ខេត្តកំពង់ចាម ៖ អតីតទណ្ឌិតចេញពីពន្ធនាគារខេត្ត មិនទាន់បានប៉ុន្មានផង បានបង្កហិង្សាដេញកាប់គេមិនបាន ក៏ដុតម៉ូតូម៉ាក C 100កូរ៉េមួយគ្រឿង ពណ៌ក្រហម ឆេះហ្មត់តែម្តង នៅវេលាម៉ោង១រសៀល ថ្ងៃទី២៨ កក្កដា ត្រង់ចំណុចឡូត៍កៅស៊ូលេខ៥៩សេ ភូមិ៤៨ សង្កាត់សួង ក្រុងសួង ហើយត្រូវបានឆ្មាំការពារកៅស៊ូចាប់ប្រគល់ឲ្យសមត្ថកិច្ចចាត់ការតាមផ្លូវច្បាប់។
លោកវរសេនីយ៍ទោ ឈន សុធន អធិការនគរបាលក្រុងសួង បានប្រាប់ឲ្យដឹងថា ជនបង្កឈ្មោះភី សុភ័ក្រ ភេទប្រុស អាយុ២៤ឆ្នាំ មានទីលំនៅភូមិ៤៨ សង្កាត់សួង បានផឹកស្រាស្រវឹង ហើយបានទៅច្រូតស្មៅត្រង់ចំណុចឡូត៍កៅស៊ូលេខ៥៩សេ ហើយបានយកចានសម្រាប់ត្រង់ទឹកជ័រកៅស៊ូទៅបោកចោលអស់ប្រហែល១០ចាន។ ពេលនោះត្រូវបានឆ្មាំការពារកៅស៊ូម្នាក់ឈ្មោះ នុត ម៉ាលីន ភេទប្រុស អាយុ៣៨ឆ្នាំ ដែលមានទីលំនៅភូមិព្រៃទទឹងឃើញ ក៏ប្រញាប់ទូរស័ព្ទរាយការណ៍ទៅលោកមេភូមិ ។
លោកវរសេនីយ៍ទោ ឈន សុធន អធិការនគរបាលក្រុងសួង បានប្រាប់បន្តថា ក្នុងពេលដែលកំពុងតែទូរស័ព្ទទៅនោះ មិនទាន់មានកម្លាំងសមត្ថកិច្ចណាម្នាក់មកដល់កន្លែងកើតហេតុភ្លាមទេ ស្រាប់តែអតីតទណ្ឌិតឈ្មោះ សុភ័ក្រ បានយកកណ្តៀវដេញកាប់អ្នករាយការណ៍ តែគាត់បានរត់គេចផុតពីគ្រោះថ្នាក់ ។ ហេតុតែខឹងដេញកាប់គេមិនបាន បែរជាកើតការក្តៅក្រហាយ ក៏ដុតម៉ូតូរបស់អ្នកប្តឹងនោះ ឆេះហ្មត់សល់តែគ្រោងឆ្អឹង ។ បន្ទាប់មកក្រុមឆ្មាំការពារកៅស៊ូបានមកកន្លែងកើតហេតុជាច្រើននាក់ ព័ទ្ធចាប់ជនបង្កប្រគល់ឲ្យទៅប៉ុស្តិ៍រដ្ឋបាលសង្កាត់សួងចាត់ការបន្ត ។
លោកអធិការនគរបាលក្រុងសួងបានបញ្ជាក់ថា អតីតទណ្ឌិតឈ្មោះសុភ័ក្រ នេះ ត្រូវបានកម្លាំងសមត្ថកិច្ចធ្លាប់បានចាប់ខ្លួនម្តង ហើយកាលពីថ្ងៃទី១១ កញ្ញា ២០១៥ ពីបទធ្វើឲ្យខូចខាតដោយចេតនាលើរបស់ទ្រព្យអ្នកដទៃ នៅក្នុងមូលដ្ឋានរបស់ខ្លួនដោយជាប់ទោស៧ខែ នឹកស្មានតែរាងចាលនៅពេលដែលចេញមកវិញ មិនទាន់នឹងបានប៉ុន្មានផង បែរជាប្រព្រឹត្តនូវទង្វើខុសច្បាប់ទៀតដដែល ដូច្នេះត្រូវបញ្ជូនទៅដេកគុកវិញ ៕
ចែករំលែកព័តមាននេះ