដែលកីឡាករថៃធ្លាប់ប្រកួតបាន៥១លើក ឈ្នះ៤៥លើក ចាញ់៥លើក និងស្មើ១លើក ។ កីឡាករថៃក្រៅពីមានសមត្ថភាពខ្លាំងក៏មានប្រវត្តិប្រកួតច្រើនជាងលើរេញ ដែលកីឡាករកម្ពុជាមិនអាចមើលស្រាលបាន ។
អ៊ីចឹងហើយទើបលោកយល់ថា បើ ឡៅ ចិត្រា ឈ្នះ គឺមិនខុសពីរុញកេរ្តិ៍ឈ្មោះគេឱ្យឆាប់រះត្រដែតនោះឡើយ ។ លោកថា កីឡាករកម្ពុជាបើឈ្នះនឹងកាន់តែទទួលក្រេឌីតដោយអ្វីដែលលោកជឿជាក់ គឺឡៅ ចិត្រា ពិតជាធ្វើឱ្យកក្រើកសង្វៀនដោយសារតែគេចង់ឈ្នះកីឡាករថៃឱ្យខាងតែបាន ។
កីឡាករ សេក គឹមរួន ក៏នឹងត្រូវជួបប្រកួតជាមួយកីឡាករថៃឈ្មោះផា យ៉ាក់ណយ ក្នុងឋានៈជាគូឯកនៅក្នុងព្រឹត្តិការណ៍ប្រដាល់អន្តរជាតិយប់នេះ ។ គេមិនទាន់ដឹងថា គូនេះនឹងទាក់ទាញជាងគូរងឯកឬយ៉ាងណានៅឡើយទេ។ កីឡាករថៃត្រូវគេស្គាល់ថាជាជើងខ្លាំងម្នាក់ ខណៈដែលសេក គឹមរួន ក៏មិនទាន់ល្អគ្រប់គ្រាន់ដែលអាចឱ្យទុកចិត្តទាំងស្រុងនៅឡើយ។ យោងតាមប្រវត្តិ កីឡាករកម្ពុជាគូនេះធ្លាប់ប្រកួតបាន៧១លើក ឈ្នះ៥៨លើក និងចាញ់១៣លើក ខណៈកីឡាករថៃក៏មានប្រវត្តិឡើងរេញបាន៨២លើក ឈ្នះ៦៩លើក ចាញ់១១លើក និងស្មើ១លើក។ អីុចឹងហើយទើបគេចាំមើលថាតើ កីឡាករកម្ពុជាធ្វើបានល្អឬអត់នៅពេលប៉ះគូប្រកួតខ្លាំងនៅក្នុងព្រឹតិ្តការណ៍ប្រដាល់អន្តរជាតិមួយនេះ ៕
ចែករំលែកព័តមាននេះ