ខេត្តសៀមរាប ៖ អ្នកមានគំនិតច្នៃប្រឌិតម្នាក់រស់នៅក្នុងភូមិមណ្ឌល៣ សង្កាត់ស្លក្រាម ក្រុងសៀមរាប ខេត្តសៀមរាប បានយកកម្ទេចរុក្ខជាតិកែច្នៃជាគំនូរ និងចម្លាក់ ។ អ្វីពិសេសជាងនេះទៅទៀតរបស់នៅជុំវិញផ្ទះដូចជា ដើមដូង ដើមត្នោត ល្ហុង ស្លឹកឈើ ងាប់ៗ និងសំណល់ផ្ទះបាយមួយចំនួនត្រូវបានយកកែច្នៃ ធ្វើជារូបគំនូរ និងចម្លាក់សម្រាប់លក់ឱ្យអ្នកទេសចរ ។
លោករៀម មុន្នីស៊ីឡុង ជាអ្នកច្នៃប្រឌិតឱ្យដឹងកាលពីពេល ថ្មីៗកន្លងមកថា លោកយកកម្ទេចរុក្ខខាជាតិនៅជុំវិញផ្ទះមានដូចជា ដើមដូង ដើមត្នោត ល្ហុង ស្លឹកឈើ ងាប់ៗ និងកាកសំណល់នៅផ្ទះបាយមួយចំនួនកែច្នៃធ្វើជារូបគំនូរ និងចម្លាក់សម្រាប់លក់ឱ្យភ្ញៀវទេសចរ ហើយមើលទៅឱ្យពួកគេចាប់អារម្មណ៍ និងកោតសរសើរពីស្នាដៃរបស់លោក ។
លោករៀម មុន្នីស៊ីឡុង ឱ្យដឹងថា ពីដំបូងលោកនៅជាមួយអង្គការមួយដែលអង្គការនោះបង្រៀនរបៀបយកស្លឹកឈើច្នៃធ្វើជាក្រដាសសរសេរ ។ នៅពេលលោកត្រឡប់ទៅផ្ទះវិញក៏មានគំនិតកែច្នៃកម្ទេចរុក្ខជាតិ ដែលមាននៅជុំវិញខ្លួនឱ្យក្លាយទៅជារបស់មានតម្លៃ សម្រាប់ជួយដល់ក្រុមគ្រួសាររបស់លោក ។
របៀបនៃការធ្វើរូបគំនូរ ឬរូបចម្លាក់ពីកម្ទេចរុក្ខជាតិនេះ គឺធ្វើតម្រូវទៅតាមប្រភេទនៃរូប នីមួយៗ ដូចជា ធ្វើរូបសត្វដំរី ត្រូវយកកាកសំណល់ស្លឹកឈើមកបុក ហើយលាយជាមួយជ័រ រួចយកទៅដាក់ក្នុងពុម្ពរូបសត្វដំរី ឬប្រភេទសត្វផ្សេងៗដែលចង់បាន បន្ទាប់មកយករូបចេញពីពុម្ពលៀបជ័រនិងផាត់ពណ៌តាមដែលចង់បាន ។ សម្រាប់រូបគំនូរវិញគឺធ្វើទៅតាមប្រភេទគំនូរដូចគ្នាដែរ ។ ឧទាហរណ៍យកស្រកីដូង ឬស្លឹកត្នោតមកគូរគំនូរ ហើយយកជ័រមកលៀបស្រកីដូងឱ្យរឹងទើបគូររូបនៅលើនោះតែម្តង ។ ចំណែកឯកាកសំណល់ផ្ទះបាយវិញ គឺអាចយកបានមួយចំនួនដូចជា ស្រកាត្រីយកបិទធ្វើរូបគំនូរអប្សរាជាដើម ។
លោករៀម មុន្នីស៊ីឡុង ឱ្យដឹងថា ដំបូងឡើយទីផ្សារសម្រាប់លក់រូបគំនូរ និងរូបចម្លាក់ដែលច្នៃពីកម្ទេចកម្ទីរុក្ខជាតិពិបាកណាស់ ប៉ុន្តែឥឡូវលក់ដាច់នៅតាមសណ្ឋាគារ និងផ្សារលក់ផលិតផលខ្មែរ ។ រូបគំនូររបស់លោកមួយផ្ទាំងមានតម្លៃ១៥០ដុល្លារ ។ ចំណូលពីការលក់រូបទាំងនោះមិនទាន់ឆ្លើយតបបានទៅនឹងតម្រូវការចាយវាយប្រចាំថ្ងៃក្នុងគ្រួសាររបស់លោករៀមមុន្នីស៊ីឡុងទេ ។ ដូច្នេះលោកអំពាវនាវឱ្យអ្នកទេសចរជួយគាំទ្រស្នាដៃច្នៃប្រឌិតពីកាកសំណល់ទៅជាគ្រឿងលម្អរបស់លោកផង ដើម្បីឱ្យលោក
មានទឹកចិត្តធ្វើបន្ត និងធ្វើឱ្យក្រុមគ្រួសារ លោកមានជីវភាពធូរធារជាងមុន ៕
ចែករំលែកព័តមាននេះ