រាជធានីភ្នំពេញ ៖ រយៈពេល២ឆ្នាំចុងក្រោយនេះ កំណើនការលក់រថយន្តហាក់មានសន្ទុះខ្លាំង ទាំងរថយន្ដថ្មី និងមួយទឹក គួបផ្សំនឹងយុទ្ធសាស្ត្រជំរុញការលក់តាមរយៈការបង់រំលស់ផងនោះ
រាជធានីភ្នំពេញ ៖ រយៈពេល២ឆ្នាំចុងក្រោយនេះ កំណើនការលក់រថយន្តហាក់មានសន្ទុះខ្លាំង ទាំងរថយន្ដថ្មី និងមួយទឹក គួបផ្សំនឹងយុទ្ធសាស្ត្រជំរុញការលក់តាមរយៈការបង់រំលស់ផងនោះ ធ្វើឲ្យវិស័យមួយនេះកំពុងតែរីកលូតលាស់យ៉ាងខ្លាំង ។ ការរីកចម្រើននៃវិស័យមួយនេះ ក៏អាស្រ័យសេដ្ឋកិច្ចកម្ពុជា កំពុងដំណើរការល្អផងដែរ ធ្វើឲ្យប្រជាពលរដ្ឋមានលទ្ធភាព និងជីវភាពធូរធារដែលនេះគួរតែអរគុណដល់រាជរដ្ឋាភិបាល និងក្រសួងស្ថាប័នពាក់ព័ន្ធដែលជាសេនាធិការក្នុងការទប់ស្កាត់នឹងវិបត្តិនានា រក្សាបាននូវសន្ដិភាព និងស្ថិរភាពនៅក្នុងប្រទេស ។
បច្ចុប្បន្ន ក្រុមហ៊ុនរថយន្ដដែលមានការិយាល័យតំណាងលក់នៅកម្ពុជា មកពីស្ទើរគ្រប់ប្រទេសដែលផលិតរថយន្ដ ដូចជា អាមេរិក អង់គ្លេស អាល្លឺម៉ង់ ជប៉ុន ចិន កូរ៉េ និងប្រទេសថៃ ជាដើម កំពុងនាំចូលរថយន្ដម៉ូដែលថ្មីចុងក្រោយរបស់ខ្លួន មកតាំងបង្ហាញបង្អួតរូបរាងគួរឲ្យទាក់ទាញដល់អ្នកប្រើប្រាស់ ដោយសារតែគេសម្លឹងឃើញថា ទីផ្សាររថយន្តនៅកម្ពុជាបច្ចុប្បន្នកំពុងមានសន្ទុះខ្លាំង ។
បើតាមការលើកឡើងរបស់អគ្គនាយកក្រុមហ៊ុន ISUZUដែលទើបតែនាំចូលរថយន្ដ ISUZU ម៉ូដែលD-MAX Blue Power និង MU-X Blue Power ស៊េរីចុងក្រោយបានឲ្យដឹងថា សក្ដានុពលភាពនៃទីផ្សាររថយន្ដនៅកម្ពុជាកាន់តែល្អប្រសើរឡើង ពិសេសទៅថ្ងៃអនាគត ដោយសារតែកម្ពុជាស្ថិតក្នុងតំបន់អាស៊ាន ដែលជាប្រទេសមួយមានកំណើនGDP ខ្ពស់បើធៀបនឹងក្នុងតំបន់ ។ ចំណុចដែលសំខាន់មួយទៀត គឺប្រទេសកម្ពុជាមានទីផ្សាររថយន្ដខ្ពស់ជាងគេ ដូច្នេះហើយទើបលោកសម្រេចនាំចូលរថយន្ដម៉ូដែលចុងក្រោយមកដាក់លក់នៅកម្ពុជា ។
កាលពីចុងខែមិថុនាកន្លងមក ប្រធានផ្នែកលក់រថយន្ត Mazda ក្រុមហ៊ុន HGB Auto បានឱ្យដឹងថា ការលក់រថយន្តរបស់ក្រុមហ៊ុន បើទោះជារាជរដ្ឋាភិបាលបានដំឡើងពន្ធបន្ថែមលើការនាំចូលរថយន្តមកកាន់ទីផ្សារកម្ពុជាក្ដី តែការលក់នៅតែដំណើរការល្អ ។
អ្នកស្រី អ៊ុន កញ្ញា ប្រធានផ្នែកលក់រូបនេះថា៖« ពេលយើងទិញរថយន្តថ្មីពីស្រុកគេមក តម្លៃវាធូរថ្លៃទេ វាថ្លៃតែពន្ធ ហើយដល់ពេលពន្ធឡើងថ្លៃ អីចឹងតម្លៃរថយន្តថ្មីក៏ចេះតែឡើងដែរ ។ ទោះបីជារថយន្ដឡើងថ្លៃក៏ពិតមែន តែតម្រូវការពីចំនួនអ្នកទិញនៅតែមានច្រើន ដែលអាចឆ្លុះបញ្ចាំងបានថា ទីផ្សារមួយនេះកំពុងតែដំណើរការយ៉ាងល្អ » ។
តាមប្រធានផ្នែកលក់ដដែលបញ្ជាក់ថា ៖ « ទោះរាជរដ្ឋាភិបាលដំឡើងពន្ធលើការនាំចូលរថយន្តថ្មីក្ដី ក៏រថយន្តម៉ាកMazda ក្នុងមួយខែលក់បានប្រមាណ១០០គ្រឿងដែរ » ។
ដោយឡែក កាលពីពេលថ្មីៗនេះ ការនាំចូលរថយន្ដពីប្រទេសកូរ៉េក៏កំពុងកើនឡើងដែរ ដែលខុសប្លែកពីឆ្នាំកន្លងមក ។ បើតាមប្រធានការិយាល័យស្ថិតិនិងទំនាក់ទំនងនៃកំពង់ផែស្វយ័តក្រុងព្រះសីហនុ លោក អ៊ុក សុមេធី បានមានប្រសាសន៍ថា ៖ « ការនាំចូលរថយន្តពីប្រទេសកូរ៉េកន្លងមកគឺដឹកតែតាមនាវាតូចៗប៉ុណ្ណោះ អត់ធ្លាប់ដឹកតាមនាវាធំទេ ទើបតែពេលនេះ គឺដឹកតាមនាវាធំបែប RORO ដែលអាចបើករថយន្ដចេញ-ចូលក្នុងនាវាបាន ហើយជាធម្មតា គឺដឹក២ជើងក្នុង១ខែ ដែលក្នុង១ជើងមានរថយន្ដទាំងចាស់ និងថ្មី ប្រហែល២០០គ្រឿង » ។
លោកបញ្ជាក់ថា ៖ « រថយន្តទាំងនេះ គឺមានក្រុមហ៊ុនចំនួន៤ ដោយក្នុងក្រុមហ៊ុននីមួយៗ មានចំណែករបស់ខ្លួនប្រហែល៥០គ្រឿង ក្នុងនោះមានប្រភេទរថយន្តដឹកអ្នកដំណើរ, រថយន្តដឹកដី និងក្បាលរថយន្តដឹកកុងតឺន័រជាដើម » ។
គិតមកដល់ពេលនេះ បើយោងតាមសហព័ន្ធឧស្សាហកម្មយានយន្តកម្ពុជា តំណាងឱ្យអ្នកចែកចាយដែលមានសិទ្ធិ រួមមាន Audi, BMW, Chevrolet, Ford, Fuso, Great Wall, Honda, Isuzu, Jaguar, Kia, Land Rover, Mazda, Mercedes Benz, Mitsubishi, Nissan, Porsche, Subaru, Suzuki, Toyota និង Volkswagen ៕
ចែករំលែកព័តមាននេះ