កងទ័ពកូរ៉េខាងត្បូង និងកងទ័ពអាមេរិកកាលពីថ្ងៃទី៧ មីនា បានបង្ហាញពីឆន្ទៈរបស់ខ្លួនប្រឆាំងនឹងការគំរាមកំហែងយោធាជាយថាហេតុក្នុងសមយុទ្ធបាញ់គ្រាប់ពិតចូលរួមដោយរថក្រោះធុន STRYKER ។
រថក្រោះធុន STRYKER ៤គ្រឿង និងទាហានប្រមាណជា៤០នាក់បានចូលរួមក្នុងសមយុទ្ធដែលប្រព្រឹត្តទៅនៅក្បែរ POCHEON ចម្ងាយ៤០គីឡូម៉ែត្រភាគឥសានក្រុងសេអ៊ូល។ សមយុទ្ធបាញ់គ្រាប់ពិតនោះ គឺសំដៅសាកល្បងសមត្ថភាពរបស់រថពាសដែកធុន STRYKER ជាផ្នែកមួយនៃសមយុទ្ធយោធាប្រចាំឆ្នាំបច្ចុប្បន្នរវាងប្រទេសទាំង២ដែលកូរ៉េខាងជើងចាត់ទុកថា ជាការរៀបចំធ្វើការលុកលុយ។ ក៏ប៉ុន្តែក្រុងសេអ៊ូលវិញអះអាងថា សមយុទ្ធនេះមានលក្ខណៈការពារ។
រថពាសដែកធុន STRYKER បញ្ជូនមកពីមូលដ្ឋានយោធា FORT LEWIS រដ្ឋវ៉ាសីុនតោនត្រូវបានដាក់ពង្រាយនៅកូរ៉េខាងត្បូងសំរាប់សមយុទ្ធប្រចាំឆ្នាំមានឈ្មោះថា KEY RESOLVE / FOAL EAGLE ដែលចាប់ផ្តើមពីថ្ងៃទី២៨ កុម្ភៈ មកហើយប្រមូលផ្តុំទាហានអាមេរិក១២.៣០០នាក់ និងទាហានកូរ៉េខាងត្បូងប្រមាណជា២០០.០០០នាក់ ៕
ចែករំលែកព័តមាននេះ