អគារមន្ទីរអង្គភាពរដ្ឋចំនួន៥ទីតាំង និងដីបម្រុងទុករបស់រដ្ឋបាលក្រុងមួយកន្លែង សរុបចំនួន៦កន្លែង ដែលមានទីតាំងស្ថិតនៅតាមបណ្តោយអតីតវិថី១៩មិថុនា បច្ចុប្បន្នវិថី២៨ មិថុនា ស្ថិតក្នុងភូមិ០១ សង្កាត់លេខ០៣ កណ្តាលបេះដូង ក្រុងព្រះសីហនុ កំពុងប្រែក្លាយទៅជាសាច់កា.ប់យ៉ាងឆ្ងាញ់មាត់
ខេត្តព្រះសីហនុ ៖ អគារមន្ទីរអង្គភាពរដ្ឋចំនួន៥ទីតាំង និងដីបម្រុងទុករបស់រដ្ឋបាលក្រុងមួយកន្លែង សរុបចំនួន៦កន្លែង ដែលមានទីតាំងស្ថិតនៅតាមបណ្តោយអតីតវិថី១៩មិថុនា បច្ចុប្បន្នវិថី២៨ មិថុនា ស្ថិតក្នុងភូមិ០១ សង្កាត់លេខ០៣ កណ្តាលបេះដូង ក្រុងព្រះសីហនុ កំពុងប្រែក្លាយទៅជាសាច់កាប់យ៉ាងឆ្ងាញ់មាត់ គ្រប់គ្រងជាកម្មសិទ្ធិឯកជនជាបណ្តើរៗ បន្ទាប់ពីវិស័យអចលនៈទ្រព្យបានងើបឡើងខ្ពស់មុនពេលជំងឺឆ្លងកូវីដ-១៩ជាសកលបានលុកលុយកន្លងមកនេះបាន ក្លាយជារឿងចិនដេញខ្មែរ…ខ្មែរដេញខ្មោច ។
មន្ត្រីរាជការ ជានិវត្តន៍ជននៅក្នុងមន្ទីរអង្គភាពរដ្ឋផ្សេងៗគ្នាជាច្រើននាក់សុំមិនបង្ហាញអត្តសញ្ញាណ បានខ្សឹបប្រាប់កោះសន្តិភាពឲ្យដឹងថា នៅចុងឆ្នាំ(១៩៨៩-២០០០) នៅក្នុងអាណតិ្ត លោក អ៊ិត ដេតតូឡា ជាអភិបាលក្រុងព្រះសីហនុ ដែលមិនទាន់ក្លាយជាខេត្តបានចេញដីកាលេខ០៤១ ចុះថ្ងៃទី២២ ខែមីនា ឆ្នាំ២០០០ ស្តីពីការបែងចែកដីអចលនៈទ្រព្យរបស់រដ្ឋជូនដល់មន្ទីរអង្គភាពមួយចំនួនដែលមានទីតាំងនៅតាមបណ្តោយអតីតវិថី១៩មិថុនា បច្ចុប្បន្នវិថី២៨មិថុនា ស្ថិតក្នុងភូមិ០១ សង្កាត់លេខ០៣ ក្រុងព្រះសីហនុ ដើម្បីរៀបចំក្នុងខ្សែបន្ទាត់តែមួយ បង្កើតតំបន់រដ្ឋបាលបង្កលក្ខណៈងាយស្រួល ជូនបងប្អូនប្រជាពលរដ្ឋ ដែលត្រូវមកទទួលសេវាសាធារណៈពីមន្ទីរជំនាញ ។
ប្រភពខាងលើបានបន្តឲ្យដឹងទៀតថា នៅក្នងខ្លឹមសារដីកាខាងលើមន្ទីរអង្គភាពរដ្ឋ ដែលទទួលបានដីសម្រាប់សាងសង់អគាររដ្ឋបាលកណ្តាលដើមទ្រូងខេត្តមាត់សមុទ្រនេះមាន ៖
១-មន្ទីរផែនការក្រុង=(ខេត្ត)ទទួលបានដីទទឹង៣០ម៉ែត្រ×៩០ម៉ែត្រ ។
២-មន្ទីររៀបចំដែនដីនគរូបនីយកម្មសំណង់ និងសុរិយោដីទទួលបានដី៣០ម៉ែត្រ×៩០ ម៉ែត្រ ។
៣-សាខាពន្ធដារទទួលបានដី៣០ម៉ែត្រ×៩០ម៉ែត្រ ។
៤-មន្ទីរបរិស្ថានទទួលបានដី៣០ម៉ែត្រ×៩០ម៉ែត្រ ។
៥-មន្ទីរអភិវឌ្ឍជនបទទទួលបានដី៣០ម៉ែត្រ×៩០ម៉ែត្រ ។
៦-មន្ទីរកាកបាទក្រហមទទួលបានដី៣០ម៉ែត្រ×៩០ម៉ែត្រ ។
៧-មន្ទីររតនាគារទទួលបានដី៣០ម៉ែត្រ×៩០ម៉ែត្រ ។
៨-មន្ទីរកិច្ចការនារីទទួលបានដី៣០ម៉ែត្រ×៨០ម៉ែត្រ ។
៩-មន្ទីរធម្មការនិងសាសនាទទួលបានដី៤០ម៉ែត្រ×៥៤ម៉ែត្រ ។
១០-សាលាសង្កាត់លេខ៣ទទួលបានដី៦៥មែត្រ×៤០ម៉ែត្រ ។
ដោយឡែកសាលាដំបូងខេត្ត ជាដីស្នើសុំពីរដ្ឋបាលក្រុងមានទំហំ៤៧០០ម៉ែត្រការ៉េ ។
ដីអធិការដ្ឋានរដ្ឋបាលព្រៃឈើនិងដីបម្រុងទុកត្រង់ចំណុចផ្លូវបំបែករង្វង់មូលរូបសំណាកត្រីដូហ្វីន មានទទឹង៧០ម៉ែត្រ×១៥០ម៉ែត្រ ។
ប្រភពដដែលបានបន្តឲ្យដឹងបន្ថែមទៀតថា បន្ទាប់ពីមន្ទីរអង្គភាពខាងលើទទួលបានដីក៏បានសាងសង់អគាររដ្ឋបាលធ្វើការរៀងៗខ្លួន មិនបានប៉ុន្មានឆ្នាំផងបន្ទាប់ពីលំហូរចូល នៃការវិនិយោគនៃជនជាតិចិន លើវិស័យអចលនៈទ្រព្យបានងើបឡើងខ្ពស់នៅចុងឆ្នាំ(២០១៨-២០១៩) អគារមន្ទីរអង្គភាពរដ្ឋដូចជា៖
អគារអធិការដ្ឋានរដ្ឋបាលព្រៃឈើ
អគារមន្ទីរផែនការខេត្ត
អគារសាខាពន្ធដារខេត្ត
អគារមន្ទីរកិច្ចការនារីខេត្ត
អគារមន្ទីរធម្មការនិងសាសនាខេត្ត
អគារសាលាដំបូងខេត្តនិងដីបម្រុងទុករបស់រដ្ឋបាលខេត្ត ដែលមានទីតាំងជាប់វិថីឯករាជ្យ ជាផ្លូវដែលធំជាងគេភ្ជាប់ត្រង់ចំណុចរង្វង់មូលរូបសំណាកត្រីដូហ្វីន វិថី២៨មិថុនាត្រូវបានធ្វើការដោះដូរខ្ទេចខ្ទីយ៉ាងស្ងាត់កំបាំងដូចពាក្យចាស់លោកថា លក់ខ្ទេចលក់ខ្ទីស្ងាត់ដូចចោរលួចសេះ បាត់ស្ងាត់ឈឹងអស់ទៅហើយក្នុងតម្លៃ១ម៉ែត្រការ៉េ មិនក្រោមពី៥.០០០ដុល្លារអាមេរិកឡើយសម័យលោក យន្ត មីន ជាអភិបាលខេត្ត ។
រហូតមកដល់បច្ចុប្បន្នដីបម្រុងទុកនិងអគាររដ្ឋបាលចំនួន៦កន្លែងខាងលើត្រូវបានម្ចាស់កម្មសិទ្ធិដែលបានធ្វើការដោះដូរជាមួយមន្ទីរអង្គភាពរដ្ឋធ្វើរបងហ៊ុមព័ទ្ធចាក់សោបិទជិតដុះមមិះជុំជិតក្លាយជាព្រៃគ្របដណ្តប់អស់ទៅហើយ មានអគារមួយចំនួនដាក់លេខទូរស័ព្ទនិងស្លាកជាអក្សរចិន សម្រាប់ជួលឬលក់ជាបណ្តើរៗដែរ ។
មន្ត្រីរាជការថ្នាក់តូចតាច សុំមិនបង្ហាញអត្តសញ្ញាណក្នុងមន្ទីរអង្គភាពរដ្ឋដែលត្រូវបានធ្វើរការដោះដូរទីតាំងចេញពីទីប្រជុំជនដោយស្ងាត់ៗ និងបានរើតោករើហ៊ីងយកទៅដាក់កន្លែងធ្វើការថ្មីឯនាយជាយក្រុង ដែលត្រូវចំណាយពេលវេលាក្នុងការធ្វើដំណើរលើកំណាត់ផ្លូវវែងឆ្ងាយបាននាំគ្នាត្អូញត្អែរ និងមានការព្រួយបារម្ភពីសុវត្ថិភាពផ្ទាល់ខ្លួន ក្នុងការធ្វើដំណើរចេញទៅបំពេញការងារ ព្រោះឆ្ងាយពីក្រុងពេកដូចពាក្យថា «ចិនដេញខ្មែរ…ខ្មែរដេញខ្មោច» ។
ម្យ៉ាងដោយសារការចំណាយទៅលើថ្លៃសាំងខ្ពស់ មិនសមាមាត្រទៅនិងប្រាក់បៀវត្សប្រចាំខែ ។ ក្រុមហ៊ុនដែលបានដោះដូរជាមួយទីតាំងមហាសាលខាងលើនេះត្រូវមន្ត្រីនិយាយប្រាប់កោះសន្តិភាពថា មូលលើក្រុមហ៊ុនសំណង់ លី ឈួង ទាំងដុលតែម្តង ដែលការិយាល័យកោះសន្តិភាពមិនទាន់បានសុំការបំភ្លឺពីក្រុមហ៊ុន លី ឈួង បាននៅឡើយទេ ។
ប្រភពខាងលើបានបញ្ជាក់បន្ថែមទៀតថា ម្នាក់ៗបានត្រឹមតែពាក្យត្អូញត្អែរដដែលៗប៉ុណ្ណោះ បើថ្នាក់ដឹកនាំតម្រូវធ្វើការដោះដូរបែបនេះមានតែទ្រាំៗទៅរង់ចាំដល់ថ្ងៃដែលត្រូវជិះសេះមើលផ្កា(ពេលចូលនិវត្តន៍ជន)តែប៉ុណ្ណោះ ។
ប្រធានមន្ទីរអង្គភាពរដ្ឋមួយចំនួនបានទម្លាយឲ្យដឹងខ្លីៗនាពេលកន្លងមកថា ការដោះដូរអគារកន្លែងធ្វើការកន្លងមកនេះជាដែនសមត្ថកិច្ចរបស់ថ្នាក់ដឹកនាំជាន់ខ្ពស់តែប៉ុណ្ណោះ ។ បើទោះជាការអះអាងទម្លាយឲ្យដឹងបែបខ្លីៗរបស់ថ្នាក់ដឹកនាំមន្ទីរបែបយករួចខ្លួនយ៉ាងណាក៏ដោយ ក៏មានមន្ត្រីក្នុងមន្ទីរអង្គភាពមួយៗបានសើមមាត់សើមកខ្លះបានបង្ហើបឲ្យដឹងថា វាមិនខុសអីពីបទចម្រៀង «សុរិយាល្ងាចថ្ងៃទេ» ត្ចចស៊ីដោយតូច ធំស៊ីដោយធំ រកស៊ីជើងភ្នំផឹកទឹកដងអូរព្រោះបានស៊ីចុកបុកទំពារដែរ អត់ហ៊ានក្អកទេ…ហេ ! ហេ !
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ