ខេត្តត្បូងឃ្មុំ ៖ «សព្វថ្ងៃម្ហូមអាហារដែលមានតម្លៃថោក ត្រូវបានក្រុមឈ្មួញនាំចូលមកពីវៀតណាម និងថៃ ដែលផ្ទុកទៅដោយសារធាតុគីមីច្រើន ដែលធ្វើឲ្យសុខភាពទ្រុឌទ្រោម» ។ នេះជាប្រសាសន៍លើកឡើងរបស់លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ថ្លែងកាលពីព្រឹកថ្ងៃទី១៣ សីហា ២០១៦ ក្នុងឱកាសដាក់ឱ្យប្រើប្រាស់នូវឡជីវឧស្ម័នទី២៥.០០០ ស្ថិតនៅភូមិពង្រ ឃុំនាងទើត ស្រុកតំបែរ ដោយមានការចូលរួមពីសំណាក់ប្រជាពលរដ្ឋ និងកសិករច្រើន ព្រមទាំងអាជ្ញាពាក់ព័ន្ធ ។
លោកហេង ពិសិដ្ឋ ប្រធានមន្ទីរកសិកម្មខេត្តបានថ្លែងឱ្យដឹងថា ខេត្តត្បូងឃ្មុំមានឡជីវឧស្ម័ន៩៥០ឡ ក្នុងនោះសាងសង់ដោយកម្មវិធីឡជីវឧស្ម័នខេត្តកំពង់ចាមមាន៧៨៥ឡ និងឡជីវឧស្ម័នសាងសង់ ដោយកម្មវិធីឡជីវឧស្ម័នខេត្តត្បូងឃ្មុំមាន១៦៥ឡ ។ ការរីកចម្រើននូវហេដ្ឋារចនាសម្ព័ន្ធផ្លូវថ្នល់ បណ្តាញអគ្គិសនី ដែលមានដល់ទីជនបទ ប្រជាកសិករមួយចំនួនបានគៀងគរ សាងសង់ឡជីវឧស្ម័នមិនបានគ្រប់តាមផែនការកំណត់ ។
លោកឪម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ បានថ្លែងឲ្យដឹងថា កាលពីមុន លាមកសត្វ ពិសេសលាមកគោ និងជ្រូក ហាក់ដូចជាមិនសូវមានតម្លៃនោះទេ ហើយត្រូវបានចោលពាលវាលពាសកាល ជះក្លិនមិនល្អឲ្យខូចបរិស្ថាន។ ឥឡូវលាមទាំងនេះ ត្រូវបានបង្កើតទៅជាឧស្ម័នបញ្ឆេះ សំរាប់ចំអិនអាហារដុតបំភ្លឺ និងបនាជីធម្មជាតិទៀតផង ។
លោកប្រាជ្ញ ចន្ទ អភិបាលខេត្តថ្លែងឲ្យដឹងថា នាពេលនេះពិតជាកិត្តិយសសម្រាប់ខេត្តត្បូងឃ្មុំ និងជាព្រឹត្តិការណ៏ដ៏មានតម្លៃផ្សារភ្ជាប់រវាងការដាំដុះដំណាំទៅនិងបច្ចេកទេសកែច្នៃឋាមពលកកើតឡើងវិញ និងជាការលើកកម្ពស់ការយល់ដឹងជាធារណៈ អំពីគុណប្រយោជន៏នៃការប្រើប្រាស់ឡជីវឧស្ម័ន សម្រាប់ផលិតកម្មដំណាំ ការជួយជម្រុញការលូតលាស់ដំណាំ និងផ្តល់នូវទិន្នផលបានល្អនិងមួយផ្នែកទៀតឡជីវឧស្ម័នអាចផ្តល់ជាឋាមពលសម្រាប់ចម្អិនអាហារ និងជាចលករជំរុញឲ្យមាននិរន្តភាពក្នុងការចិញ្ចឹមសត្វដែលមានគុណភាព និងសុវត្ថិភាពផងដែរ ។
ចែករំលែកព័តមាននេះ