ប្រទេសថៃ ៖ ពាណិជ្ជករសិង្ហបុរីកំពុងត្រៀមខ្លួនជាស្រេចក្នុងការនាំចូលអង្ករថៃកាន់តែច្រើន រួមទាំងការនាំចេញឡើងវិញទៅកាន់បណ្តាប្រទេសទី៣ បើសិនជាអង្ករថៃនៅតែមានគុណភាពល្អ តម្លៃមានស្ថិរភាព ហើយរដ្ឋាភិបាលថៃមិនបានអនុវត្តកម្មវិធីឧបត្ថម្ភធនណាមួយដល់កសិករ ។ នេះបើយោងតាមរដ្ឋមន្ត្រីក្រសួងពាណិជ្ជកម្ម លោកស្រី Apiradi Tantraporn ។
បន្ទាប់ពីបានដឹកនាំបេសកកម្មមួយដើម្បីលើកកម្ពស់អង្ករថៃ នៅប្រទេសសិង្ហបុរីក្នុងសប្តាហ៍នេះ លោកស្រី Apiradi បាននិយាយថា ប្រទេសនេះអាចនឹងក្លាយជាដៃគូយុទ្ធសាស្ត្រ ដែលជាទីផ្សារធំសម្រាប់អង្ករ Hom Mali (ផ្កាម្លិះ) និងគ្រាប់ពូជស្រូវរបស់ប្រទេសថៃ ។ អ្នកប្រើប្រាស់ជនជាតិសិង្ហបុរីបានទិញច្រើន ហើយពួកគេចង់បានអាហារដែលផ្តល់សុខភាពល្អ ដូចជា អង្ករសម្រូប អង្ករក្រហម Riceberry និងអង្ករមិនទាន់កែច្នៃរបស់ថៃ ។
លើសពីនេះទៀត ប្រទេសសិង្ហបុរី គឺជាមជ្ឈមណ្ឌលនៃការធ្វើពាណិជ្ជកម្មក្នុងតំបន់មួយ ដែលអាចជួយប្រទេសថៃ អាចចែកចាយអង្កររបស់ខ្លួនទៅកាន់បណ្តាប្រទេសទី៣ ។
លោកស្រីបន្តថា ដោយសារហេតុផលទាំងអស់នេះហើយ ទើបក្រសួងនឹងបន្តជំរុញការនាំចេញអង្ករទៅកាន់ទីផ្សារនេះ ។
ជារៀងរាល់ឆ្នាំ ប្រទេសសិង្ហបុរីបាននាំចូលអង្ករប្រមាណ៤២ម៉ឺនតោនសម្រាប់ការប្រើប្រាស់ក្នុងស្រុក ដែលក្នុងនោះប្រទេសថៃជាអ្នកផ្គត់ផ្គង់ដ៏សំខាន់មួយ ដែលបាននាំចេញប្រមាណ១៣ម៉ឺនតោនទៅកាន់ប្រទេសនេះជារៀងរាល់ឆ្នាំ ។ សិង្ហបុរី ក៏មានពាណិជ្ជករអន្ដរជាតិជាច្រើនដែលដឹកជញ្ជូនអង្ករប្រមាណ១០លានតោនទៅកាន់ប្រទេសជាច្រើន ភាគច្រើននៅក្នុងទ្វីបអាហ្វ្រិក និងមជ្ឈិមខាងកើត ។
លោកស្រី Apiradi បានឱ្យដឹងថា បន្ទាប់ពីបានទទួលមតិពីឈ្មួញសិង្ហបុរី លោកស្រីបានរកឃើញថា ពួកគេចង់ឱ្យរដ្ឋាភិបាលថៃធានាឱ្យបាននូវអង្ករដែលមានគុណភាពល្អសម្រាប់នាំចេញ និងមិនវិលត្រឡប់ទៅកាន់គម្រោងឧបត្ថម្ភធន ដែលនឹងធ្វើឱ្យខូចយន្តការទីផ្សារ និងធ្វើឱ្យអង្ករពិបាកលក់ ។ លោកស្រីនិយាយថា ៖ «ក្រសួងរបស់លោកស្រី នឹងសហការជាមួយអ្នកនាំចេញដើម្បីជំរុញការលក់អង្ករថៃនៅប្រទេសសិង្ហបុរី ដោយផ្តោតលើអង្ករ Hom Mali និងគ្រាប់ពូជស្រូវ និងផលិតផលបន្ថែមតម្លៃដែលធ្វើពីអង្ករ » ។
នៅក្នុងការព្យាយាមដើម្បីបង្កើនតម្លៃនៃការនាំចេញអង្ករនេះ រដ្ឋាភិបាលមានយុទ្ធសាស្ត្រដើម្បីជំរុញអង្ករនៅក្នុងទីផ្សារនានា ។ ប្រទេសសិង្ហបុរី គឺជាទីផ្សារគោលដៅសម្រាប់បង្កើនការលក់អង្កររបស់ថៃ ដែលវាជាអាហារចម្បងនៅទីនោះ ។
ក្នុងអំឡុងពេលបេសកកម្មនេះ លោកស្រី Apiradi បានជួបជាមួយឈ្មួញអង្ករសំខាន់៧នាក់នៅប្រទេសសិង្ហបុរី ហើយលោកស្រីក៏បានវាស់ស្ទង់ពាណិជ្ជករទំនើប និងភោជនីយដ្ឋាននៅក្នុងប្រទេសនេះទៅលើលទ្ធភាពក្នុងការលក់អង្ករថៃ ។
ក្រៅពីអង្ករ Hom Mali ប្រទេសថៃកំពុងតែលើកកម្ពស់ប្រភេទអង្ករផ្សេងទៀតដូចជា Riceberry អង្ករ Sung Yod (ដែលជាផលិតផលការបង្ហាញភូមិសាស្ត្រ) និងអង្ករសម្រូបសរីរាង្គ។
ផលិតផលធ្វើពីអង្ករ ក៏ត្រូវបានគេផ្សព្វផ្សាយច្រើនដែរដូចជា អង្ករឆ្អិនសម្រាប់មនុស្សចាស់, អង្ករបន្ថែមវីតាមីនសម្រាប់កុមារ, គ្រឿងសម្អាង, អាហារសម្រន់ និងអាហារបំប៉ន។
កាលពីឆ្នាំ២០១៤ ប្រទេសថៃបាននាំចេញអង្ករចំនួន១៦២.៩៧៧តោនទៅកាន់ប្រទេសសិង្ហបុរី ដែលមានតម្លៃ៤,៣ប៊ីលានបាត ។ បរិមាណនេះបានធ្លាក់ចុះដល់ទៅ១២៨.៩៤១តោន ស្មើនឹងតម្លៃ៣,៦៣ប៊ីលានបាតកាលពីឆ្នាំមុន ។ ក្នុងរយៈពេល៧ខែដំបូងនៃឆ្នាំនេះ ទំហំនៃការនាំចេញបានធ្លាក់ចុះ៧,៩% ដែលមានចំនួន៥១.១៩៤តោន ខណៈដែលតម្លៃបានធ្លាក់ចុះ១១% ស្មើនឹងចំនួន១,៣៤ប៊ីលានបាត ។
ប្រទេសថៃត្រូវគេរំពឹងថា នឹងនាំចេញអង្ករប្រមាណ១៣ម៉ឺនតោនទៅប្រទេសសិង្ហបុរី ក្នុងឆ្នាំនេះ ។
លោក Ho Siang Ow ប្រធានគ្រប់គ្រងក្រុមហ៊ុន Wee Tiong ដែលជាក្រុមហ៊ុនពាណិជ្ជកម្មអង្ករធំមួយរបស់សិង្ហបុរី បានឱ្យដឹងថា ពាណិជ្ជករចង់ឲ្យអង្កររបស់ថៃមានស្ថិរភាពគុណភាព និងតម្លៃ ។ ដូច្នេះ ពួកគេអាចបន្តការលក់នៅលើទីផ្សារក្នុងស្រុក ព្រមទាំងប្រទេសដទៃទៀត ។ លោកនិយាយថា ៖ « ខណៈដែលមីយ៉ាន់ម៉ា និងវៀតណាមមានអង្ករក្រអូប ហើយតម្លៃមានការប្រកួតប្រជែងខ្លាំង ប្រសិនបើតម្លៃអង្កររបស់ថៃឡើងចុះ ហើយគុណភាពរបស់វាគ្មានស្ថិរភាព ឈ្មួញប្រហែលជាមិនអាចលក់វានៅក្នុងពេលអនាគតបានទេ ។ លើសពីនេះទៀត ប្រទេសថៃមិនគួរឧបត្ថម្ភធនតម្លៃអង្ករ ដែលជាការរំខានដល់តម្លៃទីផ្សារ និងបណ្តាលឲ្យផលិតផលមានគុណភាពទាប ដោយសារកសិករព្រួយបារម្ភជាមួយនឹងទិន្នផល » ។
លោកបន្ថែមថា ជនជាតិសិង្ហបុរីចង់បានអាហារដែលធ្វើឲ្យពួកគេមានសុខភាពល្អ។ អង្ករថៃអាចបម្រើតម្រូវការនោះបាន ប៉ុន្តែការផ្សព្វផ្សាយផលិតផលថ្មីអាចប្រើពេលយូរ និងគុណភាពចាំបាច់ត្រូវរក្សាឲ្យបាន ។
លោក Charoen Laothamatas ប្រធានសមាគមនាំចេញអង្កររបស់ប្រទេសថៃ បានថ្លែងថា ប្រទេសសិង្ហបុរី គឺជាទីផ្សារសក្តានុពលខ្ពស់ជាងគេសម្រាប់ការនាំចេញអង្ករដែលមានគុណភាពខ្ពស់ ដោយសារការទិញរបស់ពលរដ្ឋសិង្ហបុរីមានកម្រិតខ្ពស់ ខណៈមានឈ្មួញទំនើបជាង៣០នាក់ជួយចែកចាយអង្ករថៃដល់អ្នកប្រើប្រាស់ ។ លោកនិយាយថា ៖ «ក្រុមហ៊ុននាំចេញត្រូវការជំរុញអង្ករថៃ ក្រោមការជឿទុកចិត្តលើម៉ាកអង្ករជាច្រើនរបស់អ្នកប្រើប្រាស់ » ។
លោក Chookiat Ophaswongse ប្រធានកិត្តិយសនៃសមាគមនេះ បានឱ្យដឹងថា ក្រុមហ៊ុននាំចេញបានប្រមើលមើលឃើញថា អាស៊ីមានការកើនឡើងនៃទីផ្សារយ៉ាងសកម្ម ខណៈដែលការទិញរបស់អតិថិជនកើនឡើង នៅពេលដែលពួកគេបានចាត់ទុកអង្ករជាអាហារដ៏ចម្បងមួយ ។
លោកបន្ថែមទៀតថា ការនាំចេញអង្កររបស់ប្រទេសថៃទៅកាន់ទីផ្សារអាស៊ី អាចនឹងកើនឡើងពី២០% នៃបរិមាណនាំចេញសរុប ក្នុងចន្លោះពី៩លានតោន ទៅ១០លានតោន រហូតដល់៣០% នាពេលដ៏ខ្លីខាងមុខនេះ ។
បច្ចុប្បន្ននេះ អាហ្វ្រិកគឺជាទីផ្សារនាំចេញអង្ករដ៏ចម្បងសម្រាប់ប្រទេសថៃ ។
លោក Chookiat បានអំពាវនាវឱ្យរដ្ឋាភិបាលបន្តការលើកកម្ពស់អង្ករនៅបណ្តាប្រទេសអាស៊ី អឺរ៉ុប និងបណ្តាប្រទេសនៅមជ្ឈិមបូព៌៌ា ខណៈមានការធានាឱ្យមានស្ថិរភាពតម្លៃអង្ករ និងគុណភាពល្អនៃផលិតកម្ម ៕
ចែករំលែកព័តមាននេះ