ខេត្តព្រះសីហនុ ៖ មេសន្តិសុខប្រចាំនៅបុរីគុជអាស៊ីបានយកកាំភ្លើងអាកា៤៧ភ្ជង់មេការកម្មករសំណង់ម្នាក់ ហើយវាយក្បាលជាច្រើនស្វាយកាំភ្លើងបណ្ដាលឲ្យរងរបួសធ្ងន់ធ្ងរ
ខេត្តព្រះសីហនុ ៖ មេសន្តិសុខប្រចាំនៅបុរីគុជអាស៊ីបានយកកាំភ្លើងអាកា៤៧ភ្ជង់មេការកម្មករសំណង់ម្នាក់ ហើយវាយក្បាលជាច្រើនស្វាយកាំភ្លើងបណ្ដាលឲ្យរងរបួសធ្ងន់ធ្ងរ ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៧ល្ងាច ថ្ងៃទី១៤ ខែសីហា ឆ្នាំ២០១៦ ។
យោងតាមប្រភពព័ត៌មានដំបូងពីក្រុមកម្មករដែលបានឃើញហេតុការណ៍បានអះអាងថា ពួកគាត់ពុំស្គាល់ឈ្មោះជនបង្កពិតប្រាកដនោះទេ គ្រាន់តែស្គាល់ហស្សនាមមានឈ្មោះព្រះខ័ណ្ឌរាជ្យ ជាមេសន្តិសុខប្រចាំនៅបុរីគុជអាស៊ី ហើយមានតួនាទីមួយទៀត គឺជាមន្ត្រីកងរាជអាវុធលើផ្ទៃប្រទេស កាលពីវេលាម៉ោង៧ព្រលប់ ថ្ងៃទី១៤សីហា បាននាំបក្សពួកចំនួន៣នាក់ មានកាំភ្លើង៣ដើម កាំភ្លើងខ្លី២ដើម និងកាំភ្លើងអាកា៤៧ មួយដើមមកចូលក្នុងរោងសំរាករបស់កម្មក ភ្ជង់វាយជនរងគ្រោះ គ្រាន់តែរឿងប្អូនជនរងគ្រោះធ្វើឲ្យដួលម៉ូតូប្អូនរបស់ខ្លួនដែលជាបុគ្គលិកសន្តិសុខនៅទីនោះ ដោយពុំបានសួរនាំរកហេតុផលអ្វីទាល់តែសោះ ។
ដោយឡែក បើយោងតាមប្រភពស្ត្រីឈ្មោះ តេង ស្រីខូច ត្រូវជាប្រពន្ឋជនរងគ្រោះបានអះអាងថា ប្តីរបស់គាត់ដែលត្រូវមេសន្តិសុខវាយឲ្យរងរបួសធ្ងន់នោះមានឈ្មោះ ឃឿន សារិន អាយុ២៨ឆ្នាំ មានមុខរបរជាមេការសំណង់ ។ នៅថ្ងៃកើតហេតុជាថ្ងៃអាទិត្យ ក្រុមកម្មករទាំងអស់ត្រូវឈប់សំរាក នៅវេលាម៉ោងប្រហែលជា៥ល្ងាច ប្អូនថ្លៃរបស់គាត់បានទៅលេងបាល់ទះជាមួយក្រុមសន្តិសុខ ហើយបានធ្វើឲ្យដួលម៉ូតូប្អូនរបស់ឈ្មោះព្រះខ័ណ្ឌរាជ្យ ទើបមានទំនាស់ពាក្យសំដីនឹងគ្នាបន្តិចបន្តួច ហើយក៏បានបែកផ្លូវគ្នារៀងៗខ្លួន រហូតដល់វេលាម៉ោងជិត៧ព្រលប់ ស្រាប់តែឃើញឈ្មោះព្រះខ័ណ្ឌរាជ្យបាននាំបក្សពួក រួមជាមួយកាំភ្លើងគ្រប់ដៃចូលមកស្រែកសួរថា អាណាធ្វើឲ្យម៉ូតូប្អូនអញដួល នៅពេលនោះប្តីរបស់គាត់ដែលកំពុងអង្គុយផឹកនៅទីនោះក៏បានឆ្លើយថា បងមានរឿងអីនិយាយគ្នាសិនទៅ រឿងក្មេងៗទុកឲ្យក្មេងៗជាអ្នកដោះស្រាយទៅ ភ្លាមនោះស្រាប់តែឈ្មោះព្រះខ័ណ្ឌរាជ្យ បានយកកាំភ្លើងអាកា៤៧មកភ្ជង់ និងវាយប្តីរបស់គាត់ជាច្រើនស្វាយកាំភ្លើង បណ្ដាលឲ្យប្តីរបស់គាត់រងរបួសធ្ងន់ បញ្ជូនទៅកាន់គ្លីនិកឯកជនភ្លាមៗ បន្ទាប់មកក៏មានសមត្ថកិច្ចមកដល់ឃាត់ខ្លួនឈ្មោះព្រះខ័ណ្ឌរាជ្យតែម្តង ។
ដោយឡែកភាគីឈ្មោះព្រះខ័ណ្ឌរាជ្យ យើងនៅពុំទាន់អាចសុំការបំភ្លឺបាននៅឡើយទេ ព្រោះ ដោយសារពេលយប់ ហើយម្យ៉ាងទៀតកំពុងត្រូវបានសមត្ថកិច្ចកងរាជអាវុធហត្ថនាំខ្លួនយកទៅសាកសួរនៅឯទីបញ្ជាការដ្ឋានកងរាជអាវុធហត្ថខេត្ត ៕
ចែករំលែកព័តមាននេះ