ខេត្តកំពត ៖ ប្រជាពលរដ្ឋនៅភូមិឈើទាលរាំ រួមទាំងព្រះសង្ឃនៅវត្តអង្គជុំដំបងដែក ស្ថិតក្នុងឃុំស្វាយទងខាងជើង ស្រុកកំពង់ត្រាច ខេត្តកំពត បានផ្ដើមកសាងសាលាឆទានមួយកន្លែង នៅលើកំពូលភ្នំបុណ្យ ស្ថិតនៅឃុំស្វាយទងខាងជើង ស្រុកកំពង់ត្រាច ខណៈពេលក្រុមឈ្មួញមានផ្សេងៗគ្នាចំនួន២កំពុងយកគ្រឿងចក្រមកកាយដីភ្នំស្រង៉ាប នៅជាប់ភ្នំដូនបុណ្យ ដើម្បីធ្វើអាជីវកម្មដឹកដីលក់ ស្ទើរតែអស់ភ្នំមួយទៅហើយ។
បើយោងតាមការអោយដឹងពីអ្នកភូមិឈើទាលរាំ បាននិយាយប្រាប់អោយដឹងនៅព្រឹកថ្ងៃទី២៤ ខែកុម្ភៈនេះថា ការកសាងសាលាឆទាននៅលើកំពូលភ្នំបុណ្យនេះ គឺផ្ដើមចេញពីអ្នកភូមិឈើទាលរាំ និងអ្នកភូមិជាច្រើនទៀត នៅក្នុងឃុំស្វាយទងខាងជើង រួមទាំងព្រះសង្ឃ បាននាំគ្នាកសាងសាលាឆទានទុកសម្រាប់អ្នកស្រុកភូមិនាំគ្នាទៅគោរពបូជា សុំសេចក្ដីសុខនៅលើភ្នំនោះ។
ប្រជាពលរដ្ឋនៅភូមិឈើទាលរាំ និយាយបន្តថា ប្រជាពលរដ្ឋនៅក្នុងស្វាយទងទាំងមូល តែងតែនាំគ្នាទៅធ្វើបុណ្យនៅលើភ្នំបុណ្យ តាំងពីឆ្នាំ១៩៥២មកម្ល៉េះ ព្រោះប្រជាពលរដ្ឋនៅតែមានជំនឿថា នៅលើភ្នំនោះបានបារមីពូកែស័ក្ដិសិទ្ធិធ្វើអោយអ្នកភូមិសុខសប្បាយគ្រប់ៗគ្នា។
ប្រជាពលរដ្ឋរូបនោះបាននិយាយថា ការកសាងសាលាឆទានសម្រាប់ធ្វើការបែបន់ ក៏ការពារក្រុមឈ្មួញកាយដីភ្នំលក់ផងដែរ ដូចជាភ្នំស្រង៉ាប ឬភ្នំកប់កំណប់៩០ហាប កំពុងត្រូវក្រុមឈ្មួញឯកជនកាយដីធ្វើអាជីវកម្មដឹកលក់ផងដែរ។
ទាក់ទងនឹងកសាងសាលាឆទាននៅលើកំពូលភ្នំបុណ្យនេះ ព្រះតេជ្ជគុណ ឆាយ ភឿន មានសង្ឃដីកាថា ការកសាងសាលាឆទាននេះ ទុកសម្រាបប្រជាពលរដ្ឋនាំគ្នាទៅធ្វើបុណ្យទាន និងជាទីកន្លែងគោរពបូជាបែបន់នៅទីនោះ។
ព្រះតេជ្ជគុណ ឆាយ ភឿន ក៏មានសង្ឃដីកាបន្តថា នៅលើភ្នំបុណ្យនេះ ជាទីកន្លែងអ្នកភូមិមកធ្វើបុណ្យ និងបែបន់ជាយូរយារណាស់មកហើយ ប៉ុន្តែអ្នកភូមិមិនទាន់មានលទ្ធភាពមកកសាង ទើបពេលនេះពួកគាត់នាំគ្នាមកកសាងសាលាឆទានទុកសម្រាប់ធ្វើបុណ្យសុំសេចក្ដីសុខ បើមិនធ្វើទេ ច្បាស់ជាឈ្មួញកាយដីភ្នំយកទៅលក់អស់មិនខាន បើសង្ឃឹមអាជ្ញាធរត្រូវតែគ្នា ដូចរកស៊ីចូលគ្នា។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ