អ្នកសិក្សាជួយបកស្រាយ ! នៅសុខៗភ្លើងឆេះក្នុងផ្ទះរយៈពេល១៥ថ្ងៃ
ខេត្តបាត់ដំបង៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងនៅប៉ុន្មាននាទីមុននេះថា នៅវេលាម៉ោងជាង៩ព្រឹកថ្ងៃទី៣១
ខេត្តបាត់ដំបង៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងនៅប៉ុន្មាននាទីមុននេះថា នៅវេលាម៉ោងជាង៩ព្រឹកថ្ងៃទី៣១ កក្កដា ២០១៦នេះ អាជ្ញាធរនិងប្រជាពលរដ្ឋបាននំាគ្នាធ្វើពិធីតាមបែបសាសនាបួងសួងសុំសេចក្តីសុខសប្បាយនៅផ្ទះមួយខ្នង ស្ថិតនៅក្នុងភូមិបឹងក្រសាល ឃុំស្នឹង ស្រុកបាណន់ ។
ការធ្វើពិធីបួងសួងនេះ បានធ្វើឡើងបន្ទាប់ពីនៅក្នុងផ្ទះដែលមានម្ចាស់ផ្ទះប្តីឈ្មោះ បឿន សាលឿន អាយុ៣៧ឆ្នាំ និងប្រពន្ឋឈ្មោះ កោប យី អាយុ៣៨ឆ្នាំ មានកូន៣នាក់គិតទំាងកូនក្នុងផ្ទៃ៨ខែ បានកើតមានអគ្គិភ័យដោយមិនដឹងមូលហេតុតំាងពីថ្ងៃទី១៧ កក្កដា រហូតមកដល់វេលាម៉ោង៧យប់ថ្ងៃទី៣០ កក្កដា ។ សេចក្តីរាយការណ៍បានស្រង់សំដីម្ចាស់ផ្ទះនិងអ្នកជិតខាងឲ្យដឹងថា នៅក្នុងផ្ទះចេះតែកើតមានអគ្គិភ័យរហូត ដោយម្តងឆេះខ្នើយ ម្តងឆេះជង្រុកស្រូវ ឆេះកញ្ច្រែងដាក់ឌីសបទចម្រៀង ហើយពេលម្ចាស់ផ្ទះរើអីវ៉ាន់ចុះក្រោមអស់ដាក់លើរបងក៍កើតមានភ្លើងឆេះរបង និយាយរួមដាក់អីវ៉ាន់ត្រង់ណាឆេះត្រង់ហ្នឹងដោយមិនដឹងមូលហេតុ រហូតអ្នកជិតខាងមិនហ៊ានឲ្យផ្ញើអីវ៉ាន់។
ដោយកើតមានភ្លើងឆេះអីវ៉ាន់មិនចេះចប់ ទើបម្ចាស់ផ្ទះបានទៅរកព្រះសង្ឃមើល ហើយព្រះសង្ឃបានមានថេរៈដីកាតាមបែបអបិយជំនឿថាម្ចាស់ផ្ទះបានយករបស់លោហៈធាតុអ្វីម្យ៉ាងដាក់ក្នុងផ្ទះបណ្តាលឲ្យកើតមានអគ្គិភ័យបែបនេះ ។
ម្ចាស់ផ្ទះបានឲ្យដឹងទៀតថា គាត់បានរើសបានលោកហៈធាតុកញ្ចំាង(ស្រដៀងម្កុដ) មានទំហំ៧ហ៊ុនមកទុកលើផ្ទះ ហើយចាប់តំាងពីថ្ងៃនោះមកក៍កើតមានភ្លើងឆេះក្នុងផ្ទះរហូត ប៉ុន្តែអ្វីដែលជាចម្ងល់នោះទៀត នៅពេលម្ចាស់បានយកកញ្ចំាងពីលើផ្ទះចុះក្រោម ក៍អគ្គិភ័យនៅតែកើតមានដដែល ។
សេចក្តីរាយការណ៍បានបន្តថា នៅព្រឹកថ្ងៃអាទិត្យនេះ ដោយសារមានការឧបត្ថម្ភពីអាជ្ញាធរមូលដ្ឋានឃុំ-ស្រុក ក៍ធ្វើពិធីរៀបចំបួងសួងសុំសេចក្តីសុខដោយមានប្រជាពលរដ្ឋអ្នកភូមិ និងអាជ្ញាធរចូលរួមរាប់រយនាក់ ។
រង់ចំាតាមដានបន្តទៀត ថាតើបន្ទាប់ពីធ្វើពិធីសួងសួងចប់ អគ្គិភ័យនឹងកើតមានទៀតឬយ៉ាងណា ?៕
ចែករំលែកព័តមាននេះ