សែលកាត អបអរការឈ្នះជ័យលាភីក្រុមហ៊ុនឆ្នើមបំផុតនៅអាស៊ីលើកទី៥ ដែលជាព្រឹត្តិការណ៍ប្រចាំឆ្នាំរៀបចំឡើងដោយវិទ្យាស្ថានវាយតម្លៃពាណិជ្ជនាមក្រុមហ៊ុន សហគ្រាសឧស្សាហកម្ម World HRD Congress and Stars និងទទួលស្គាល់ដោយសហព័ន្ធពាណិជ្ជកម្មអាស៊ី Asian Confederation of Businesses ។
ការឈ្នះជ័យលាភីរបស់សែលកាតក្នុងព្រឹត្តិការណ៍ប្រគល់រង្វាន់ប្រចាំឆ្នាំ២០១៦កាលពីថ្ងៃទី៤សីហា ក្នុងចំណោមបណ្ដាក្រុមហ៊ុនឆ្នើមនៅអាស៊ី ជាជ័យលាភីដែលទទួលបានរយៈពេល៥ឆ្នាំជាប់ៗគ្នាដែលខ្លួនអាចធ្វើបានក្នុងតួនាទីជាក្រុមហ៊ុនមួយនៅតំបន់អាស៊ី ក៏ដូចជាត្រូវបានទទួលស្គាល់សម្រាប់ការប្រកាន់ខ្ជាប់នូវភាពល្អឥតខ្ចោះក្នុងវិស័យអភិវឌ្ឍធនធានមនុស្ស។ វាជាសក្ខីភាពដែលបញ្ជាក់ពី ការប្ដេជ្ញាចិត្តរបស់ក្រុមហ៊ុនក្នុងការបង្កើត និងរក្សាបាននូវបរិយាកាសការងារ និងវប្បធម៌ ដែលបានចូលរួមចំណែកក្នុងកិច្ចអភិវឌ្ឍជំនាញ និងផ្ដល់ឱកាសរីកចម្រើនសម្រាប់ការងារផងដែរ។
ក្នុងឆ្នាំនេះ ក្រៅពីពានរង្វាន់ខាងលើ សែលកាត ក៏មានមោទនភាពនាំយកនូវពានរង្វាន់បន្ថែមទៀតពីក្នុងព្រឹត្តិការណ៍ដ៏នក្ខត្តឫក្សនេះមកកាន់មាតុប្រទេសវិញផងដែរ ។ នោះគឺការទទួលស្គាល់សែលកាត ជាក្រុមហ៊ុនដែលមាននាយកដ្ឋានធនធានមនុស្សប្រកបដោយភាពច្នៃប្រឌិត ព្រមទាំងទទួលស្គាល់ចំពោះកិច្ចខិតខំប្រឹងប្រែងក្នុងការអនុវត្តប្រកបដោយលក្ខណៈពិសេសដោយឡែក និងការផ្សារភ្ជាប់គំនិតផ្ដួចផ្ដើមដែលផ្ដោតសំខាន់លើនិយោជិត។
អ្នកស្រី នីគី អេនរីគេ្វស្ស នាយកប្រតិបត្តិធនធានមនុស្ស ក្រុមហ៊ុន សែលកាត បានថ្លែងថា៖«បុគ្គលិកសែលកាតមានការពេញចិត្តខ្ពស់ចំពោះការងារ ។ យើងក៏បន្តស្វែងរកមធ្យោបាយអភិវឌ្ឍកែលម្អដើម្បីរួមចំណែកចំពោះសុខុមាលភាព និងការងារបុគ្គលិករបស់យើង តាមរយៈឱកាសបណ្ដុះបណ្ដាលផ្សេងៗដែលអាចឲ្យពួកគាត់ដុសខាត់ជំនាញ ក៏ដូចជា យកចិត្តទុកដាក់ចំពោះបរិយាកាសមួយដែលអាចឲ្យពួកគាត់សិក្សា និងអនុវត្តតួនាទីភាព ជាអ្នកដឹកនាំ ការទទួលខុសត្រូវ និងការងារក្រុម ។ ក្រៅពីនេះ យើងបានគាំទ្រ និងធានា ចំពោះតុល្យភាពជីវិតការងារដ៏ប្រសើរជាមួយសកម្មភាពទូទៅនានាដែលជាការលើកកម្ពស់ ការបំពេញការងារដោយរីករាយ ។ កត្តានេះមានសារៈសំខាន់ណាស់ចំពោះស្ថាប័នធំៗដូចជាសែលកាត ជាដើម ដែលមាននិន្នាការផ្ដោតលើឯកត្តជន និងផ្នែកនានាដើម្បីធ្វើការឲ្យស៊ីសង្វាក់គ្នា ហើយយើងក៏ធានាថា យើងមានច្រក និងមធ្យោបាយជាច្រើនសម្រាប់ឲ្យបុគ្គលិកយើង ធ្វើការរួមគ្នា ផ្លាស់ប្ដូរគំនិតយោបល់ សហការ ដើម្បីឲ្យស្គាល់គ្នាកាន់តែជិតស្និទ្ធ និងបម្រើការងារដោយភាពរីករាយ ។»
ការប្រគល់ជ័យលាភីក្រុមហ៊ុនឆ្នើមនៅអាស៊ី 2016 ប្រព្រឹត្តទៅនៅសណ្ឋាគារPan Pacific ផ្សារទំនើប Marina Square ប្រទេសសិង្ហបុរី ដោយមានការចូលរួមពីថ្នាក់ដឹកនាំពាណិជ្ជកម្មជាន់ខ្ពស់រាប់រយនាក់មកពីបណ្ដាប្រទេសក្នុងតំបន់អាស៊ីប៉ាស៊ីហ្វិក ។ មានវត្តមានក្នុងព្រឹត្តិការណ៍ដ៏មហោឡារិកនេះ លោក ជរ សុជាតិ ប្រធានគ្រប់គ្រងផ្នែកសេវាកម្មបុគ្គលិក លោក ចាន់ វិបុល ប្រធានផ្នែកជ្រើសរើស បុគ្គលិក និងអ្នកស្រី ម៉ារីណា ពីខាទីវ៉ា ប្រធានគម្រោងពិសេស បានចូលរួមទទួលពានរង្វាន់ ដ៏មហាកិត្តិយសនេះក្នុងតំណាងក្រុមហ៊ុនសែលកាត ។
អ្នកស្រី នីគី អេនរីគេ្វស្ស នាយកប្រតិបត្តិធនធានមនុស្ស ក្រុមហ៊ុន សែលកាត ក៏បានថ្លែងពីចំណាប់អារម្មណ៍ដោយក្ដីរំភើបថា ៖«ការនាំយកនូវពានរង្វាន់លើកទី៥នេះមកកាន់មាតុប្រទេសយើង ដែលជានិមិត្តរូបនៃការទទួលស្គាល់រយៈពេល៥ឆ្នាំជាប់ៗគ្នាក្នុងនាមក្រុមហ៊ុនមួយក្នុងតំបន់ដែលបុគ្គលិកប្រាថ្នាចង់បម្រើការងារ គឺជាមហាកិត្តិយសដ៏ថ្លៃថ្លាមួយសម្រាប់យើង ។ យើងក៏មានមោទនភាពដែលអាចរក្សាបាននូវស្ដង់ដារលំដាប់អន្តរជាតិសម្រាប់កន្លែងការងារ និងការអភិវឌ្ឍធនធានមនុស្ស ។ ជ័យជម្នះនេះ កាន់តែជំរុញឲ្យយើងខិតខំប្រឹងប្រែងធ្វើបន្ថែមទៀតឲ្យកាន់តែប្រសើរ ហើយយើងនឹងអាចធ្វើបាន។ យើងក៏សូមថ្លែងអំណរគុណដ៏ជ្រាលជ្រៅផងដែរ ចំពោះម្ចាស់ភាគហ៊ុន អ្នកឧកញ៉ា គិតម៉េង ឯកឧត្តមឧកញ៉ា គិត ធាង និងនាយកប្រតិបត្តិរបស់យើងគឺលោក អៀន វ៉ាត់សុន ចំពោះកិច្ចគាំទ្រឥតឈប់ឈរក្នុងគំនិតផ្តួចផ្តើមអភិវឌ្ឍធនធានមនុស្សរបស់យើងខ្ញុំ ។»
សូមបញ្ជាក់ផងដែរថា ក្រុមហ៊ុន សែលកាត ជាក្រុមហ៊ុនទូរគមនាគមន៍ខ្មែរសុទ្ធសាធ និងជាក្រុមហ៊ុនផ្ដល់សេវាកម្មទូរស័ព្ទចល័តឈានមុខគេនៅកម្ពុជាផងដែរ។ ក្រុមហ៊ុន សែលកាត បានសម្ពោធដំណើរការនៅឆ្នាំ១៩៩៨ ហើយបានក្លាយជាក្រុមហ៊ុនស្ដង់ដារមួយនៅកម្ពុជាដែលផ្ដល់នូវគុណភាព អត្ថប្រយោជន៍ និង សេវាកម្មឈានមុខគេ និងបន្តយកចិត្តទុកដាក់ក្នុងកិច្ចអភិវឌ្ឍមធ្យោបាយថ្មីៗដើម្បីគាំទ្រ និងលើកកម្ពស់មធ្យោបាយទំនាក់ទំនងរបស់អតិថិជនខ្លួនផងដែរ ។ ស្ថិតក្នុងទីផ្សារទូរគមនាគមន៍មួយដែលតែងមានការប្រែប្រួល សែលកាត នៅតែប្តេជ្ញាធ្វើអ្វីៗដើម្បីកម្ពុជា និងប្រជាជនកម្ពុជា ៕
ចែករំលែកព័តមាននេះ