រាជធានីភ្នំពេញ ៖ កាលពីព្រឹកថ្ងៃទី០៦ សីហា ២០១៦ នេះ បុគ្គលិក និងអ្នកគាំទ្ររបស់រោងភាពយន្តប្រមាណជាង៣០នាក់ បាននាំយកថវិកា ក៏ដូចជាបានចូលរួមសកម្មភាពផ្តល់ឈាមជូនដល់មន្ទីរពេទ្យគន្ធបុប្ពាទី២ ដែលមានទីតាំងក្បែរព្រះបរមរាជវាំង ក្រោមកិច្ចស្វាគមន៍ពីលោកវេជ្ជបណ្ឌិត ដេនីស ឡូរ៉ង់តំណាងឱ្យលោកវេជ្ជបណ្ឌិត Beat Richer។
លោក ធារ៉ា ប្រធានគ្រប់គ្រងហិរញ្ញវត្ថុ និងតំណាងឱ្យគណៈប្រតិភូនាំយកអំណោយសប្បុរសធម៌ និងចូលរួមផ្តល់ឈាមជូនដល់មន្ទីរពេទ្យគន្ធបុប្ពាទី២ បានថ្លែងប្រាប់កោះសន្តិភាពឱ្យដឹងថា នេះជាលើកដំបូងដែលលេជេននាំយកអំណោយសប្បុរសធម៌ និងផ្តល់ឈាមជូនមន្ទីរពេទ្យគន្ធបុប្ពា ចំពោះថវិកាលើនេះលេជេនបានធ្វើការរៃអង្គាស និងទទួលពីអតិថិជន ក៏ដូចជាអ្នកគាំទ្របានទឹកប្រាក់ចំនួន២ពាន់៦០០ដុល្លារជាង ហើយលេជេនបានឧបត្ថម្ភបង្គ្រប់ ៥ពាន់ដុល្លារ ឬស្មើនឹង២០លានរៀលដើម្បីការងារសប្បុរសធម៌នេះ ហើយក្នុងឱកាសនេះ ក៏មានអ្នកចូលរួមជាបុគ្គលិក ក៏ដូចជាអ្នកគាំទ្ររោងភាពយន្តលេជេនបានចូលរួមផ្តល់ឈាមចំនួន១៨នាក់ផងដែរ។
ឆ្លើយតបនឹងសកម្មភាពសប្បុរសធម៌នេះ លោកវេជ្ជបណ្ឌិត ដេនីស ឡូរ៉ង់តំណាងឱ្យលោកវេជ្ជបណ្ឌិត Beat Richer បានមានប្រសាសន៍ថ្លែងអំណរគុណដល់លេជេនក៏ដូចជាសប្បុរសជនថា «ការផ្តល់ជំនួយជាឈាមក្តី ជាប្រាក់ក្តី ជាគម្រូដ៏ល្អដល់បងប្អូនខ្មែរទាំងមូល»។
លោកយស់ ចន្ទ័សុភក្ត្រ័ ជាអ្នកគាំទ្រដែលបានចូលរួមក្នុងកម្មវិធីនេះតាមរយៈការផ្សព្វផ្សាយតាមទំព័ររបស់លេជេនបានរៀបរាប់ចំពោះអត្ថប្រយោជន៍នៃការផ្តល់ឈាមថា «ការផ្តល់ឈាមគឺល្អ ហើយសំខាន់មែនទែនសម្រាប់ប្រជាជននឹងសង្គម ព្រោះអីរាល់ថ្ងៃ និងរាល់ឆ្នាំមានមនុស្សស្លាប់ដោយសារការខ្វះឈាមច្រើន» ។
ចំណែកឯលោក សាស្ត្រាចារ្យ ប៊ុន ម៉េង ដែលបានបម្រើការងារនៅមន្ទីរពេទ្យគន្ធបុប្ពាជាង២០ឆ្នាំបានមានប្រសាសន៍ប្រាប់កោះសន្តិភាពថាក្នុងរយៈពេលជាងបួនប្រាំឆ្នាំនេះ ប្រជាជនខ្មែរបានជួយទំនុកបម្រុងដល់មន្ទីរពេទ្យគន្ធបុប្ពាយ៉ាងសស្រាក់សស្រាំ។ រីឯការផ្តល់ឈាមសម្រាប់មន្ទីរពេទ្យគឺត្រូវការជារៀងរហូត ព្រោះក្មេងដែលមកទទួលការព្យាបាលនៅមន្ទីរពេទ្យគន្ធរ២នេះ សុទ្ធជាត្រូវការឈាម។ ហើយទៀតសោតអ្នកផ្តល់ឈាមភាគច្រើនជាបងប្អូនរបស់អ្នកជំងឺ និងមួយផ្នែកទៀតជាការបរិច្ចាគពីសប្បុរសជន។ លោកបានអំពាវនាវឱ្យមានការចូលរួមផ្តល់ឈាមឱ្យកាន់តែច្រើនព្រោះវាមានសារៈសំខាន់ណាស់ក្នុងការជួយសង្គ្រោះជីវិតកុមាររងគ្រោះ។
គួរបញ្ជាក់ថា មន្ទីរពេទ្យគន្ធបុប្ពាទទួលបានឈាមជាង៨៨៧ប្លោក គិតត្រឹមរយៈពេល៨ខែក្នុងឆ្នាំ២០១៦នេះ ប៉ុន្តែមិនទាន់អាចបំពេញ តម្រូវការគ្រប់គ្រាន់ទេក្នុងការជួយសង្គ្រោះជីវិតកុមារ។
ចែករំលែកព័តមាននេះ