ខេត្តបន្ទាយមានជ័យ ៖ ប្រជាពលរដ្ឋខ្មែរ១០នាក់ ដែលបាត់ខ្លួនក្រោយការរត់គេចពីការបាញ់រះរបស់ទាហានព្រំដែនសៀមកាលពីថ្ងៃពុធ ទី៩ មីនា កន្លងមកនេះ បានវិលត្រឡប់មកដល់លំនៅឋានដោយសុវត្ថិភាពវិញអស់ហើយ ។ បើតាមអ្នកយកព័ត៌មានកោះសន្តិភាពប្រចាំខេត្តបន្ទាយមានជ័យ ក៏បានបញ្ជាក់ឱ្យដឹងនៅរសៀលថ្ងៃសុក្រ ទី១១ មីនា នេះដែរថា បុរសម្នាក់ដែលទាហានសៀមបាញ់បាក់ភ្លៅរបួសធ្ងន់ និងបានចាប់ខ្លួនបញ្ជូនទៅទឹកដីសៀមនោះ មិនទាន់ដឹងដំណឹងយ៉ាងណានោះនៅឡើយទេ ។
នៅពេលទាក់ទងតាមទូរស័ព្ទដើម្បីសុំសេចក្តីអត្ថាធិប្បាយជុំវិញព័ត៌មាននេះ អភិបាលស្រុកបន្ទាយអំពិល លោកចាប ហាត បានបង្វែរសំណួរឱ្យទៅសួរលោកអធិការស្រុកវិញ ។ ចំណែកលោកហុង ចម្រើន អធិការស្រុកបន្ទាយអំពិល ខេត្តឧត្តរមានជ័យ មិនអាចទាក់ទងបានទេ នៅរសៀលថ្ងៃសុក្រនេះ ដោយទូរស័ព្ទរបស់លោកភ្ជាប់បានហើយ ប៉ុន្តែប្រព័ន្ធទូរស័ព្ទពិបាកឆ្លើយឆ្លង ។
គួររំលឹកថា កាលពីវេលាម៉ោង៤និង៣០នាទីរសៀលថ្ងៃពុធ ទី៩ មីនា កន្លងមកនេះ នៅចំណុចជប់អង្គញ់ក្នុងទឹកដីឃុំគោកមន ស្រុកបន្ទាយអំពិលទាហានឈុតខ្មៅសៀម បានធ្វើការបាញ់រះទៅលើប្រជាពលរដ្ឋខ្មែរ បណ្តាលឱ្យមនុស្សម្នាក់របួសធ្ងន់ក្រោយមកត្រូវចាប់ខ្លួន និងបាត់ខ្លួនម្នាក់ ហើយមនុស្ស១១នាក់ទៀត ក្នុងនោះក៏មានរបួសស្រាលម្នាក់បានរត់រួចមកដល់ភូមិវិញ ។
ពលរដ្ឋខ្មែរឈ្មោះឈឿន ញូង ភេទប្រុស អាយុ៣៨ឆ្នាំ បានរងរបួសបាក់ភ្លៅ ហើយត្រូវទាហានឈុតខ្មៅសៀមចាប់ខ្លួន ចំណែកអ្នករបួសស្រាលឈ្មោះហៀច ភេទប្រុស អាយុ២៧ឆ្នាំ ត្រូវបានគេបញ្ជូនទៅព្យាបាលនៅមន្ទីរពេទ្យបង្អែកស្រុកមង្គលបុរី ខេត្តបន្ទាយមានជ័យ ។ រីឯប្រជាពលរដ្ឋ១០នាក់ផ្សេងទៀត បានរត់គេចខ្លួនរួចពីការបាញ់សម្លាប់ដោយកាំភ្លើងពីក្រុមទាហានសៀម ៕
ចែករំលែកព័តមាននេះ