ខេត្តស្ទឹងត្រែង ៖ សំណង់ជាច្រើនល្វែងស្ថិតនៅលើផ្លូវទល់មុខសាលាចំការដូង ភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង បានសាងសង់រំលោភលើចិញ្ចើមផ្លូវសាធារណៈ អាជ្ញាធរក្រុងគួរតែអនុវត្តន៍វិធានការ ដើម្បីរក្សាសណ្តាប់ធ្នាប់ក្រុង អោយមានសោភណ្ឌភាព ។
យោងតាមមតិរបស់ពលរដ្ឋដែលបានរុះរើនិងកាត់សំយាបដែលលយលើចំណីផ្លូវសាធារណៈបានលើកឡើងថាអាជ្ញាធរក្រុងគួរពិនិត្យទៅលើសំណង់ជាច្រើនល្វែង ចាប់ពីផ្លូវបំបែកជាបួនទុកមុខសាលាចំការដូង ដែលបានសង់សំណង់រំលោភលើចិញ្ចើមផ្លូវ ជាពិសេសចំណុចផ្លូវកែង ដែលជាចំណុចកែងខ្លាំងងាយនិងគ្រោះ ។
មន្ត្រីនគរបាលសណ្តាប់ធ្នាប់ក្រុងបានទទួលស្គាល់ថា សំណង់ទាំងនោះ ពិតជាបានសង់រំលោភលើចិញ្ចើមផ្លូវសាធារណៈពិតប្រាកដមែន ហើយចំណុចផ្លូវកែងបំបែកជាបួននោះ វាពិតជាចំណុចដែលប្រជាពលរដ្ឋលោកធ្វើដំណើរបាំងមិនអាចមើលគ្នាឃើញ ហើយអាចប្រឈមគ្រោះថ្នាក់ពិតមែន ។ មន្ត្រីនគរបាលដដែលបន្តថា វាជាចំណុចដែលអាជ្ញាធរក្រុងគួរអនុវត្តឱ្យស្មើភាព ជាមួយសំណង់ប្រជាពលរដ្ឋដែលបានកាត់រុះរើ សំយាបតាម
ការណែនាំរបស់សាលាក្រុងនាពេលកន្លងមក ។
លោក ជា ហុកឡេង អភិបាលរងក្រុងទទួលបន្ទុកសណ្តាប់ធ្នាប់ក្រុងបានប្រាប់អោយដឹងថា សំណង់ខាងលើលោកបានចុះហាមឃាត់មិនឱ្យសាងសង់ ព្រោះរំលោភលើចំណីចិញ្ចើមផ្លូវសាធារណៈ ហើយម្ចាស់សំណង់នោះក៏បានសន្យាថានឹងរើសង់កន្លែងថ្មីវិញដែរ ។
ចែករំលែកព័តមាននេះ