ខេត្តក្រចេះ ៖ ពលរដ្ឋនៅឃុំរលួស ស្រុកសំបូរខេត្តក្រចេះបានលើកគ្នាទៅតវ៉ា និងដាក់លិខិតទៅតំណាងរាស្រ្តខេត្តក្រចេះ ដើម្បីស្នើសុំអោយជួយពិនិត្យលើមន្រ្តីរដ្ឋបាលព្រៃឈើដែលឈរជើងប្រចាំការនៅឃុំរលួសអោយចេញពីតំណែង ដោយសារពួកគាត់ចោទលោកនាយសង្កាត់រូបនោះថា «បានចាប់រឹបអូសរណារយន្តពួកគាត់គ្រាន់កាត់កូនឈើតាមចំការ និងក្បាលស្រែយកមកលក់ ដើម្បីបានកម្រៃដោះស្រាយប្រចាំថ្ងៃ» ។
ការស្នើសុំដកលោកនាយសង្កាត់រូបនេះ បានធ្វើឡើងតាមលិខិតអមដោយមេដៃពលរដ្ឋច្រើននាក់ជាតំណាង ដោយមានចុះថ្ងៃទី១២ មករា ឆ្នាំ២០២២ ។ ក្នុងលិខិតបណ្តឹងនោះដែរ ពលរដ្ឋបានចោទប្រកាន់លោកនាយសង្កាត់ត្រូវបានបង្ហាញឈ្មោះចំៗថា លោក តែ រី ហើយរូបលោកបានបញ្ជាអោយកូនចៅដើរប្រមូលលុយចាប់ពី៣០ម៉ឺនរៀល ទៅ៤០ម៉ឺនរៀល ក្នុង១គោយន្តកន្រ្តៃប្រសិនបើពួកគេរត់ការប្រាប់មុន តែបើមិនបានរត់ការបើកផ្លូវមុនទេគឺត្រូវបង់រហូតដល់ទៅ១លានរៀលទៅ២លានរៀលករណីចាប់បាន ។
ជាមួយនិងការចោទប្រកាន់ពីសំណាក់ពលរដ្ឋបែបនេះ ត្រូវបានលោក តែ រី ប្រាប់បណ្ដាលសារព័ត៏មានកាលពីល្ងាចថ្ងៃទី០៣ ខែមីនា ឆ្នាំ២០២២ នេះថា ការចាប់រណាយន្តមករក្សាទុកនៅកន្លែងរដ្ឋបាលព្រៃឈើដោយសារក្រុមពលរដ្ឋមួយចំនួនបាននាំគ្នាទៅកាប់រុករានទន្ទ្រានយកដីព្រៃសហគមន៍ ទើបយើងចាត់វិធានការតាមផ្លូវច្បាប់ ដោយការចុះនោះ មានការសហការជាមួយសហគមន៍ព្រៃឈើ និងអាជ្ញាធរមានសមត្ថកិច្ចផងដែរ ។
ដោយឡែក ការចោទប្រកាន់ខាងលើថា ជំនាញទារលុយជាថ្នូរនិងការដឹកផលអនុផលព្រៃឈើមិនមែនជាការពិតឡើយ។ ចំពោះបញ្ហាដឹកជញ្ជូនផលព្រៃឈើចេញពីតំបន់ឃុំរលួសកើតឡើងយូរយាណាស់មកហើយ ដោយបង្រ្កាបមិនចេះអស់ ជាពិសេស បទល្មើសដឹកជញ្ជូនឈើ សិប្បកម្មកែឆ្នៃឈើយ៉ាងអនាធិបតេយ្យ និងការកាប់រានដីព្រៃយកធ្វើកម្មសិទ្ធិខុសច្បាប់ ដោយការបង្រ្កាបហាក់យឺតយ៉ាវមិនទាន់ពេលវេលា ។
គួរបញ្ជាក់ថា ការបែកធ្លាយព័ត៌មានខាងលើ ស្របពេលពលរដ្ឋលើកគ្នាតវ៉ាសម្រុកចូលយកម៉ាស៊ីនរណារយន្តដែលជំនាញមេព្រៃចាប់ទុកកាលពីពេលថ្មីៗកន្លងទៅ៕
ចែករំលែកព័តមាននេះ