នាពេលថ្មីៗនេះ គម្រោងបុរីមហាសែនសុខ ដែលជាគម្រោងបុរីធំជាងគេរបស់ក្រុមហ៊ុនជប៉ុនកំពុងទទួលបានចំណាប់អារម្មណ៍ខ្លាំងពីសំណាក់អតិថិជន ខណៈដែលគម្រោងនេះ មានទីតាំងចម្ងាយត្រឹមតែ៣គីឡូម៉ែត្រ ពីអាកាសយានដ្ឋានអន្តរជាតិភ្នំពេញស្ថិតក្នុងសង្កាត់ក្រាំងធ្នង់ ខណ្ឌសែនសុខ ដែលជាតំបន់អភិវឌ្ឍលឿន និងផ្តល់ភាពងាយស្រួលក្នុងការរស់នៅ និងមិននៅឆ្ងាយពីគម្រោងផ្សារទំនើប ឡាយអនម៉ល និងគម្រោងផ្សារទំនើប អ៊ីអនម៉ល២។
គម្រោងបុរីមហាសែនសុខ មានផ្ទែដីសរុបទំហំ១២០.៦៨៤ម៉ែត្រក្រឡា និងមានផ្ទះសរុបចំនួន៦៨៣ ដែលមានប្រភេទជាផ្ទះល្វែងមួយជាន់ E0 និងប្រភេទផ្ទះល្វែងពីរជាន់ E0, E1 ហើយក៏មានជាប្រភេទដីឡូតិ៍វីឡា។ នៅក្នុងគម្រោងបុរីក៏មានបំពាក់ភ្លើងបំភ្លឺផ្លូវប្រើដោយប្រព័ន្ធសូឡា សួនផ្កា សួនច្បារ សួនកុមារ កន្លែងហាត់ប្រាណសាធារណៈ ផ្លូវម៉ាស្សាបាតជើង និងផ្លូវក្រាលបន្ទះឈើតាមបែបជប៉ុន រួមទាំងមានកញ្ជុះអង្គុយលេងថែមទៀតផង។
ត្រឹមតែរយៈពេលបួនខែ បន្ទាប់ពីការបើកលក់គម្រោងបុរីមហាសែនសុខ បានលក់អស់ប្រមាណជា៨០% នៃដំណាក់កាលទីមួយ របស់ខ្លួន ដោយសារតែតម្លៃផ្ទះមានតម្លៃចាប់ពី៤៩.៥០០ដុល្លារតែប៉ុណ្ណោះ និងការបង់ប្រាក់មានភាពងាយស្រួល រួមទាំងអតិថិជនអាចបង់រំលស់បានថែមទៀតផង។ ទាំងអស់នេះជាកម្លាំងចលករដ៏ខ្លាំងក្នុងការជំរុញសន្ទុះការលក់។ បច្ចុប្បន្នគម្រោងបុរីកំពុងធ្វើការសាងសង់ និងរៀបចំប្រព័ន្ធផ្លូវ និងលូបង្ហូរទឹក។
យោងតាមប្រសាសន៍របស់លោកស្រី ចេង សុខា ដែលជាជំនួយការអគ្គនាយកផ្នែកលក់ និងទីផ្សារបានឱ្យដឹងថា គម្រោងបុរីមហាសែនសុខ បានទទួលការចាប់អារម្មណ៍ច្រើនពីអតិថិជនក៏ដោយសារតែអតិថិជនជឿជាក់ទៅលើបុរីដែលជាគម្រោងធំរបស់អ្នកវិនិយោគជប៉ុនដែលមានអាជ្ញាប័ណ្ណអភិវឌ្ឍ និងឯកសារផ្លូវច្បាប់គ្រប់គ្រាន់។ រាល់គុណភាពសំណង់ត្រូវបានត្រួតពិនិត្យដោយវិស្វករជនជាតិជប៉ុន។
គួរបញ្ជាក់ផងដែរថា គម្រោងបុរីមហាសែនសុខ ជាគម្រោងទីពីរ របស់ក្រុមហ៊ុនវិនិយោគជប៉ុន គ្រីដគ្រុប ដែលបានបោះទុនវិនិយោគក្នុងប្រទេសកម្ពុជា ហើយគម្រោងទីមួយនោះ គឺគម្រោងខុនដូបូដាយជូរេស៊ីដិនស៍ ដែលមានទីតាំងតាមបណ្តោយផ្លូវសហព័ន្ធរុស្សី និងទល់មុខអាកាសយានដ្ឋានអន្តរជាតិភ្នំពេញ។
សព្វថ្ងៃគ្រីដគ្រុបមានមូលដ្ឋានធំនៅប្រទេសជប៉ុន និងបានធ្វើការវិនិយោគនៅបណា្តប្រទេសនានាផ្សេងទៀត ក្រៅពីប្រទេសកម្ពុជា ដូចជាប្រទេសវៀតណាម ប្រទេសបង់ក្លាដេស ប្រទេសម៉ាឡេស៊ី ប្រទេសជប៉ុន និងប្រទេសសិង្ហបុរី៕
ចែករំលែកព័តមាននេះ