ទីភ្នាក់ងារព័ត៌មានបរទេស កាលពីពេលថ្មីៗកន្លងមកផ្សាយថា បុរសអីុរ៉ង់បានចូលរួមទាមទារសិទ្ធិឱ្យស្ត្រីអាចបង្ហាញសក់របស់ខ្លួននៅទីសាធារណៈបាន ដោយមិនបាច់ពាក់ក្រណាត់ ឬ «Hijab» ។ បុរសដែលចូលរួមទាមទារសិទ្ធិនោះពាក់ «Hijab» ឈរជាមួយប្រពន្ធ ហើយបង្ហោះរូបតាមហ្វេសប៊ុក ។
សិទ្ធិរបស់ស្ត្រីបានគ្របដណ្តប់ដោយច្បាប់អ៊ិស្លាមតាំងពីឆ្នាំ១៩៧៩ ដោយកំណត់ថាស្ត្រីគ្រប់រូបត្រូវពាក់ក្រណាត់រុំសក់ ឬ «Hijab» ប្រសិនបើល្មើសត្រូវពិន័យជាប្រាក់ ឬសម្រេចឱ្យជាប់គុក ។ ទោះបីជាប្រឈមមុខនឹងការជាប់គុកក៏ដោយ មានស្ត្រីមួយចំនួនចាកចេញពីផ្ទះមិនពាក់ «Hijab» និងមានស្ត្រីខ្លះកោរសក់ទៀតផង ។
សមាគម «My Stealthy Freedom» ឬ «សេរីភាពលាក់លៀមរបស់ខ្ញុំ» បង្កើតឡើងដោយលោកស្រី Masih Alinejad ជាសកម្មជនរស់នៅក្រុងញូវយ៉ក បានទាមទារឱ្យបុរសចូលរួមទាមទារសិទ្ធិស្ត្រីអាចបង្ហាញសក់នៅទីសាធារណៈ ។ បុរសចូលរួមត្រូវយកក្រណាត់រុំក្បាលសម្តែងការប្រឆាំង ។
លោកស្រី Alinejad បានទទួលរូបភាពបុរសពាក់ក្រណាត់រុំក្បាលចំនួន៣០នាក់ តាំងពីចាប់ផ្តើមគម្រោងការនៅថ្ងៃទី២២ កក្កដា ២០១៦មក ហើយលោកស្រីបញ្ជាក់ថា បុរសទាំងនោះភាគច្រើនរស់នៅអីុរ៉ង់ និងបានឃើញទុក្ខកង្វល់របស់ស្ត្រីដែលត្រូវប៉ូលិសបង្ខំឱ្យពាក់«Hijab» ។ ស្របពេលជាមួយគ្នានេះ បុរសអីុរ៉ង់ម្នាក់បានបង្ហាញរូបភាព រួមទាំងបញ្ជាក់ថា «ខ្ញុំពាក់ Hijab មួយរយៈពេលដើម្បីបានយល់ពីអារម្មណ៍របស់ប្រពន្ធ ដែលពាក់ Hijab ជារៀងរាល់ថ្ងៃ» ៕
ចែករំលែកព័តមាននេះ