ក្រុមហ៊ុនផលិតបន្ទះអេក្រង់ LCD ធំបំផុតរបស់ពិភពលោក LG Display ឱ្យដឹងថា ខ្លួននឹងវិនិយោគ ១,៧៥ ពាន់លានដុល្លារ ដើម្បីសង់ខ្សែសង្វាក់ផលិតកម្មថ្មីនៃកញ្ចក់អេក្រង់ពត់បាន OLED សម្រាប់ប្រើប្រាស់ក្នុងស្មាតហ្វូន។ លោក Song Young Kwon ប្រធានផ្នែកយុទ្ធសាស្ត្រទីផ្សាររបស់ក្រុមហ៊ុន LG Display និយាយថា ក្រុមហ៊ុននឹងចាយលុយ ១,៧៥ ពាន់លានដុល្លារដើម្បីសង់ខ្សែសង្វាក់ផលិតកម្មអេក្រង់ OLED ប្លាស្ទិក កម្រិត 6G នៅឯរោងចក្រ P9 ភាគខាងជើងក្រុងសេអ៊ូល ។
ដោយឡែកនៅពេលគម្រោងវិនិយោគបញ្ចប់នៅត្រីមាសទី៣ ឆ្នាំ២០១៨ខ្សែផលិតកម្មថ្មីនឹងផលិតកញ្ចក់ចំនួន ១៥០០០បន្ទះក្នុង១ខែ។ ក្រុមហ៊ុន LG Display មានខ្សែផលិតកម្មផលិតអេក្រង់ពត់បាន OLED កម្រិត ៤,៥G ហើយក្រុមហ៊ុននឹងសាងសង់ខ្សែសង្វាក់ផលិតកម្មផ្សេងទៀតក្នុងកម្រិត 6G ។ ក្រុមហ៊ុនបានព្យាករថា តម្រូវការអេក្រង់ OLED ប្លាស្ទិកនឹងហក់ឡើងខ្ពស់ក្នុងយៈពេលប៉ុន្មានឆ្នាំចុងក្រោយទៀត ខណៈពេលដែលក្រុមហ៊ុនផលិតស្មាតហ្វូនចាប់អារម្មណ៍ងាកមកប្រើប្រាស់អេក្រង់ OLED ក្នុងអាជីវកម្មរបស់ពួកគេវិញម្តង ។
ក្រុមហ៊ុន LG Display និងដៃគូប្រកួតប្រជែងក្នុងស្រុកគឺក្រុមហ៊ុន Samsung Display គឺជាក្រុមហ៊ុនតែពីរប៉ុណ្ណោះដែលអាចផ្តល់ការផលិតអេក្រង់ OLED ប្លាស្ទិកដែលភាគច្រើននៃពួកវាត្រូវបានប្រើប្រាស់ក្នុងទូរស័ព្ទដៃ និងប្រើក្នុងរថយន្តផងដែរ ៕
ចែករំលែកព័តមាននេះ