រាជធានីភ្នំពេញ ៖ ជនសង្ស័យម្នាក់ក្នុងចំណោមគ្នា២នាក់ ត្រូវបានកម្លាំងនគរបាលខណ្ឌដង្កោ ដេញតាមចាប់ខ្លួនបានភ្លាមៗ បន្ទាប់ពីពួកគេធ្វើសកម្មភាព កាច់សោកម៉ូតូមួយគ្រឿង ដែលជាកម្មសិទ្ធិបុរសម្នាក់
រាជធានីភ្នំពេញ ៖ ជនសង្ស័យម្នាក់ក្នុងចំណោមគ្នា២នាក់ ត្រូវបានកម្លាំងនគរបាលខណ្ឌដង្កោ ដេញតាមចាប់ខ្លួនបានភ្លាមៗ បន្ទាប់ពីពួកគេធ្វើសកម្មភាព កាច់សោកម៉ូតូមួយគ្រឿង ដែលជាកម្មសិទ្ធិបុរសម្នាក់ ដែលបានជិះទៅច្រូតស្មៅ ហើយដាក់ឆ្ងាយពីខ្លួន រវល់តែច្រូតស្មៅស្រាប់តែ ក្រុមជនសង្ស័យខាងលើ នាំគ្នាចូលទៅកាច់សោក ជិះគេចខ្លួន ប៉ុន្តែខណៈនោះជនរងគ្រោះ បានឃើញទាន់បានស្រែកថាចោរៗ បង្កឲ្យ មានការភ្ញាក់ផ្អើល។
ហេតុការណ៍ចាប់ឃាត់ខ្លួននោះបានកើតឡើង កាលពីវេលាម៉ោង៣និង៥៥នាទី រសៀលថ្ងៃទី១ ខែសីហា ឆ្នាំ ២០១៦ ស្ថិតនៅភូមិអន្លូងគងចាស់ សង្កាត់ព្រៃស ខណ្ខដង្កោ រាជធានីភ្នំពេញ ក្រោមការចង្អុលបង្ហាញ ពី លោកវរៈសេនីយ៍ទោ ជឹម ស៊ីថា អធិការខណ្ឌដង្កោ ។ ម៉ូតូដែលចោរលួចនោះ ម៉ាកហុងដាឌឌ្រីមសេ១២៥ ស៊េរីឆ្នាំ២០០៧ ពណ៌ខ្មៅពាក់ស្លាកលេខ សៀមរាប1F- 7114 ជាកម្មសិទ្ធិរបស់បុរសម្នាក់ឈ្មោះ ចិត្រ រ៉ានី អាយុ២៨ឆ្នាំ ស្នាក់នៅក្នុងភូមិកើតហេតុខាងលើ។
ដោយឡែកជនសង្ស័យ ដែលត្រូវចាប់ខ្លួននោះ ឈ្មោះ ទ្រី ភាស់ អាយុ៣០ឆ្នាំ ស្នាក់នៅផ្ទះជួលក្នុងសង្កាត់ចោមចៅខណ្ខពោធិ៍សែនជ័យ និងមានស្រុកកំណើតនៅក្នុងខេត្តរតនគីរី។ រីឯបក្សពួកម្នាក់ទៀត បានរត់គេចខ្លួនបាត់ស្រមោល ដោយជិះម៉ូតូម៉ាកស៊ុយហ្ស៊ុយគីណិចមួយគ្រឿង។ ជនរងគ្រោះបានឲ្យដឹងថា នៅមុនពេលកើតហេតុ ខ្លួនបានជិះម៉ូតូ១គ្រឿងនោះ ចេញពីផ្ទះទៅចំណុច កើតហេតុខាងលើ ច្រូតស្មៅឲ្យគោស៊ី លុះពេលទៅដល់ ខ្លួនបានទុកម៉ូតូតាមផ្លូវលំ បន្ទាប់មកបានច្រូតស្មៅ ខណៈនោះស្រាប់តែមានជនសង្ស័យ២នាក់ បានជិះម៉ូតូ១គ្រឿងទៅឈប់ជិត រួចម្នាក់ដែលជិះខាងក្រោយ បានចុះទៅធ្វើសកម្មភាពកាច់ក បានសម្រេច ហើយជិះរត់គេចខ្លួន ទើបខ្លួនស្រែកថាចោរៗដើម្បីឲ្យអ្នក ភូមិជួយ។
នគរបាលបានឲ្យដឹងថា ក្រោយពីមានសម្រែកថាចោរៗយ៉ាងកងរំពង លោកអធិការនគរបាល ខណ្ឌដង្កោ ជឹម ស៊ីថា បានបញ្ជាឲ្យកម្លាំងទាំងអស់ ចេញអន្តរាគមន៍ដេញតាមរហូតដល់ត្រង់ចំណុចមុខវត្ត ព្រះធាតុ តាមផ្លូវជាតិលេខ២ ស្ថិតក្នុងភូមិព្រះធាតុ សង្កាត់រលួស ខណ្ឌដង្កោ ទើបចាប់បាន បន្ទាប់មកនាំទៅ អធិការដ្ឋានខណ្ឌ រង់ចាំការសាកសួរ និងកសាងសំណុំរឿងបញ្ជូនទៅតុលាការ៕
ចែករំលែកព័តមាននេះ