ប្រទេសថៃ ៖ យោងតាមសហព័ន្ធឧស្សាហកម្មថៃ (FTI) បានឱ្យដឹងថា ភាពអត់ការងារធ្វើនៅប្រទេសថៃ កាន់តែកើនឡើងក្នុងអំឡុងពេលប៉ុន្មានខែមកនេះ ដែលឆ្លុះបញ្ចាំងពីកង្វះនៃការវិនិយោគថ្មីនៅក្នុងប្រទេសនេះ
ប្រទេសថៃ ៖ យោងតាមសហព័ន្ធឧស្សាហកម្មថៃ (FTI) បានឱ្យដឹងថា ភាពអត់ការងារធ្វើនៅប្រទេសថៃ កាន់តែកើនឡើងក្នុងអំឡុងពេលប៉ុន្មានខែមកនេះ ដែលឆ្លុះបញ្ចាំងពីកង្វះនៃការវិនិយោគថ្មីនៅក្នុងប្រទេសនេះ ខណៈឧស្សាហកម្មភាគច្រើននៅតែខ្វះកម្មករដដែល ហើយវាក៏បានបង្ហាញពីភាពបរាជ័យនៃវិស័យអប់រំរបស់ប្រទេសទៀតផង ។
យ៉ាងណាមិញ បើទោះជាអត្រាអត់ការងារធ្វើបានកើនឡើងកាលពីខែមុន១,២%ក្តី ក៏អាជីវកម្មផ្សេងៗហាក់ដូចជាគ្មានបញ្ហាអ្វីកើតឡើងទេ ដោយសារតែឧស្សាហកម្មភាគច្រើនបានរក្សាកម្រិតកម្មកររបស់ខ្លួន ។ អត្រាគ្មានការងារដ៏ខ្ពស់នេះ គឺជាលទ្ធផលនៃចំនួននិស្សិតទើបបញ្ចប់ការសិក្សា ដែលមិនអាចរកការងារធ្វើបាន ព្រោះតែគ្មានការវិនិយោគថ្មីៗ ហើយនិស្សិតមួយចំនួនទៀតគ្មានគ្រប់តម្រូវការរបស់ក្រុមហ៊ុន ឬឧស្សាហកម្មផ្សេងៗ ។
លោក Chen Namchaisiri ប្រធាន FTI បាននិយាយថា ឧស្សាហកម្មភាគច្រើនមិនបានបញ្ឈប់កម្មករឡើយ ហើយឧស្សាហកម្មខ្លះទៀត នៅតែជ្រើសរើសកម្មករបរទេស និងត្រូវការពលករជំនាញ ។
លោកបន្ថែមទៀតថា ការបញ្ឈប់ការងារពីឧស្សាហកម្មរថយន្តនាពេលថ្មីៗនេះ ជាលទ្ធផលនៃកិច្ចសន្យាការងារផុតកំណត់ តែមិនមែនមកពីកត្តាកំណើនពាណិជ្ជកម្មយឺតនោះទេ ។
លោកលើកឡើងថា និស្សិតដែលទើបបញ្ចប់ការសិក្សាថ្មីៗបានប្រឈមមុខនឹងភាពលំបាកក្នុងការស្វែងរកការងារធ្វើ ដោយសារតែជំនាញពួកគេមិនត្រូវតាមតម្រូវការរបស់ក្រុមហ៊ុន ឬឧស្សាហកម្ម ហើយបញ្ហានេះកើតភាគច្រើនតែចំពោះនិស្សិតបញ្ចប់ការសិក្សាពីសាលាបណ្តុះបណ្តាលវិជ្ជាជីវៈតែប៉ុណ្ណោះ ។
ទន្ទឹមនឹងនេះ លោក Chen ថ្លែងថាអត្រាកំណើនភាពអត់ការងារធ្វើនេះ បានឆ្លុះបញ្ចាំងពីការបរាជ័យនៃប្រព័ន្ធអប់រំរបស់ប្រទេសថៃ ក្នុងការបណ្តុះបណ្តាលធនធានមនុស្សឱ្យសមស្របទៅតាមតម្រូវការនៃកំណើនឧស្សាហកម្ម។ ការផ្តោតទៅលើតែវិស័យឧស្សាហកម្មបច្ចេកវិទ្យាខ្ពស់របស់រដ្ឋាភិបាលថៃ វាគួរតែអភិវឌ្ឍន៍លើប្រព័ន្ធអប់រំជំនួសវិញ ដើម្បីបណ្តុះបណ្តាលជំនាញដល់សិស្ស-និស្សិត ក៏ដូចជាបង្កើនគុណភាពសាលាវិជ្ជាជីវៈផងដែរ ។
លោក Chen បានលើកឡើងដូច្នេះថា ៖ « សាលាវិជ្ជាជីវៈថៃ ត្រូវតែមានការផ្លាស់ប្តូរ។ សហព័ន្ធបានជំរុញឱ្យសាលាវិជ្ជាជីវៈទាំងអស់ សហការជាមួយសាលាវិជ្ជាជីវៈអន្តរជាតិ ដើម្បីកែលម្អមុខជំនាញ និងគុណភាពរបស់ខ្លួន ។ ដូចនេះ អាណាព្យាបាលកាន់តែច្រើននឹងបញ្ជូនកូនរបស់ពួកគេឱ្យមកសិក្សានៅសាលាវិជ្ជាជីវៈ ដែលអាចធានាបានពីឱកាសការងារក្រោយពីបញ្ចប់ការសិក្សា » ។
FTI បានសហការជាមួយសាលាវិជ្ជាជីវៈបរទេសមួយចំនួនដើម្បីលើកកម្ពស់អាជីពការងារច្បាស់លាស់ ។ បណ្តាប្រទេសគោលដៅមួយចំនួន ជាមួយនឹងបទពិសោធន៍ក្នុងការបណ្តុះបណ្តាលនិស្សិតបញ្ចប់ការសិក្សាប្រកបដោយជំនាញវិជ្ជាជីវៈ រួមមាន ប្រទេសជប៉ុន អូទ្រីស និងអាល្លឺម៉ង់ ។
យោងតាមការិយាល័យនៃក្រុមប្រឹក្សាសេដ្ឋកិច្ចជាតិ និងការអភិវឌ្ឍសង្គម បានឱ្យដឹងថា ភាពអត់ការងារធ្វើបានបន្តកើនឡើងពីមធ្យមភាគនៃ០,៦%-០,៩% ពីរបីឆ្នាំមុន ទៅ ១,២%កាលពីខែមុន ។
ជាងនេះទៀត ជិត១ភាគ៣(២៧%) នៃសិស្សចំនួន២៧ម៉ឺននាក់ដែលបាន បញ្ចប់ ការសិក្សាកាលពីឆ្នាំមុន មិនអាចស្វែងរកការងារធ្វើបានឡើយ ខណៈឧស្សាហកម្មមួយចំនួននៅតែទាមទារជួលកម្មករជំនាញ ភាគច្រើនមកពីសាលាវិជ្ជា ជីវៈ ។ ការិយាល័យនៃគណៈកម្មាធិការឧត្តមសិក្សាបានរាយការណ៍ថា ច្រើនជាងពាក់កណ្តាល នៃចំនួនសិស្សបញ្ចប់ការសិក្សា២៧ម៉ឺននាក់បានជ្រើសរើសជំនាញវិទ្យាសាស្ត្រ សង្គម មនុស្ស និងវិទ្យាសាស្ត្រការអប់រំដែលមុខជំនាញទាំងអស់នេះមិនសូវ មានតម្រូវការឡើយនៅតាមឧស្សាហកម្មនានា ។
លោក Bhumindr Harinsut អនុប្រធានសភាពាណិជ្ជកម្មថៃ មានប្រសាសន៍ថា កំណើនភាពគ្មានការងារធ្វើ ជាលទ្ធផលនៃការបរាជ័យក្នុងការពង្រីកអាជីវកម្ម ឬមិនអាចទាក់ទាញការវិនិយោគថ្មីៗ ស្របពេលកំណើនសេដ្ឋកិច្ចទាប ប៉ុន្តែបច្ចុប្បន្ននេះមិនទាន់មានសញ្ញានៃការបញ្ឈប់ពីការងារនោះទេ ។
លោក Bhumindr បន្ថែមថា ៧០%-៨០%នៃនិស្សិតបញ្ចប់ការសិក្សា មិនអាចឆ្លើយតបទៅនឹងតម្រូវការឧស្សាហកម្ម និងអាជីវកម្មផ្សេងៗបានទេ ។ ហេតុនេះហើយបានជាអត្រាភាពអត់ការងារធ្វើកើនឡើងក្នុងអំឡុងពេលប៉ុន្មានខែកន្លងមកនេះ ។
អនុរដ្ឋមន្ត្រីពាណិជ្ជកម្ម លោក Suvit Maesincee ទទួលស្គាល់ថា ការផ្សព្វផ្សាយរបស់រដ្ឋាភិបាលនៃម៉ូដែល «Thailand 4.0» អាចនឹងធ្វើឱ្យមានភាពអត់ការងារធ្វើក្នុងចំណោមកម្មករគ្មានជំនាញ ។ រដ្ឋាភិបាលនឹងព្យាយាមកាត់បន្ថយបញ្ហានេះ និងលើកកម្ពស់ការអភិវឌ្ឍប្រព័ន្ធអប់រំក្នុងប្រទេស ៕
ចែករំលែកព័តមាននេះ