រាជធានីភ្នំពេញ ៖ តារាសម្តែងនាង គង់ ច័ន្ទស្រីមុំ បានប្រកាសពីជនខិលខូចលួចចូលក្នុងគណនីហ្វេសប៊ុករបស់នាង ហើយបន្លំជារូបនាងបោកប្រាស់លុយពីមិត្តភក្តិ និងអតិថិជនរបស់នាង ក្នុងរយៈពេល២ថ្ងៃបានប្រមាណជាង១ពាន់ដុល្លារ ។
ជនខិលខូចនោះបានលួចចូលគណនីហ្វេសប៊ុករបស់នាងគង់ ច័ន្ទស្រីមុំ ជាបន្តបន្ទាប់បើទោះបីជានាងព្យាយាមដូរលេខសម្ងាត់ជាច្រើនដងក៏ដោយ ហើយការប្រកាសនេះគឺក្នុងគោលបំណងឲ្យអតិថិជន និងមិត្តហ្វេសប៊ុកទាំងអស់កុំយល់ច្រឡំ និងប្រុងប្រយ័ត្ន ។
តាមរយៈវីដេអីឃ្លីបកាលពីពេល ថ្មីៗកន្លងមកគង់ ច័ន្ទស្រីមុំ ឲ្យដឹងថា ជនមិនស្គាល់មុខនោះបានបន្លំចូលទៅក្នុងគណនីហ្វេសប៊ុករបស់នាង រួចផ្ញើសារតាមហ្វេសប៊ុកបន្លំធ្វើជារូបនាង ហើយទាក់ទង់ទៅមិត្តភក្តិ និងអតិថិជនរបស់នាងដើម្បីឲ្យផ្ញើប្រាក់ ។
អតិថិជនរបស់នាងមិនចាប់អារម្មណ៍ពីករណីបោកនេះឡើយ ដោយសារពួកគាត់យល់ថា រូបនាងតែងតែប្រើប្រាស់ហ្វេសប៊ុកមួយនេះ ហើយមានតែនាងមួយគត់ដែលអាចដឹងពីលេខសម្ងាត់ក្នុងការប្រើប្រាស់ ។ ដំបូងឡើយជនមិនស្គាល់មុខនោះឲ្យអតិជនម្នាក់ផ្ញើលុយចំនួន៦០ដុល្លារ ហើយស្អែកឡើងផ្ញើសារទៅអតិថិជនរបស់នាងម្នាក់ទៀតឲ្យផ្ញើលុយរហូតដល់១.៤៧០ដុល្លារ និងបានផ្តាំឲ្យផ្ញើលុយទៅកាន់អ្នកទីផ្សារថ្មីរបស់ហាងនាងថែមទៀតផង ។ រូបភាពទាំងនេះ គឺជាអ្វីដែលជនមិនស្គាល់មុខនោះបានប្រើប្រាស់ ដើម្បីបោកប្រាស់បន្លំអតិថិជនដែលធ្លាប់អីវ៉ាន់នៅក្នុងហាងរបស់នាង ។
តាមរយៈការបន្លំជាបន្តបន្ទាប់នេះ គង់ ច័ន្ទស្រីមុំ បានផ្តាំផ្ញើទៅអតិថិជនរបស់ខ្លួនទាំងអស់ឈប់ភាន់ច្រឡំ ហើយនាងនឹងផ្លាស់ប្តូរពីប្រព័ន្ធទាក់ទងជាមួយអតិថិជនរបស់នាងជាថ្មីឡើងវិញ ។
គង់ ច័ន្ទស្រីមុំ នាងបានអំពាវនាវដល់អតិថិជនរបស់នាង និងប្រិយមិត្តទាំងអស់ឱ្យប្រុងប្រយ័ត្នចំពោះល្បិចបោកបញ្ឆោតមួយនេះ ព្រោះវាជារឿងមិននឹកស្មានដល់ឡើយ នៅពេលដែលនាងប្រើប្រាស់ហ្វេសប៊ុករាប់ឆ្នាំនៅតែមានគេលួចបន្លំបាន ប៉ុន្តែរឿងនេះនាងចាត់ទុកថាជារឿងស៊យរបស់នាងទៅចុះ ។
គង់ ច័ន្ទស្រីមុំ បានអំពាវនាវដល់ប្រិយមិត្តទាំងអស់ឲ្យប្រុងប្រយ័ត្ន ប្រសិនបើគណនេយ្យហ្វេសប៊ុករបស់នាងផ្ញើសារទៅឲ្យផ្ញើប្រាក់ខុសពីលេខហាងរបស់នាងនោះសុំកុំធ្វើតាម ហើយបើអាចជួយផ្តល់ព័ត៌មានដល់រូបនាងវិញផង ។
គង់ ច័ន្ទស្រីមុំ មិនបានលើកឡើងពីការចាត់វិធានការទៅតាមផ្លូវច្បាប់ណាមួយឡើយ ដោយគ្រាន់តែឲ្យអតិថិជន និងមិត្តក្នុងហ្វេសបុ៊ករបស់នាងទាំងអស់ឲ្យប្រុងប្រយ័ត្នខ្ពស់អំពីបញ្ហាដែលបានកើតឡើងនេះ ៕
ចែករំលែកព័តមាននេះ