ខេត្តកំពត ៖ អនុវត្តតាមអនុសាសន៍សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឲ្យអាជ្ញាធរខេត្តពិនិត្យស្ពានឥន្ទធនូឆ្លងកាត់ព្រែកកំពតនោះ នៅព្រឹកថ្ងៃទី៤ ខែសីហា លោក ចាន់ ចេស្តា អភិបាលខេត្ត រួមនឹងក្រុមការងារ ព្រមទាំងមន្ត្រីមន្ទីរសាធារណការនិងដឹកជញ្ជូនខេត្ត បានអញ្ជើញទៅធ្វើការត្រួតពិនិត្យស្ថានភាពដែលត្រូវធ្វើការជួស ជុលកន្លែងខូចឡើងវិញ ។
ស្ពានឥន្ទធនូនេះបានកសាងតាំងពីជំនាន់អាណានិគមនិយមបារាំង ហើយយោងតាមអនុសាសន៍បើអាចជួសជុលបានគួរតែជួសជុល ហើយបើកឲ្យប្រជាពលរដ្ឋធ្វើដំណើរឆ្លងកាត់វិញ ដើម្បីសម្រួលពីការធ្វើដំណើរលើស្ពានថ្មី ដល់សិស្សសាលានិងបងប្អូនប្រជាពលរដ្ឋ ដែលប្រើប្រាស់យានយន្តធុនតូចដូចជា ម៉ូតូ កង់ និងថ្មើរជើងជាដើម ។
ក្នុងការចុះត្រួតពិនិត្យដើម្បីរៀបចំជួសជុលឡើងវិញនេះ លោកអភិបាលខេត្តបានឲ្យស្ថាប័នជំនាញវាយតម្លៃការចំណាយថវិកាជួសជុល និងពេលវេលាជួសជុល តើត្រូវចំណាយអស់ប៉ុន្មាន និងរយៈពេលប៉ុន្មានថ្ងៃ ទើបជួសជុលហើយ ដើម្បីបើកឲ្យប្រជាពលរដ្ឋឆ្លងកាត់ ។
លោកអភិបាលខេត្តមានប្រសាសន៍ថា បើការជួសជុលរយៈពេលយូរ គឺយើងត្រូវបើកឲ្យពលរដ្ឋធ្វើចរាចរណ៍បណ្តើរជួសជុលបណ្តើរ តែបើការជួសជុលមានរយៈពេលឆាប់ យើងមិនទាន់បើកឲ្យពលរដ្ឋធ្វើចរាចរណ៍ទេ នៅពេលជួសជុលហើយរួចរាល់ ទើបបើកឲ្យបងប្អូនធ្វើចរាចរណ៍បាន ។
លោកអភិបាលខេត្តមានប្រសាសន៍ទៀតថា ទោះបីជាយ៉ាងណាក៏ត្រូវពន្លឿនការជួសជុលស្ពាននេះឲ្យបានឆាប់ ដើម្បីបើកឲ្យពលរដ្ឋធ្វើចរាចរណ៍នៅពេលដ៍ខ្លីខាងមុខនេះដែរ ។ ប៉ុន្តែការធ្វើចរាចរណ៍លើស្ពានដែលចាស់ទ្រុឌទ្រោមនេះ អនុញ្ញាតឲ្យបើកបរតែម៉ូតូ កង់ និងថ្មើរជើងប៉ុណ្ណោះ គឺមិនអាចឲ្យរថយន្តតូចធំឆ្លងកាត់បានទេ េដោយសារស្ពាននេះមានសភាពទ្រុឌទ្រោមណាស់ទៅហើយ ៕
ចែករំលែកព័តមាននេះ