ឆ្នាំ១៨២១
-ក្នុងអំឡុងសង្គ្រាមទាមទារឯករាជ្យរបស់ប្រទេសក្រិចចេញពីទួរគី មានការ ប្រយុទ្ធគ្នានៅតំបន់ក្រាវីយ៉ា ដោយខាង ប្រទេសក្រិចមានអ្នកប្រយុទ្ធ១២០នាក់ ហើយបានយកជ័យជំនះលើទ័ពទួរគីដែល មានចំនួន៩.០០០នាក់ ។ ក្នុងការប្រយុទ្ធនេះ កងទ័ពទួរគីស្លាប់៣០០នាក់ និងរបួស៨០០នាក់ ចំណែកទ័ពក្រិចស្លាប់តែ៦នាក់ប៉ុណ្ណោះ ។
ឆ្នាំ១៨២៨
-លោក Jean Henry Dunant ជនជាតិស្វ៊ីសជាអ្នកជំនួញ និងសកម្មជនសង្គម ហើយលោកជាអ្នកបង្កើតគណៈកម្មការអន្ដរជាតិកាកបាទក្រហមនៅឆ្នាំ១៨៦៣ ។ លោកជាសាក្សីផ្ទាល់ភ្នែកនៃការប្រយុទ្ធគ្នានៅតំបន់ Solferino ប្រទេសអ៊ីតាលីរវាងកងទ័ព ប្រទេសបារាំង និងកងទ័ពប្រទេសអូទ្រីស ដែលបណ្ដាលឱ្យស្លាប់របួស និងបាត់ខ្លួនសរុប ចំនួន៣៧.០០០នាក់។ លោកបានសរសេរសៀវភៅមួយក្បាលមានចំណងជើងថា A Memory of Solferinoហើយក៏នាំឱ្យបង្កើតនូវអង្គការកាកបាទក្រហមឡើង ។ លោកបានស្លាប់នៅឆ្នាំ១៩១០ ក្នុងអាយុ៨២ឆ្នាំ ហើយឆ្នាំ១៩០១លោកទទួលបានរង្វាន់ណូបែលសន្ដិភាព ។
ឆ្នាំ១៨៨៦
-លោកចនស្ទីត ផេមបឺតុន បានរកឃើញការបង្កើតភេសជ្ជៈមួយប្រភេទដែលក្រោយមកគេឱ្យឈ្មោះថា កូកាកូឡា ។ លោកជាជនជាតិអាមេរិក ។
ឆ្នាំ១៨៩៨
-ក្របខណ្ឌបាល់ទាត់អ៊ីតាលីបានចាប់ផ្ដើមលេងជាលើកទី១របស់ខ្លួន។
ឆ្នាំ១៩០២
-ភ្នំភ្លើងប៉េឡេ ក្នុងប្រទេសបារាំងបានផ្ទុះឡើង ហើយបានបំផ្លាញទីក្រុង Saint Pierre ដោយសំលាប់មនុស្សជាង៣០.០០០នាក់ ។
ឆ្នាំ១៩២៧
-អ្នកបើកបរយន្ដហោះបារាំងដ៏ពូកែក្នុងអំឡុងសង្គ្រាមលោកលើកទី១ ឈ្មោះឆាល នុនហ្កេសសេ និងលោកហ្វ្រង់ស្វ័រកូលី បានបាត់ខ្លួននៅទីក្រុងប៉ារីស ពេលដែលពួកលោកត្រៀមធ្វើការហោះហើរជុំវិញពិភពលោក ដោយឥតឈប់សំរាក ។ ក្រោយមកគេបាន ឮដំណឹងថា ពួកលោកទាំង២នៅប្រទេសអៀរឡង់ និងក្រោយមកទៀតក៏បាត់ដំណឹងសូន្យឈឹង ។
ឆ្នាំ១៩៣៣
-មហាត្មៈគន្ធី បានចាប់ផ្ដើមការធ្វើបាតុកម្មរយៈពេល២១ថ្ងៃប្រឆាំងការជិះជាន់របស់ចក្រភពអង់គ្លេសមកលើប្រទេស ឥណ្ឌា។
ឆ្នាំ១៩៤២
-ក្នុងសង្គ្រាមលោកលើកទី២ ការប្រយុទ្ធគ្នានៅសមុទ្រកូរ៉ាល រវាងកងទ័ពប្រទេសជប៉ុន និងកងទ័ពសហរដ្ឋអាមេរិកបានបញ្ចប់ ដោយកងទ័ពអាមេរិកស្លាប់៦៥៦នាក់ និងខូចខាតយន្ដហោះនាវាចំបាំងយ៉ាងច្រើន ឯកងទ័ពជប៉ុនស្លាប់៩៦៦នាក់ ។
ឆ្នាំ១៩៤៥
-ប្រជាពលរដ្ឋអាល់ហ្សេរីជាច្រើនរយនាក់ ត្រូវកងទ័ពប្រទេសបារាំងសំលាប់នៅតំបន់សេទីហ្វ ខណៈប្រទេសនេះជាដែនដី អាណានិគមនិយមរបស់ខ្លួន ។
–V-E Day ឬថ្ងៃជ័យជំនះនៅអឺរ៉ុបដែលមានន័យថា បញ្ចប់ការប្រយុទ្ធគ្នានៅតំបន់អឺរ៉ុបទាំងមូល ក្រោយពីកងទ័ពអាល្លឺម៉ង់ យល់ព្រមចុះចាញ់ដោយឥតលក្ខខណ្ឌនៅក្នុងទីក្រុងរ៉េម ប្រទេសបារាំងមក ។ ប្រជាជននៅទ្វីបអឺរ៉ុបទាំងមូលនាំគ្នាអបអរសាទរចំពោះជ័យជំនះនេះ ។
ឆ្នាំ១៩៦៣
-កងទ័ពកាន់សាសនាកាតូលិករបស់ លោកប្រធានាធិបតីវៀតណាមខាងត្បូង ង៉ោ ឌិនយៀម បានបាញ់កាំភ្លើងទៅលើព្រះសង្ឃ ដែលទាមទារសិទ្ធិស្មើគ្នាខាងសាសនា និងប្រឆាំងការរើសអើងពីអ្នកកាន់សាសនាកាតូលិក ក្នុងឱកាសបុណ្យវិសាខបូជា។ ការបាញ់ប្រហារនេះ ធ្វើឱ្យព្រះសង្ឃ៩អង្គអនិច្ចធម្មក្នុងចំណោមព្រះសង្ឃដែលបានចូលរួមប្រមាណ៦.០០០អង្គ ។
ឆ្នាំ១៩៦៧
-ខេត្ដមួយរបស់ប្រទេសហ្វ៉ីលីពីន ឈ្មោះ ដាវ៉ៅ បានបែកចេញជា៣ គឺខេត្ដដាវ៉ៅ ដេល ន័រតេ ខេត្ដដាវ៉ៅ ដេលសួរ និងខេត្ដដាវ៉ៅ អូរេនថល។
ឆ្នាំ១៩៧០
-មានការប៉ះទង្គិចគ្នារវាងក្រុមកម្មករ ប្រមាណ២០០នាក់ជាមួយក្រុមនិស្សិតប្រមាណ១.០០០នាក់ក្នុងទីក្រុងញូវយ៉ក ដែលធ្វើបាតុកម្មប្រឆាំងការធ្វើសង្គ្រាមនៅវៀតណាម។ ការប៉ះទង្គិចគ្នានេះ បណ្ដាលឱ្យមានអ្នករបួស៧០នាក់ ។
ឆ្នាំ១៩៧២
-លោកប្រធានាធិបតីអាមេរិក រីឆាត និចសុន បានបញ្ជាឱ្យដាក់គ្រាប់បែកឱ្យបានច្រើននៅតាមកំពង់ផែវៀតណាមខាងត្បូង ដើម្បីកុំឱ្យមានការហូរចូលនូវអាវុធ និងរបស់របរនានារបស់ពួកវៀតណាមខាងជើង ។
ឆ្នាំ១៩៩៩
-នាងណង់ស៊ី ម៉ាស បានក្លាយជាស្ដ្រីទី១ ដែលបញ្ចប់ការសិក្សានៅសាលាយោធាកាតា ដែលសហរដ្ឋអាមេរិក ។
ឆ្នាំ២០០៥
-ប្រធានាធិបតីអាល់ហ្សេរី លោកអាប់ដេឡាហ្ស៊ីស ប៊ូតេហ្វ្លីកា ទាមទារឱ្យបារាំងសារភាពពីការសំលាប់យ៉ាងរង្គាលប្រជាជន របស់ខ្លួនប្រមាណ៤៥.០០០នាក់ពេលទាមទារឯករាជ្យចំពេលដែលនៅទ្វីបអឺរ៉ុបអបអរសាទរជ័យជំនះលើពួកណាហ្ស៊ីអាល្លឺម៉ង់ ។
ឆ្នាំ២០០៩
-យ៉ាងហោចណាស់មានមនុស្សប្រមាណ៤៥.០០០នាក់បានភៀសខ្លួនចេញពីសង្គ្រាមរវាងរដ្ឋាភិបាលប៉ាគីស្ថាន និងពួកតាលីបង់ ដែលចេះតែបន្ដនៅតាមព្រំដែនអាហ្វហ្គានីស្ថាន ។
-មានភ្លើងឆេះព្រៃនៅក្នុងរដ្ឋកាលីហ្វ័រនីញ៉ា សហរដ្ឋអាមេរិកបណ្ដាលឱ្យត្រូវ ជំលៀសប្រជាជនប្រមាណ៣០.០០០នាក់ ចេញពីតំបន់ដែលរងគ្រោះ ៕
ចែករំលែកព័តមាននេះ