សហរដ្ឋអាមេរិកបានណែនាំកាលពីថ្ងៃទី៦ មីនា ដល់ពលរដ្ឋអាមេរិកឱ្យចាកចេញពីយេម៉ែន ដោយសារតែមានគ្រោះថ្នាក់ខ្ពស់ខាងបញ្ហាសន្តិសុខមកពីសកម្មភាពរបស់ពួកភេរវករ និងភាពវឹកវរសង្គម ។
អាជ្ញាធរយេម៉ែនបានរាយការណ៍នាថ្ងៃដដែលនោះពីការស្លាប់ប៉ូលិស៤នាក់ ក្នុងការពួនស្ទាក់វាយប្រហារមួយនាភាគខាងកើតក្រុងសាណាអា ដែលសង្ស័យថា ជាស្នាដៃរបស់អាល់កៃដានៅឧបទ្វីបអារ៉ាប់ ដែលសហរដ្ឋអាមេរិកជួយរដ្ឋាភិបាលយេម៉ែន ក្នុងការប្រយុទ្ធប្រឆាំងក្រុមនេះ ។ នៅទីក្រុង ZINDJIBAR ភាគខាងត្បូងប្រទេស នាយទាហានជាន់ខ្ពស់ខាងផ្នែកស៊ើបការណ៍ម្នាក់ត្រូវគេបាញ់ស្លាប់ ។ ក៏ប៉ុន្តែនាពេលនេះគឺរលកនៃការតវ៉ាប្រឆាំងប្រធានាធិបតីលោកអាលីអាប់ដាល់ឡាហ៍ សាឡេហ៍ ដែលកាន់អំណាចចាប់តាំងពី៣២ឆ្នាំមកហើយ ជារឿងធ្វើឱ្យក្រុងវ៉ាស៊ីនតោនមានការព្រួយបារម្ភ។
ទោះបីជាមានការប្រមូលផ្តុំមនុស្សពុំធ្លាប់មានពីមុនមករបស់ពួកប្រឆាំងដែលនាថ្ងៃទី៤ មីនា មានដល់១០០.០០០នាក់នៅទីក្រុងសាណាអា ដើម្បីទាមទារឱ្យលោកចាកចេញពីអំណាចក៏ដោយ ក៏លោកសាឡេហ៍ បានបដិសេធកាលពីចុងសប្តាហ៍កន្លងមកនេះពុំព្រមចាកចេញមុនដាច់អាណត្តិរបស់លោកក្នុងឆ្នាំ២០១៣ដែរ ៕
ចែករំលែកព័តមាននេះ