ខេត្តឧត្តរមានជ័យ ៖ លោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍រួមដំណើរដោយលោករដ្ឋលេខាធិការ អនុរដ្ឋលេខាធិការ មន្ត្រីរាជការក្រោមឱវាទក្រសួង និងអ្នកឧកញ៉ា ម៉ក់ គឹមហុង អគ្គនាយកក្រុមហ៊ុនចំការកៅស៊ូជប់បានទៅសាកសួរសុខទុក្ខ សំណេះសំណាល និងនាំយកអំណោយចែកជូនដល់កងទ័ពនៅវរសេនាតូចលេខ៤១៥ក្នុងខេត្តឧត្តរមានជ័យកាលពីថ្ងៃទី២៣ ខែមីនា ឆ្នាំ២០១១។
បន្ទាប់ពីលោកវរសេនីយ៍ឯក ឃឿង ធា មេបញ្ជាការរងកងពលតូចលេខ៤១៥ប្រចាំព្រៃគុយជាមេបញ្ជាការវរសេនាតូចលេខ៤១៥ធ្វើរបាយការណ៍ស្វាគមន៍ និងលើកឡើងពីស្ថានភាពទូទៅនៅវរសេនាតូចលេខ៤១៥ រួចមក លោករដ្ឋមន្ត្រីសូរ ឃុន បានលើកឡើងពីសេចក្តីកោតសរសើរពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវជូនដល់នាយទាហាន នាយទាហានរង ពលទាហានដែលបានខិតខំប្រឹងប្រឹងយ៉ាងអង់អាចក្លាហាន ហ៊ានលះបង់កំលាំងកាយចិត្ត គ្រប់បែបយ៉ាងក្នុងបុព្វហេតុការពារបូរណភាពទឹកដីកម្ពុជាបានគង់វង្ស។
លោកសូរ ឃុន មានប្រសាសន៍លើកឡើងផងដែរពីការយកចិត្តទុកដាក់ខ្ពស់ពីសំណាក់សម្តេចអគ្គមហាធម្មពោធិសាល ជា ស៊ីម សម្តេចអគ្គមហាពញាចក្រី ហេង សំរិន និងសម្តេចអគ្គមហាសេនាបតីតេជោហ៊ុន សែន ដែលជានិច្ចកាលតែងតែគិតគូរពីសុខទុក្ខ និងការលំបាកខ្វះខាតរបស់កងទ័ពយើងក៏ដូចជាប្រជាពលរដ្ឋនៅទាំងប្រទេសជាប់ជាប្រចាំ។
លោកសូរ ឃុន បានឧបត្ថម្ភអំណោយដល់កងទ័ពវរសេនាតូចលេខ៤១៥ ចំនួន៤៣៦នាក់ ក្នុង១នាក់ឃីត១កញ្ចប់ ក្នុងនោះមានអង្រឹង មានមុង១សំរាប់ មី១០កញ្ចប់ បារី២កញ្ចប់ ក្រមា១ ត្រីខ២កំប៉ុង ប្រេងកូឡា និងត្រីឆ្អើរ។ ដោយឡែកក្រុមហ៊ុនចំការកៅស៊ូជប់បានឧបត្ថម្ភថវិកាចំនួន១៥.០៨០.០០០រៀលដល់វរសេនាតូចលេខ៤១៥ផងដែរ។ បន្ទាប់មកលោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងប្រតិភូរួមដំណើរបានអញ្ជើញកាត់ខ្សែបូសម្ពោធបើកឱ្យប្រើប្រាស់ស្រះទឹក១ ដែលជាអំណោយរបស់លោកផ្ទាល់ជូនដល់ទីបញ្ជាការកងពលតូចលេខ៤១ ដើម្បីប្រើប្រាស់ជាប្រយោជន៍រួមចាប់ពីពេលនេះតទៅ ៕
ចែករំលែកព័តមាននេះ