ខេត្តកំពត ៖ តូបលក់ដូររបស់ពលរដ្ឋចំនួន២ខ្នង និងម៉ូតូសេ១០០កូរ៉េ១គ្រឿងបានត្រូវខូចខាត និងកុមារ៣នាក់រងរបួសធ្ងន់និងស្រាល ដោយសារត្រូវរថយន្តធុនយីឌុបដឹកធ្យូងថ្មមួយគ្រឿងចេញពីខេត្តព្រះស៊ីហនុ ឆ្ពោះទៅរាជធានីភ្នំពេញតាមផ្លូវជាតិលេខ៣ ជ្រុលចង្កូតទៅបុក កាលពីវេលាម៉ោង៥និង៤៥នាទីល្ងាច ថ្ងៃទី២៨ ខែកក្កដា នៅចំណុចភូមិថ្មី ឃុំថ្មី ស្រុកទឹកឈូ ។
អ្នកឃើញហេតុការណ៍និយាយថា មុនកើតហេតុមានរថយន្តធុនយីឌុបពណ៌ខៀវ ដឹកធ្យូងថ្ម២គ្រឿង បើកបរក្នុងទិសដៅស្របគ្នាពីលិចទៅកើត ។ លុះមកដល់ចំណុចខាងលើ រថយន្តខាងក្រោយបានជែងរថយន្តខាងមុខ ក៏ស្រាប់តែវាក់នឹងរថយន្តទួរីសដឹកអ្នកដំណើរមួយគ្រឿង ដែលធ្វើដំណើរបញ្ច្រាសទិសគ្នា ទើបរថយន្តដែលជែងនោះបួងចង្កូតគេចពីរថយន្តទួរីស ។
ស្ថិតក្នុងសភាពបែបនេះ ក៏បណ្តាលឲ្យរេចង្កូតធ្លាក់ស្នាមភ្លោះ ហើយជ្រុលទៅបុកតូបលក់ដូរពីរខ្នងនៅមុខផ្ទះពលរដ្ឋ បណ្តាលឲ្យក្មេងប្រុសស្រី៣នាក់ដែលកំពុងអង្គុយលេងក្នុងតូបខ្ទាតចេញផុតពីមុខរថយន្តរងរបួសធ្ងន់ម្នាក់ និង ស្រាល២នាក់ និងកិនម៉ូតូធុនសេ១០០កូរ៉១គ្រឿងរបស់ម្ចាស់តូបដែលចតទុកនៅមុខផ្ទះខូចខាតទាំងស្រុង ។
កុមាររងគ្រោះត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យខេរត្តពីរនាក់ និងដឹកទៅសង្គ្រោះនៅមន្ទីរពេទ្យឯរាជធានីភ្នំពេញម្នាក់ ចំណែកអ្នកបើកបរបានចុះរត់គេចខ្លួនបាត់ ក្រោយកើតហេតុ ។ សមត្ថកិច្ចមូលដ្ឋានបានឲ្យដឹងថា រថយន្តយីឌុបមួយគ្រឿងនេះពាក់លេខភ្នំពេញ 3A-6697 ។
កុមាររងគ្រោះទាំងបីនាក់មាន ១-ឈ្មោះអឿន សិលា ភេទប្រុស អាយុ៦ឆ្នាំ រងរបួសធ្ងន់ ២-ឈ្មោះ អឿន និរតី ភេទស្រី អាយុ៨ឆ្នាំ (បងប្អូនបង្កើត) របួសស្រាល និង៣-ឈ្មោះនាង ប៊ូលាន ភេទប្រុស អាយុ៦ឆ្នាំ រងរបួសស្រាល ទាំងបីនាក់រស់នៅក្នុងភូមិ-ឃុំកើតហេតុខាងលើ ។ សមត្ថកិច្ចឲ្យដឹងដែរថា ក្នុងករណីគ្រោះថ្នាក់នេះ រថយន្តបានដាច់កង់មុខទាំងសងខាង ៕
ចែករំលែកព័តមាននេះ