រាជធានីភ្នំពេញ ៖ សព្វថ្ងៃនេះ មានផលិតផលមិនច្រើននោះទេដែលអាចរក្សានូវសមត្ថភាព និងស្ថានភាពដើមក្រោយពីបានប្រើប្រាស់រយៈពេល១០ឆ្នាំ ជាពិសេសជាមួយនឹងការប្រើប្រាស់ច្រើនទាំងយប់ទាំងថ្ងៃ ។ ក្រុមហ៊ុន Ford បានព្យាយាមផលិតនូវរថយន្ត Ford Transit ស៊េរីថ្មីដែលមានភាពរឹងមាំសម្រាប់ប្រើប្រាស់យូរអង្វែង ដោយបានយករថយន្តទៅធ្វើតេស្តរហូតរយៈពេលប្រាំមួយខែ ដោយឆ្លងកាត់ការបើកបរនៅលើផ្លូវរយៈពេលយូរ និងមានឧបសគ្គច្រើនដើម្បីរុករកនូវបញ្ហាដែលអាចកើតមានក្រោយពីបានប្រើប្រាស់រថយន្តនេះរយៈពេលយូរ ។
លោក David Gregory ប្រធានវិស្វករផ្នែករថយន្តTransit ប្រចាំទីផ្សារអឺរ៉ុប បានមានប្រសាសន៍ថា៖«ខ្ញុំគិតថា អតិថិជនជាច្រើននឹងមិនជឿថា រថយន្តនេះបានឆ្លងកាត់ឧបសគ្គអ្វីខ្លះនោះទេមុននឹងប្រកាសដាក់លក់នៅលើទីផ្សារ។ រថយន្តនេះ បានឆ្លងកាត់ការធ្វើតេស្តដែលលំបាកបំផុត ដែលរថយន្តVanដទៃប្រហែលមិនអាចឆ្លងផុតនោះទេ ផ្ទុយទៅវិញរថយន្ត Ford Transit បានឆ្លងកាត់ការធ្វើតេស្តទាំងនោះបានដោយជោគជ័យ ។
មុនសម្រេចដាក់លក់រថយន្ត Ford Transit ដំបូងនៅទីផ្សារអឺរ៉ុប និងអាមេរិកខាងជើង រថយន្ត Transit ត្រូវបានឆ្លងកាត់ការធ្វើតេស្តនឹងភាពធន់របស់រថយន្តនៅឯរោងចក្ររបស់ Ford នៅទីក្រុង Lommel ប្រទេស Belgium និងមួយទៀតនៅទីក្រុង Romeo រដ្ឋ Michigan សហរដ្ឋអាមេរិក ។ នៅទីក្រុង Lommel រថយន្ត Ford Transit ជាង៣០គ្រឿងត្រូវបានជ្រើសរើសសម្រាប់ការធ្វើតេស្តហើយ នៅក្នុងនោះមានដូចជាការអូសសណ្ដោងជាមួយនឹងទម្ងន់អតិបរិមានិងផ្ទុកទៅដោយអីវ៉ាន់ពេញ ។
ការធ្វើតេស្តបន្ទាប់ គឺការបើកបរល្បឿនលឿនឥតឈប់សម្រាករយៈពេលពីរខែនៅលើផ្លូវក្រួស ថ្ម ភក់ ជាដើម ។ ក្រៅពីនេះFord Transit ក៏ត្រូវបានដាក់នៅក្នុងបន្ទប់បិទជិតដែលពោរពេញទៅដោយកម្រិតសំណើមខ្ពស់រយៈពេល១២សប្ដាហ៍ ដើម្បីតេស្តពីភាពធន់ និង ភាពច្រែះរបស់រថយន្ត ព្រមទាំងពិនិត្យមើលបំរែបំរួលនៃការវិវឌ្ឍរបស់រថយន្តរយៈពេលមួយខែថែមទៀត ។ នៅពេលធ្វើតេស្តពីកម្លាំងរថយន្ត ក្រុមការងារបានបើករថយន្តនេះនៅលើផ្លូវជង្ហុករដិបរដុបប្រហែល៥ពាន់ដង និងបានបើកឡើងទៅលើខឿនផ្លូវដែលមានកម្ពស់ ១៤០mm ជាមួយនឹងល្បឿន៦០km/h ។
ក្រុមការងារ Ford ក៏បានតេស្តរថយន្តនេះនៅអឺរ៉ុប អាមេរិកខាងជើង អាហ្វ្រិក និងអាស៊ីផងដែរ ។ នៅរដ្ឋ Arizona ទីក្រុង Dubai និង អាហ្វ្រិកខាងជើង រថយន្ត Transit ត្រូវរត់នៅក្រោមកម្ដៅថ្ងៃដ៏ក្ដៅរហូតដល់ 40 C រីឯនៅ Finland និងCanada វិញ រថយន្តត្រូវទ្រាំទ្រនឹងភាពត្រជាក់រហូតដល់-40C និងធ្វើដំណើរឆ្លងកាត់ឧបសគ្គកាត់ទ្វីបអឺរ៉ុប មជ្ឈិមប្រទេស រុស្សី តួកគី និងសហរដ្ឋអាមេរិកនៅតំបន់ Austrian Alps និង Death Valley ។ មុនពេលដាក់សម្ពោធជាផ្លូវការ រថយន្ត Transit បានដាក់ធ្វើតេស្តនៅលើផ្លូវរហូតដល់៥០ម៉ឺនគីឡូម៉ែត្រ ។ នៅក្នុងមន្ទីរពិសោធន៍ រថយន្ត Ford Transit ម៉ាស៊ីន 2.2 Litre ត្រូវបានប្រើឱ្យដឹកទំនិញពេញរថយន្ត និងដាក់ឱ្យរត់នៅលើចម្រឹងដែក រយៈពេល៤៦ថ្ងៃឥតឈប់ ដើម្បីពិសោធន៍ពីដំណើរការនៃម៉ាស៊ីន ភាពធន់រឹងមាំ និងដើម្បីធានាបាននូវអាយុកាលនៃការប្រើប្រាស់១០ឆ្នាំ ស្របទៅតាមបទដ្ឋានស្តង់ដាររថយន្តថ្មី ។
គួរបញ្ជាក់ថា រថយន្ត Ford Transit ស៊េរីថ្មីនេះ គឺជារថយន្តជំនាន់ក្រោយបង្អស់របស់រថយន្តប្រភេទ Transit ដែលមានដាក់លក់ដំបូងបង្អស់នៅលើទីផ្សារអឺរ៉ុប និងទទួលបានការគាំទ្រយ៉ាងច្រើនពីសំណាក់អ្នកប្រើប្រាស់នៅតាមបណ្តាប្រទេសនានានៅទ្វីបអឺរ៉ុប ក៏ដូចជា បណ្តាប្រទេសនានានៅលើពិភពលោកផងដែរ ។ បច្ចុប្បន្នរថយន្ត Ford Transit នេះ កំពុងទទួលបានការគាំទ្រ និងពេញនិយមប្រើប្រាស់យ៉ាងខ្លាំងពីសំណាក់ក្រុមហ៊ុនដឹកអ្នកដំណើរនានានៅក្នុងប្រទេសកម្ពុជាយើង ៕
ចែករំលែកព័តមាននេះ