រាជធានីភ្នំពេញ ៖ មានការភ្ញាក់ផ្អើលមួយបានកើតឡើង ដោយសារតែស្ត្រីជនជាតិចិនម្នាក់ ត្រូវជនជាតិចិនដូចគ្នាចាប់ជំរិតទារប្រាក់បាន៤ម៉ឺនយ័ន ហើយគេចខ្លួនបាត់ដោយសុវត្ថិភាព និងបង្កឱ្យភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី៤ ខែសីហា នៅចំណុចអាផាតម៉ិននគរឡាក់គី ជិតចំណតរថយន្តផ្សារធំថ្មី ស្ថិតក្នុងសង្កាត់ផ្សារថ្មីទី២ ខណ្ឌដូនពេញ ។
បើតាមស្ត្រីជនជាតិចិនដែលរងគ្រោះ ដែលជាអ្នកលក់សម្លៀកបំពាក់កូនក្មេងនៅផ្សារអូឡាំពិក តូបលេខ៣៧០ បានឱ្យដឹងថា រូបគាត់និងជនសង្ស័យមិនដែលស្គាល់គ្នាទេ ។ នៅមុនកើតហេតុមួយថ្ងៃ ជនសង្ស័យបានទូរស័ព្ទមកទាក់ទងរូបគាត់ ដែលមិនដឹងថាបានលេខទូរស័ព្ទមកពីណាទេថាចង់រកស៊ីជាមួយគាត់ ព្រោះគេស្គាល់រោងចក្រផលិតសម្លៀកបំពាក់។ ពេលឮដូចនេះ រូបគាត់ក៏បានណាត់ជាមួយជនសង្ស័យដើម្បីរកស៊ីជាមួយគ្នា ។
ស្ត្រីរងគ្រោះបន្តទៀតថា លុះស្អែកឡើងថ្ងៃទី៤ ខែសីហា វេលាម៉ោង៨ព្រឹក គាត់បានឲ្យប្តីមកជួយលក់មួយព្រឹកព្រោះគាត់ត្រូវទៅក្រៅជួបម៉ូយ ដែលជាអ្នកនាំសម្លៀកបំពាក់ពីក្រៅប្រទេស ។ បន្ទាប់មក គាត់បានជិះរ៉ឺម៉កម៉ូតូពីផ្សារអូឡាំពិកសំដៅទៅផ្លូវលេខ៣១០ដើម្បីទៅយកមិត្តភក្តិម្នាក់ទៅជាមួយដែរគ្រាន់បានជាគ្នា ។ ខណៈជិះរ៉ឺម៉កម៉ូតូចេញផុតពីផ្សារអូឡាំពិកបានបន្តិចដល់ចំណុចផ្លូវកែង ស្រាប់តែមានរថយន្តទួរីសមួយគ្រឿង មិនចាំស្លាកលេខបានបើកមកស្ទាក់់ពីមុខរ៉ឺម៉កម៉ូតូ ហើយមានបុរស២នាក់ចុះពីលើរថយន្តមកគំរាមបាញ់សម្លាប់ រួចចាប់គាត់ចងបិទភ្នែក ដកកាំភ្លើងភ្ជង់ ហើយរុញបញ្ចូលក្នុងរថយន្តដឹកយកមកដល់ផ្សារធំថ្មីទើបបើកភ្នែកវិញ និងបាននាំគាត់ឡើងទៅអាផាតម៉ិននគរឡាក់គី បន្ទប់លេខ៣០៥ ដោយមានកាំភ្លើងភ្ជង់ជាប់ពីក្រោយរហូត ។
ស្ត្រីរងគ្រោះរៀបរាប់ទៀតថា ពេលដល់ក្នុងបន្ទប់ជនសង្ស័យបានប្រាប់គាត់ឲ្យទូរស័ព្ទទៅក្រុមគ្រួសារនៅឯស្រុកចិនផ្ញើប្រាក់ចំនួន១០ម៉ឺនយ័ន ស្មើនឹងជិត៣ម៉ឺនដុល្លារមកឲ្យពួកគេជាថ្នូរនឹងការដោះលែង ប៉ុន្តែដោយសារខាងគ្រួសារនៅឯស្រុកចិនរកលុយមិនទាន់ ក៏សុំមកនៅត្រឹម៤ម៉ឺនយ័ន ។ ក្រោយពីបានទទួលប្រាក់ហើយក្រុមជនសង្ស័យបានគេចខ្លួនបាត់ស្រមោលអស់ ទៅ នៅសល់តែរូបគាត់ដែលត្រូវជនសង្ស័យចាប់ចងដៃ បានដើរទៅជិតតុយកកាំបិតកាត់ចំណង រួចហើយទូរស័ព្ទប្រាប់ប្តី ។
ចំណែកអ្នកគ្រប់គ្រង់អាផាតម៉ិន និយាយថា មុនកើតហតុមួយថ្ងៃ មានមនុស្សមួយក្រុមមានគ្នា៧ទៅ៨នាក់ បានមកជួលអាផាតម៉ិនស្នាក់នៅមួយថ្ងៃ គឺបន្ទប់លេខ៣០៥និងលេខ២០៦។ នៅយប់ថ្ងៃទី៤ ខែសីហា គាត់បានឃើញស្ដ្រីជនជាតិចិនរូបនេះដើរចូលក្នុងអាផាតម៉ិនជាមួយបុរស២នាក់ តែមើលតាមកាយវិការហាក់ដូចជាអត់មានការគំរាមកំហែងអ្វីទេ គឺបុរសទាំង២នាក់ដើរពីមុខ ឯស្ត្រីរងគ្រោះដើរខាងក្រោយ ស្រាប់តែនៅវេលាម៉ោងជាង៧យប់ ក៏ភ្ញាក់ផ្អើលថាមានគេចាប់ជំរិត ។
ក្រោយពេលកើតហេតុ សមត្ថកិច្ចមូលដ្ឋានសហការជាមួយនគរបាលព្រហ្មទណ្ឌកម្រិតធ្ងន់បានចូលទៅបន្ទប់លេខ៣០៥ ដែលេឃុំជនរងគ្រោះ និងឃើញខ្សែចំណងចងដៃចំនួន៣ខ្សែ កូនកាំបិត១ ព្រមទាំងធ្វើការត្រួតពិនិត្យតាមកាមេរ៉ាសុវត្ថិភាព និងនាំអ្នកគ្រប់គ្រងអាផាតម៉ិននិងជនងគ្រោះទៅសួរនាំបន្តទៀត ។
ជំហានដំបូង សមត្ថកិច្ចមិនទាន់អាចសន្និដ្ឋានថាជាករណីអ្វីឱ្យពិតប្រាកដទេ ព្រោះថាតាមសម្តីជនរងគ្រោះ និងសម្ដីអ្នកគ្រប់គ្រងអាផាតម៉ិន ហាក់ដូចជាមិនស៊ីសង្វាក់គ្នាសោះ មានតែនាំជនរងគ្រោះ និងអ្នកគ្រប់គ្រង់អាផាតម៉ិន ព្រមទាំងយកវីដេអូក្នុងកាមេរ៉ាសុវត្ថិភាពមកធ្វើការវិភាគ និងសួរនាំឱ្យបានច្បាស់លាស់ជាមុន ទើបអាចសន្និដ្ឋានបានថាជាករណីអ្វី ?
ចំណែកប្រភពព័ត៌មានក្រៅផ្លូវការបានបង្ហើបថា អាចជាល្បិចកលរបស់ស្ត្រីរងគ្រោះដែលសង្ស័យជំពាក់លុយគេច្រើន ទើបប្រើល្បិចចាប់ជំរិតដើម្បីយកលុយពីក្រុមគ្រួសារមកសងគេក៏អាចថាបាន ។ ទោះបីជាយ៉ាងណា នៅមិនទាន់ដឹងនៅឡើយទេ ថាជាករណីអ្វីឲ្យពិតប្រាកដនោះ ៕
ចែករំលែកព័តមាននេះ