រាជធានីភ្នំពេញ ៖ ក្រុមហ៊ុនស្មាតហ្វូន Huawei ដែលជាក្រុមហ៊ុនផ្តល់ដំណោះស្រាយផ្នែកព័ត៌មានវិទ្យា និងបច្ចេកវិទ្យា ទូរគមនាគមន៍ (ICT) ដ៏ធំឈានមុខគេ និងជាក្រុមហ៊ុនទូរស័ព្ទស្មាតហ្វូនលំដាប់លេខបី លើពិភពលោក បានចូលរួមឧបត្ថម្ភគាំទ្រក្នុងកម្មវិធីប្រគំតន្ត្រីសុបិន្តនៃក្តីស្រឡាញ់សម្រាប់អនាគតមូលនិធិសប្បុរសធម៌ ដើម្បីជួយមន្ទីរពេទ្យគន្ធបុប្ផា ដែលជាមន្ទីរពេទ្យសង្គ្រោះជីវិតកុមារកម្ពុជារាប់លាននាក់មកហើយ ។
កម្មវិធីនេះ ត្រូវបានប្រារព្ធឡើងចំនួនពីរថ្ងៃជាប់ៗគ្នា គឺនៅថ្ងៃទី៦ និងទី៧ សីហា ២០១៦ កន្លងមកនេះ នៅសាលមហោស្រពចតុមុខ ក្នុងគោលបំណងរៃអង្គាសថវិកា ដើម្បីលើកកម្ពស់វិស័យសុខុមាលភាពកុមារកម្ពុជា គឺមូលនិធិសប្បុរសធម៌ ដើម្បីមន្ទីរពេទ្យគន្ធបុប្ផា ។ គន្ធបុប្ផា គឺជាមន្ទីរពេទ្យដែលជួយព្យាបាល និងសង្គ្រោះជីវិតកុមារងាយរងគ្រោះ កុមារក្រីក្រ និងកុមារអនាថា ដោយឥតគិតថ្លៃ ។
កម្មវិធីប្រគំតន្ត្រី «សុបិន្តនៃក្តីស្រឡាញ់សម្រាប់អនាគត មូលនិធិសប្បុរសធម៌ ដើម្បីមន្ទីរពេទ្យគន្ធបុប្ផា» គឺរួមមានការសហការរវាងបណ្តាសប្បុរសជនកម្ពុជា សមាគមប្រទេសកូរ៉េ ក្រុមហ៊ុន Huawei រួមទាំងបណ្តាស្ថាប័នផ្សេងៗជាច្រើនទៀត។
លោក Jason នាយកគ្រប់គ្រង Huawei Mobile Device Department ប្រចាំប្រទេសកម្ពុជា ដែលបានចូល រួមជាអ្នកឧបត្ថម្ភក្នុងកម្មវិធីនេះ បានឲ្យដឹងថា មូលហេតុដែលក្រុមហ៊ុន Huawei របស់លោកចូលរួមគាំទ្រកម្មវិធីសប្បុរសមួយនេះ ដោយសារសម្លឹងឃើញពីការលំបាក និងតម្រូវការជំនួយជាចាំបាច់របស់កុមារងាយរងគ្រោះ និងកុមារទីទាល់ក្រកម្ពុជា ។ អាស្រ័យហេតុនេះ ទើបក្រុមហ៊ុន Huawei បរិច្ចាគថវិកាមួយចំណែកនៃប្រាក់ចំណេញរបស់ក្រុមហ៊ុន ដើម្បីចូលរួមជួយតន្ត្រីសប្បុរសធម៌ ក៏ដូចជាមន្ទីរពេទ្យគន្ធបុប្ផា និងកិច្ចការសង្គមផ្សេងៗជាច្រើនទៀត ។ លោកបន្តថា យើងចង់ឃើញស្នាមញញឹមរបស់កុមារទាំងអស់គ្នា! យើងចង់ឲ្យកុមារមានសុខភាពល្អ យើងនឹងនៅតែបន្តសកម្មភាពសប្បុរសធម៌របស់យើងជាមួយនឹងមូលនិធិ ដើម្បីមន្ទីរពេទ្យគន្ធបុប្ផា ។
ការប្រគំតន្ត្រីដ៏កម្រនេះ គឺមានវត្តមានកំពូលតារាចម្រៀងល្បីៗប្រចាំប្រទេសកម្ពុជា និងកូរ៉េ ដូចជា កញ្ញា មាស សុខសោភា ក្រុម DYNAMIC ក្រុមសម្តែង PAUL YOUTH និង ក្រុម PPL និង CHAKRABONA ដែលតម្លៃសំបុត្រចូលរួមទស្សនាក្នុងម្នាក់៥ដុល្លារ ។
កញ្ញា មាស សុខសោភា តារាចម្រៀងដ៏ល្បី និងជាឯកអគ្គរាជទូតសុឆន្ទៈរបស់ក្រុមហ៊ុន ស្មាតហ្វូន Huawei លើកឡើងថា «ក្នុងនាមនាងខ្ញុំជាតារាចម្រៀងម្នាក់ នាងខ្ញុំស្ម័គ្រចិត្តលះបង់ពេលវេលា និងថវិកាផ្ទាល់ខ្លួន ដើម្បីផ្តល់ស្នាមញញឹមដល់កុមារកម្ពុជា ជាពិសេសគឺកុមារដែលត្រូវការសង្គ្រោះជាចាំបាច់នៅមន្ទីរពេទ្យគន្ធបុប្ផា ចុះអ្នកវិញ?»។
ដោយឡែកយុវតី សុមាលី ស្រស់ វ័យ១៩ឆ្នាំ សិក្សានៅសាកលវិទ្យាល័យភូមិន្ទភ្នំពេញ បានឲ្យដឹងថា កញ្ញាបានចំណាយថវិកាផ្ទាល់ខ្លួនចំនួន៥ដុល្លារ សម្រាប់ថ្លៃសំបុត្រ ដើម្បីចូលរួមទស្សនាការប្រគំតន្ត្រីនេះ ក៏ដូចជា ចូលរួមបរិច្ចាគថវិកាផ្ទាល់ខ្លួនដល់មន្ទីរពេទ្យគន្ធបុប្ផាផងដែរ ។ «ខ្ញុំពិតជាមានអារម្មណ៍សប្បាយរីករាយមែនទែន ទោះបីចំនួននេះជាការរួមចំណែកដ៏តិចតួចក៏ដោយ ប៉ុន្តែវាជាអំពើល្អ និងចិត្តសប្បុរសរបស់នាងខ្ញុំ» ។ យើងរួមគ្នាធ្វើអំពើល្អទាំងអស់គ្នា ហើយចាប់ផ្តើមបរិច្ចាគអ្វីដែលអ្នកមានទៅដល់សង្គមវិញ ។
គួររំលឹកថា ថវិកាដែលទទួលបានពីការលក់សំបុត្រ និងបណ្តាសប្បុរសជន ក្រុមហ៊ុនស្ថាប័ននានា នឹងត្រូវ បូកសរុប ហើយនឹងយកថវិកាទាំងអស់នោះទៅជូនដល់មន្ទីរពេទ្យគន្ធបុប្ផា ។ សម្រាប់កាលបរិច្ឆេទនៃកម្មវិធីបរិច្ចាគ នឹងជម្រាបជូននៅពេលក្រោយ ៕
ចែករំលែកព័តមាននេះ