រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក សេង លាង កាលពីវេលាម៉ោង៨និង៣០នាទីព្រឹកថ្ងៃទី១២ ខែសីហា បានបង្គាប់ឲ្យអនុរក្សពន្ធនាគារព្រៃសនាំខ្លួនឃាតករឈ្មោះ ជួប សម្លា.ប់
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក សេង លាង កាលពីវេលាម៉ោង៨និង៣០នាទីព្រឹកថ្ងៃទី១២ ខែសីហា បានបង្គាប់ឲ្យអនុរក្សពន្ធនាគារព្រៃសនាំខ្លួនឃាតករឈ្មោះ ជួប សម្លាប់ មកធ្វើការសាកសួរបន្ថែមក្នុងសំណុំរឿងបាញ់សម្លាប់លោកបណ្ឌិត កែម ឡី កាលពីថ្ងៃទី១០ កក្កដា កន្លងមក ប្រយោជន៍ដើម្បីរកភ័ស្តុតាងឲ្យបានរឹងមាំសម្រាប់ដាក់បន្ទុកលើជនត្រូវចោទរូបនេះទៅតាមនីតិវិធី ។
ក្នុងទឹកមុខស្លេកស្លាំង រាងកាយស្គមស្គាំងបន្តិច ឃាតករ ជួប សម្លាប់ ដែលមានឈ្មោះពិត អឿត អាង ត្រូវបានអនុរក្សពន្ធនាគារព្រៃសដឹកតាមរថយន្តឡង់គ្រីស្ស័រមួយគ្រឿង គឺមិនបានជិះរថយន្តទ្រុងដូចអ្នកទោសដទៃនោះទេ បានបើកចូលដល់ជណ្តើរសាលាដំបូងតែម្តង ។ បន្ទាប់មក ត្រូវបានអនុរក្សពន្ធនាគារនាំចេញពីរថយន្តយ៉ាងប្រញាប់ប្រញាល់ឡើងទៅកាន់បន្ទប់លោកចៅក្រមស៊ើបសួរ ហាក់ដូចជាខ្លាចអ្នកកាសែតថតរូប ខណៈឃាតកររូបនេះគឺជាជនដែលមហាជនថ្កោលទោសជាប្រវត្តិសាស្ត្ររួចទៅហើយនោះ ។
ការសាកសួរបន្ថែមលើជនសង្ស័យឈ្មោះ ជួប សម្លាប់ ត្រូវបានចៅក្រមស៊ើបសួរចំណាយពេលអស់មួយព្រឹក រហូតដល់ម៉ោង១២ថ្ងៃត្រង់ទើបបញ្ចប់ និងបានតម្រូវឲ្យអនុរក្សពន្ធនាគារព្រៃសនាំទៅឃុំខ្លួនបណ្តោះអាសន្នវិញ ។ ដោយដៃជាប់ខ្នោះនិងទឹកមុខស្លេកស្លាំងនោះ ពេលអនុរក្សពន្ធនាគារនាំចូលរថយន្ត ជនឈ្មោះ ជួប សម្លាប់ មិនឆ្លើយទៅនឹងសំណួររបស់អ្នកសារព័ត៌មានទេ ជាមួយនឹងការការពារយ៉ាងយកចិត្តទុកដាក់ពីសំណាក់អនុរក្សពន្ធនាគារផង ។
ចំពោះលទ្ធផលនៃការសាកសួរ ត្រូវបានលោក លី សុផាន់ណា ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញផ្តល់ព័ត៌មានតាមតេឡេក្រាមថា ចៅក្រមស៊ើបសួរបានសួរចម្លើយបន្ថែមលើជនត្រូវចោទឈ្មោះ ជួប សម្លាប់ និងបានពិនិត្យលើភ័ស្តុតាងនានា ហើយនឹងបន្តចំណាត់ការស៊ើបសួរនៅក្នុងរឿងក្តីនេះបន្ថែមទៀត ។
គួរបញ្ជាក់ថា ចៅក្រមសាលាដំបូងរាជធានីភ្នំពេញ កាលពីល្ងាចថ្ងៃទី១៣ ខែកក្កដា ឆ្នាំ២០១៦ បានចេញដីកាសម្រេចឃុំខ្លួនឃាតករឈ្មោះ ជួប សម្លាប់ ដាក់ពន្ធនាគារជាបណ្តោះអាសន្នក្រោមការចោទប្រកាន់ពីបទឃាតកម្មគិតទុកជាមុន យោងតាមមាត្រា២០០នៃក្រមព្រហ្មទណ្ឌ និងបទប្រើប្រាស់អាវុធដោយគ្មានច្បាប់អនុញ្ញាតតាមមាត្រា៤៩០ នៃច្បាប់ស្តីពីការគ្រប់គ្រងអាវុធជាតិផ្ទុះ ។ ជនជាប់ចោទត្រូវបានបញ្ជូនទៅកាន់ពន្ធនាគារព្រៃស នាវេលាម៉ោង៥ល្ងាច ក្រោមកិច្ចការពារសន្តិសុខយ៉ាងរឹងមាំពីសំណាក់កងកម្លាំងងនគរបាលព្រហ្មទណ្ឌរាជធានីភ្នំពេញ ។
មានការកត់សម្គាល់ថា តំណាងអយ្យការអមសាលាដំបូងរាជធានី បានសម្រេចចោទប្រកាន់ក្នុងបទល្មើសឃាតកម្មគិតទុកជាមុននេះទៅលើឈ្មោះ ជួប សម្លាប់ មិនមែនចោទប្រកាន់ឈ្មោះ អឿត អាង ដូចដែលបានស្រាវជ្រាវឈ្មោះដល់ផ្ទះជននេះទេ ។ ចំណែកជនជាឃាតករនេះនៅតែរក្សាជំហរថា ខ្លួនពិតជាជនដៃដល់បានបាញ់សម្លាប់លោកបណ្ឌិត កែម ឡី អ្នកវិភាគឯករាជ្យកាលពីព្រឹកថ្ងៃទី១០ ខែកក្កដា ឆ្នាំ២០១៦ នៅក្នុងស្តារ៍ម៉ាតស្ថានីយប្រេងឥន្ធនៈកាល់តិចកែងស្តុបបូកគោ ក្នុងសង្កាត់ទន្លេបាសាក់ ខណ្ឌចំការមន ប្រាកដមែន ។
ការបាញ់សម្លាប់លោកបណ្ឌិត កែម ឡី នោះ គឺខ្លួនប្រើអាវុធខ្លីម៉ាកឡុក និងបាញ់២គ្រាប់លើជនរងគ្រោះដែលកំពុងអង្គុយនៅតុកាហ្វេ ដោយមូលហេតុលោកបណ្ឌិត កែម ឡី ជំពាក់ប្រាក់ខ្លួន(ជួប សម្លាប់)ចំនួន ៣.០០០ដុល្លារអាមេរិកមិនព្រមសង ។ ការប្រកាន់ជំហរពីមូលហេតុបាញ់សម្លាប់នេះ ត្រូវបានសាធារណមតិច្រានចោលជាទូទៅ ហើយអ្វីដែលកាត់តែច្បាស់ទៀតនោះ គឺការអះអាងរបស់ប្រពន្ធជននេះនៅឯខេត្តសៀមរាបក៏បានបង្ហាញថា អឿត អាង ដែលក្លែងឈ្មោះថា ជួប សម្លាប់ នេះនិយាយប្រៀបដូចជាសត្វសេកតែប៉ុណ្ណោះ ។ ក្រោយពេលបាញ់សម្លាប់ហើយ ជនសង្ស័យបានរត់គេចខ្លួនតាមបណ្តោយមហាវិថីម៉ៅសេទុងទៅផ្លូវសុធារស រហូតដល់ក្បែរវត្តស្វាយពពែ ទើបត្រូវបានសមត្ថកិច្ចចាប់ខ្លួន ។
សំណុំរឿងឃាតកម្មលើលោកបណ្ឌិត កែមឡី សមត្ថកិច្ចមិនទាន់បានរកឃើញអ្នកពាក់ព័ន្ធផ្សេងទៀតនៅឡើយទេ ក្នុងរយៈពេលជាង១ខែកន្លងមកនេះ ។ ទោះបីជាយ៉ាងនេះក្ដីសាធារណមតិខ្លះបានលើកឡើងថា ដើម្បីឲ្យការស៊ើបអង្កេតកាត់តែស៊ីជម្រៅ គប្បីហៅមនុស្សមួយចំនួនដែលជាសាក្សីជុំវិញហេតុការណ៍នោះមកសាកសួរ។
មនុស្សមួយចំនួនដែលអាចហៅមកសាកសួរ គឺបុគ្គលិកបម្រើការងារនៅក្នុងស្តារ៍ម៉ាតកាល់តិច (Star Mart, Caltex) អ្នកចូលផឹកកាហ្វេក្នុងម៉ាតដែលឃើញសកម្មភាពបាញ់ ក្រុមគ្រួសារជនសង្ស័យឈ្មោះ ជួប សម្លាប់ នៅខេត្តសៀមរាប និងអ្នកដែលផ្ដល់កន្លែងស្នាក់នៅឲ្យ ជួប សម្លាប់ នៅរាជធានីភ្នំពេញ ការបញ្ចេញកាមេរ៉ាសុវត្ថិភាពនៅក្នុងស្តារម៉ាត និងកាំភ្លើងខ្លីទំនើបម៉ាកឡុកដែលជនសង្ស័យប្រើប្រាស់ថាតើកាំភ្លើងនោះនៅក្នុងស្ថាប័នណា? ឬក៏ជនសង្ស័យទិញពីណាមកជាដើម ?
តាមវិទ្យុអាស៊ីសេរីបានស្រង់សំដីលោកបណ្ឌិត ហ៊ាង ឫទ្ធី ដែលមានប្រសាសន៍ថា ត្រូវតែកោះហៅអ្នកពាក់ព័ន្ធទាំងអស់នេះមកសួរនាំ ពីព្រោះថាពួកគេទាំងនេះជាសាក្សី ឬជាអ្នកដឹងឮសំខាន់ក្នុងរឿងឃាតកម្មនេះ និងជាជំនួយដល់ដំណើរការស៊ើបអង្កេតរបស់សមត្ថកិច្ច និងតុលាការ ។
ថ្ងៃទី១០ ខែសីហា គឺជាខួប១ខែនៃការបាញ់សម្លាប់លោកបណ្ឌិត កែម ឡី នៅកណ្ដាលរាជធានីភ្នំពេញ ។ ក្នុងរយៈពេល១ខែមកនេះអ្វីដែលសាធារណជនលើកជាចម្ងល់នោះគឺ តើមូលហេតុអ្វីបានជាសមត្ថកិច្ចមិនបញ្ចេញជាសាធារណៈដើម្បីឲ្យមហាជនបានឃើញថា តើអ្នកណាជាឃាតករពិតប្រាកដ ?
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ បានថ្លែងប្រាប់អ្នកសារព័ត៌មានក្នុងសន្និសីទសារព័ត៌មាននៅព្រឹកថ្ងៃទី១១ ខែសីហា ថា មកទល់ពេលនេះសមត្ថកិច្ចមិនទាន់រកឃើញអ្នកជាប់ពាក់ព័ន្ធនឹងឃាតកម្មនេះផ្សេងទៀតទេ ក្រៅពី ជួប សម្លាប់ ។ លោកបញ្ជាក់ថា មូលហេតុសំខាន់គឺជនសង្ស័យរឹងរូសមិនឆ្លើយសារភាព៖ «ដល់សួរទៅគាត់មិនស្គាល់ប្រពន្ធ និងម្ដាយគាត់ទេ គាត់បដិសេធ រឹងរូសមែនទែន មិនសារភាពដោយសារអី ? ដោយសារច្បាប់យើងមិនអាចចាប់បង្ខំក្នុងការសារភាព ប្រហែលជាហៅសមមិត្ត ឌុច មកសួរទើបបាន»។
ខេត្តតាកែវ ៖ លោកបណ្ឌិត កែម ឡី ត្រូវបានឃាតករបាញ់សម្លាប់រយៈពេលជាង១ខែមកហើយ ហើយរហូតមកដល់ពេលនេះអ្នករួមគំនិតនិងមេខ្លោងនៅពីក្រោយខ្នង សមត្ថកិច្ចនៅតែរកមិនទាន់ឃើញនៅឡើយ ឯការឈឺចាប់របស់គ្រួសារនៅតែបន្តឥតស្រាកស្រាន្ត ។ ទោះជាបែបណាក៏ដោយ នៅផ្ទះលោកបណ្ឌិត កែម ឡី ក្នុងឃុំតាកុប ឃុំលាយបូរ ស្រុកត្រាំកក់ ដែលពេលនេះជាទីកន្លែងបញ្ចុះសពលោកនោះ ប្រជាពលរដ្ឋពីទីជិតឆ្ងាយនៅតែបន្តធ្វើដំណើរមកគោរពវិញ្ញាណក្ខន្ធនៅមុខផ្នូរបញ្ចុះសពលោកបណ្ឌិតមិនដែលអាក់ខានឡើយ ។
លោកយាយ ភោគ សេ អាយុ៧៦ឆ្នាំ ជាម្តាយបង្កើតរបស់លោកបណ្ឌិត កែម ឡី មានប្រសាសន៍ថា តាំងពីថ្ងៃបញ្ចុះសពកូនប្រុសរបស់គាត់រហូតមក គាត់បានសម្រានជាមួយកូនក្មួយនៅពីមុខផ្នូរបញ្ចុះសពកូនរហូត ។ ប៉ុន្តែចម្លែកព្រោះថា តាំងពីកូនប្រុសត្រូវគេបាញ់សម្លាប់រហូតមកដល់ពេលនេះ កូនគាត់មិនដែលឱ្យគាត់ជាម្តាយឬបងប្អូនយល់សុបិន្តឃើញម្តងណាឡើយ សូម្បីឱ្យខ្លាចក៏គ្មានដែរ ។
លោកយាយបានបន្តទៀតថា រាល់ថ្ងៃនេះមានប្រជាពលរដ្ឋយើងរស់នៅទីជិតឆ្ងាយនៅតែបន្តមកអុជធូបគោរពវិញ្ញាណក្ខន្ធនៅមុខផ្នូរបញ្ចុះសពកូនប្រុសគាត់ជាហូរហែ ។ ចំពោះពិធីបុណ្យគម្រប់ខួប១០០ថ្ងៃវិញ គាត់បានពិភាក្សាគ្នាជាមួយបងប្អូន ពិសេសកូនប្រសាស្រីរបស់គាត់ បើតាមគម្រោងយើងធ្វើបុណ្យគម្រប់១០០ថ្ងៃជូនវិញ្ញាណក្ខន្ធកូននៅថ្ងៃទី១០ ខែធ្នូ ២០១៦ (ចំថ្ងៃបុណ្យសិទ្ធិមនុស្ស) ខាងមុខនេះ ។
លោក ភោគ សំបូរ ដែលជាបងជីដូនមួយរបស់លោកបណ្ឌិត កែម ឡី បានឱ្យដឹងដែរថា ក្រោយពីពិធីបុណ្យគម្រប់ខួប១០០ថ្ងៃជូនវិញ្ញាណក្ខន្ធសពលោកបណ្ឌិត កែម ឡី រួច នៅក្នុងទីធ្លាផ្ទះ និងទីបញ្ចុះសពលោកបណ្ឌិត យើងមានគម្រោងសង់ជារូបសំណាកលោកបណ្ឌិតសង់បណ្ណាល័យដាក់ឯកសាររបស់លោកបណ្ឌិត និងធ្វើសួនច្បារ ដើម្បីជាសោភ័ណភាពមួយនៅពេលបងប្អូនមកមើលកន្លែងទីបញ្ចុះសពលោកបណ្ឌិត ។ ចំណែកផ្នូរវិញ យើងរៀបចំធ្វើចេតិយឱ្យស្អាតជូនលោកឱ្យបានល្អបំផុតតាមដែលអាចធ្វើទៅបាន ។
លោកសង្ឃឹមថា នៅថ្ងៃបុណ្យគម្រប់ខួប១០០ថ្ងៃខាងមុខនេះ នឹងមានបងប្អូនជិតឆ្ងាយមកចូលរួមយ៉ាងច្រើនកុះករជាក់ជាពុំខាន ៕
ចែករំលែកព័តមាននេះ