ល្បីបង្កប់ឈើគ្រញូង សមត្ថកិច្ចស្ទាក់ចាប់ឃើញសុទ្ធតែចំនៀរឈើ
ខេត្តកំពង់ចាម ៖ រថយន្តធុនធំ១គ្រឿងដឹកចំនៀរឈើចេញពីខេត្តកំពង់ធំ ល្បីបង្កប់ឈើគ្រញូងនោះ ត្រូវបានកម្លាំងរដ្ឋបាលព្រៃឈើ សហការណ៍ជាមួយនឹងនគរបាលសេដ្ឋកិច្ចខេត្
ខេត្តកំពង់ចាម ៖ រថយន្តធុនធំ១គ្រឿងដឹកចំនៀរឈើចេញពីខេត្តកំពង់ធំ ល្បីបង្កប់ឈើគ្រញូងនោះ ត្រូវបានកម្លាំងរដ្ឋបាលព្រៃឈើ សហការណ៍ជាមួយនឹងនគរបាលសេដ្ឋកិច្ចខេត្ត ដោយបានចាប់ស្ទាក់ធ្វើការត្រួតពិនិត្យនៅត្រង់ចំណុចឃុំបុសខ្នុរ ស្រុកចំការលើ ត្រូវបាននាំមករក្សាទុកនៅសង្កាត់រដ្ឋបាល ព្រៃឈើកងមាស។ រហូតមកដល់ព្រឹកថ្ងៃទី៥ ខែសីហា ឆ្នាំ២០១៦ នៅពេលដែលកម្មកររើអស់ឃើញមានតែបង្កប់ឈើទាលជាង២ម៉ែត្រគូបប៉ុណ្ណោះ។
ចំណែកម្ចាស់ឈើបានគេចខ្លួនបាត់តែម្ដង។ មន្ត្រីរដ្ឋបាលព្រៃឈើម្នាក់បានប្រាប់ឲ្យដឹងថា មានកម្លាំងរាយការណ៍ថា រថយន្តដឹកចំនៀរឈើខាងលើ ពាក់ស្លាកលេខ ស្វាយរៀង 3A-0601 ថាមានបង្កប់ឈើគ្រញូងជាច្រើនម៉ែត្រគូប ក្នុងគោលបំណង យកទៅលក់នៅទីផ្សារព្រំដែននៅស្រុកមេមត់ ជាប់នឹងប្រទេសវៀតណាម ដោយមិនដឹងជារបស់ឈ្មួញណាម្នាក់នោះទេ ពេលដែលរថយន្តបើកមកដល់ចំណុចភូមិច្រណោម ឃុំបុសខ្នុរ ស្រុកចំការលើ កាលពីថ្ងៃទី៣ ខែសីហា ត្រូវបានឃាត់ដើម្បីធ្វើការត្រួតពិនិត្យ។
មន្ត្រីរដ្ឋបាលព្រៃឈើបានប្រាប់បន្តថា ក្រោយពីបានបញ្ជូនរថយន្តមកដាក់នៅសង្កាត់រដ្ឋបាលព្រៃឈើ កងមាស។ នៅថ្ងៃទី៤ ខែសីហា កម្មករបានរើចំនៀរឈើចេញជាបណ្តើរៗ លុះមកដល់ព្រឹកថ្ងៃទី៥ ខែសីហា ឆ្នាំ២០១៦ បានរើបង្ហើយឃើញមានឈើទាលតែជាង២ម៉ែត្រគូបប៉ុណ្ណោះ ក្រៅពីនេះសុទ្ធតែចំនៀរឈើសម្រាប់គេយកទៅកែច្នៃធ្វើទ្វារបង្អួច។ ហើយម្ចាស់ឈើក៏មិនដឹងអ្នកណាម្នាក់ដែរ តែតាមដំណឹងថានៅថ្ងៃចន្ទ សប្តាហ៍ក្រោយនេះ នឹងបានចូលខ្លួនមកដោះស្រាយតាមច្បាប់ព្រមទទួលពិន័យ។
លោក រៀល សុភិន្ទ ព្រះរាជអាជ្ញារងអមសាលាដំបូងខេត្តវិញប្រាប់ឲ្យដឹងដែរថា រថយន្តដឹកចំនៀរឈើនេះបានចេញពីខេត្តកំពង់ធំ ក្នុងគោលបំណងចូលទៅកន្លែងសិប្បកម្ម ធ្វើទា្វរបង្អួចនៅរាជធានីភ្នំពេញ ក្រោយពីកម្លាំងជំនាញបានរើចំនៀរចេញ ឃើញឈើទាលតែបន្តិច ដោយត្រូវបានយកច្បាប់រដ្ឋបាល ព្រៃឈើត្រង់មាត្រាទី៩៦មកអនុវត្តន៍ ដោយធ្វើការផាកពិន័យគុណនឹង៣ ចំពោះឈើល្មើសច្បាប់ ។ គួររំលឹកថា កន្លងមកក៏ធ្លាប់មានរថយន្តធុនដឹកចំនៀរឈើបែបនេះដែរ ត្រូវបានសមត្ថកិច្ចដេញបង្ក្រាប ដោយមានបង្កប់ឈើអារជាច្រើនម៉ែត្រគូប ដែលម្ចាស់ឈើនៅស្រុកជើងព្រៃ ខេត្តកំពង់ចាម៕
ចែករំលែកព័តមាននេះ