AFP ផ្សាយកាលពីពេល ថ្មីៗកន្លងមកថា អាជ្ញាធររដ្ឋ Uttarakhand ភាគខាងជើងប្រទេសឥណ្ឌា បានចំណាយប្រាក់ចំនួន២៥០លានរូពី ឬប្រហែល៣៦លានដុល្លារ ដើម្បីរុករករុក្ខជាតិឱសថបុរាណ «Sanjeevani Booti» នៅលើកំពូលភ្នំហិមាល័យ ដែលជឿថា អាចជួយប្រស់ជីវិតមនុស្សឱ្យរស់ឡើងវិញបានដូចក្នុងរឿងរាមកេរ្តិ៍ដែលជួយជីវិតព្រះលក្ម្សណ៍ជាអនុជរបស់ព្រះរាម ។
រុក្ខជាតិជាច្រើនប្រភេទនៅលើភ្នំហិមាល័យ មានគុណសម្បត្តិជាឱសថ ប៉ុន្តែមានភស្តុតាងមិនគ្រប់គ្រាន់ថា តើរុក្ខជាតិ Sanjeevani Booti នៅមានឬអត់ ព្រោះកន្លងមកបណ្តាអ្នកប្រាជ្ញ និងអ្នកស្រាវជ្រាវបរាជ័យក្នុងការរកឃើញវាអស់រយៈពេលរាប់រយឆ្នាំមកហើយ ។
លោក Surendra Singh Negi រដ្ឋមន្ត្រីក្រសួងសុខាភិបាលនៃរដ្ឋ Uttarakhand ឱ្យដឹងកាលពីថ្ងៃទី២៨ កក្កដា ២០១៦ ថា «ការស្វែងរករុក្ខជាតិឱសថ Sanjeevani Booti នឹងចាប់ផ្តើមក្នុងពេល ឆាប់ៗខាងមុខ យើងត្រូវសាកល្បង ហើយវាមិនសាបសូន្យទេ ប្រសិនបើយើងព្យាយាមនឹងរកឃើញជាក់ជាមិនខាន ។
ការស្វែងរកនឹងផ្តោតខ្លាំងនៅលើភ្នំ Dronagiri ជាសាខាមួយរបស់ភ្នំហិមាល័យ ក្បែរព្រំដែនប្រទេសចិន គឺជាប្រភពដែលបានបញ្ជាក់ទុកក្នុងរឿងរាមកេរ្តិ៍ ។ គម្រោងការនេះរដ្ឋ Uttarakhand នឹងប្រើប្រាក់ដំណាក់កាលដំបូងចំនួន២៥០លានរូពី ឬ៣៦លានដុល្លារ ហើយក្រុមអ្នកវិទ្យាសាស្ត្រនឹងចាប់ផ្តើមដំណើរការនៅក្នុងខែសីហា ខណៈពេលរដ្ឋាភិបាលក្រុងញូវដេលី បដិសេធគាំទ្រលើគម្រោងការនេះ» ។
ក្នុងរឿងរាមកេរ្តិ៍និទានថា ឱសថ «Sanjeevani Booti» មានគុណសម្បត្តិជួយអ្នកបាត់បង់ជីវិតឱ្យដឹងខ្លួនឡើងវិញបាន ។ វាដុះនៅទីទួលខ្ពស់នៃកំពូលភ្នំហិមាល័យ ហើយមានចាំងពន្លឺនៅទីងងឹត ។ ក្នុងរឿង «រាមកេរ្តិ៍» និទានថា ហនុមានបានទទួលតួនាទីពីព្រះរាមឱ្យទៅរករុក្ខជាតិបុរាណប្រភេទនេះ ក្រោយពីគ្រូពេទ្យបុរាណប្រាប់ថា វានឹងជួយព្យាបាលព្រះលក្ម្សណ៍ ដែលរកកល់នឹងបាត់បង់ជីវិតឱ្យដឹងខ្លួនវិញ ប៉ុន្តែហនុមានមិនស្គាល់រុក្ខជាតិនេះ ទើបគាស់ភ្នំទាំងមូល រួចលីយកទៅព្យាបាលព្រះលក្ម្សណ៍ក្នុងពេលធ្វើសង្គ្រាមជាមួយសត្រូវក្នុងសមរភូមិដែលបច្ចុប្បន្នជាប្រទេសស្រីលង្កា ៕
ចែករំលែកព័តមាននេះ