ខេត្តត្បូងឃ្មុំ ៖ សាលាបឋមសិក្សាទួលវិហារ ស្ថិតក្នុងភូមិទួលវិហារ ឃុំជីរោទ៍ទី២ ស្រុកត្បូងឃ្មុំ ដោយសារតែបញ្ហាអាកាសធាតុក្តៅពេកនោះ នៅតាមបន្ទប់នីមួយៗ ក៏ត្រូវបានដាក់កង្ហារ ដើម្បីកាត់បន្ថយ កុំឱ្យសិស្សក្តៅស្អុះ ឬថប់ដង្ហើម តែបែរជាមានលេចឮប្រតិកម្មពីខាងអាណាព្យាបាលសិស្ស ពីរឿងទារលុយសម្រាប់ទូទាត់បង់ឱ្យថ្លៃភ្លើងអគ្គិសនីទៅវិញ ។
លោកហុង ហេន នាយសាលាបឋមសិក្សាទួលវិហារមានប្រសាសន៍ឱ្យដឹងនៅព្រឹកថ្ងៃទី០៤ សីហា ថា ក្នុងឆ្នាំ២០០៣ បានចាប់ផ្តើមកសាងសាលារៀននេះឡើង ដោយមានការជ្រោមជ្រែងពីសប្បុរសជនក្នុង និងក្រៅស្រុក រហូតដល់អគារសិក្សាបានលេចចេញជារូបរាងឡើង បានទទួលសិស្សឱ្យចូលរៀន ចាប់ពីកម្រិតមត្តេយ្យ រហូតដល់ថ្នាក់ទី៦ ហើយពីមួយឆ្នាំ ទៅមួយឆ្នាំ បរិមាណសិស្សចេះតែមានការកើនឡើង គួរឱ្យកត់សម្គាល់ ទីធ្លាសាលាពេលដែលមានភ្លៀងម្តងៗ មានភក់ជ្រាំពិបាកដើរ ។
លោកហុង ហេន នាយកសាលាបឋមសិក្សាទួលវិហារមានប្រសាសន៍បន្តថា ដោយមើលឃើញនូវផលពិបាកបែបនេះ ទើបរូបលោកបានសុំដី ដែលបានចាក់ធ្វើថ្នល់ជាតិលេខ៧ នៅខាងមុខសាលារៀន មកចាក់តាមរណ្តៅជ្រៅៗជាបន្តបន្ទាប់ សរុបមិនតិចជាង៧០០រថយន្តនោះទេ ។ ក្រោយមកទៀត ពេលដែលឃើញពីកង្វះខាតសិស្សក្រីក្រ នៅពេលដែលរៀនបញ្ចប់កំរិតថ្នាក់បឋម និងត្រូវបន្តទៅសិក្សានៅសាលាឆ្ងាយពីផ្ទះពេក ទើបរូបលោកបានប្រឹងប្រែងចលនាសុំសប្បុរសជនគ្រប់ទិសទី រហូតបានកកើត ជាអនុវិទ្យាល័យបានអគារសិក្សា១ខ្នងទៀត ។
ម្យ៉ាងវិញទៀត ដោយសារតែកត្តាអាកាសធាតុ មានការប្រែប្រួលក្តៅពេក សិស្សពិបាករៀនសូត្រ ទើបនៅឆ្នាំ២០១៥ រូបលោកបានកោះហៅគ្រូៗទាំងអស់ មកប្រជុំពិភាក្សា ដើម្បីរិះរកមធ្យោបាយបែបណា ដើម្បីជួយដល់សិស្ស គឺជម្រើសត្រូវដាក់កង្ហារតាមបន្ទប់នីមួយៗ ទើបសិស្សអាចអង្គុយរៀនបាន ។ ក្នុងនោះលុយ PAP របស់សាលាមានមានមិនគ្រប់គ្រាន់ក្នុងការចំណាយថ្លៃភ្លើង មានតែ៥ម៉ឺនរៀលទេ ទើបសុំឲ្យសិស្សជួយឧបត្ថម្ភក្នុងម្នាក់ៗចំនួន១០០០រៀល សម្រាប់បង់ភ្លើងក្នុង១ខែ បង់លុយដល់ទៅ១២ម៉ឺនរៀលបង់មិនគ្រប់ សាលាត្រូវចេញលុយដដែល ។
លោកហុង ហេន នាយកសាលាបឋមសិក្សាទួលវិហារបញ្ជាក់ថា មកដល់ព្រឹកថ្ងៃទី៤ សីហា ២០១៦ ស្រាប់តែរូបលោកបានឮប្រតិកម្មពីអាណាព្យាបាលសិស្សដោយថា ទារលុយថ្លៃភ្លើងក្នុងម្នាក់២០០០រៀល ពីសិស្សនោះ ជារឿងមួយមិនពិតទេ តាមពិតសុំឱ្យជួយតែម្នាក់ៗ១.០០០រៀលទេ ។ ដូច្នេះ សូមឱ្យលោកតាមដានមើលសិស្សណាដែលថា គេទារលើសចំនួននោះ ។ សម្រាប់ចំណីអាហារដែលគ្រូបានលក់ដូរ នៅក្នុងសាលារៀន គឺក្នុង១សប្តាហ៍ រូបលោកបានចុះពិនិត្យម្តង ប្រសិនណាបើលើសកាលបរិច្ឆេទថ្ងៃខែឆ្នាំមិនអនុញ្ញាតឱ្យលក់ដូរបានទេ ដើម្បីចៀសវាងកុំឱ្យប៉ះពាល់ដល់សុខភាពរបស់សិស្ស ។
ចែករំលែកព័តមាននេះ