រាជធានីភ្នំពេញ ៖ អគ្គនាយកដ្ឋានពន្ធដារបានបើកសិក្ខាសាលាស្តីពី គោលការណ៍សំខាន់ៗនៃកិច្ចព្រមព្រៀងស្តីពី ការចៀសវាងការយកពន្ធត្រួតគ្នា (Double Taxation Agreement – DTA) រវាងប្រទេសកម្ពុជា និងប្រទេសជាដៃគូ ព្រមទាំងកិច្ចព្រមព្រៀង DTA រវាងព្រះរាជាណាចក្រកម្ពុជា និងសាធារណរដ្ឋសិង្ហបុរី កាលពីព្រឹកថ្ងៃទី២៩ ខែកក្កដា ឆ្នាំ២០១៦ដែលរៀបចំនៅសាលប្រជុំសាលាជាតិពន្ធដាក្រោមមអធិបតីភាពលោក វ៉ាន់ ពុទ្ធិពល អគ្គនាយករង នៃអគ្គនាយកដ្ឋានពន្ធដារ តំណាងដ៏ខ្ពង់ខ្ពស់លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ ដែលមានការចូលរួមពីសំណាក់លោក លោកស្រី អគ្គនាយករង លោកប្រធាន អនុប្រធាននាយកដ្ឋានថ្នាក់កណ្តាល លោកប្រធាន អនុប្រធានសាខាខេត្ត ខណ្ឌ និងមន្ត្រីពន្ធដារជាច្រើនរូបទៀត។
នៅក្នុងឱកាសនោះលោក វ៉ាន់ ពុទ្ធិពល អគ្គនាយករងនៃអគ្គនាយកដ្ឋានពន្ធដាបានមានប្រសាសន៍ថា កម្ពុជាត្រូវតាមឱ្យទាន់នូវបរិបទបច្ចុប្បន្ននៃបំរែបំរួលគោលនយោបាយ និងបរិយាកាសពន្ធអន្តរជាតិទាំងក្នុងតំបន់ និងពិភពលោក ជាពិសេសស្ថិតក្នុងបរិការណ៍នៃសម្មាហរណកម្មសេដ្ឋកិច្ចអាស៊ាន (AEC) ដែលតម្រូវឱ្យមានយន្តការមួយចំនួនពាក់ព័ន្ធវិស័យពន្ធអន្តរជាតិ សំដៅផ្តល់នូវទំនុកចិត្ត ការគាំពារ និងជម្រុញការវិនិយោគក្នុងតំបន់។ ការចូលរួមរបស់ថ្នាក់ដឹកនាំ និងមន្ត្រីពន្ធដារទាំងអស់ក្នុងសិក្ខាសាលាថ្ងៃនេះ ជាសក្ខីកម្មបញ្ជាក់ពីការយកចិត្តទុកដាក់បង្កើនសមត្ថភាព និងពង្រឹងការយល់ដឹងបន្ថែមអំពី វិស័យពន្ធអន្តរជាតិ ដោយផ្តោតលើគោលការណ៍សំខាន់ៗនៃកិច្ចព្រមព្រៀងស្តី DTA រវាងប្រទេសកម្ពុជា និងប្រទេសជាដៃគូ ជាពិសេសគឺស្វែងយល់ឱ្យបានច្បាស់លាស់អំពីកិច្ចព្រមព្រៀង DTA រវាងប្រទេសកម្ពុជា និងប្រទេសសិង្ហបុរី ដែលទើបចុះហត្ថលេខាថ្មីៗនេះ ដើម្បីធានាឱ្យបាននូវការអនុវត្តដោយរលូននាពេលខាងមុខ។
ហើយកិច្ចព្រមព្រៀងនេះនឹងផ្តល់នូវអត្ថប្រយោជន៍ជាច្រើនដល់ប្រទេសជាហត្ថលេខី ដូចជាការពង្រឹងកិច្ចសហប្រតិបតិ្តការទ្វេភាគី លុបបំបាត់ភាពមិនច្បាស់លាស់ក្នុងការកំណត់សិទ្ធិយកពន្ធ កំណើនមូលដ្ឋានពន្ធតាមរយៈការទាក់ទាញវិនិយោគដោយផ្ទាល់ លំហូរមូលធន ការផ្ទេរបច្ចេកវិទ្យា និងជំនាញពីបរទេស ការការពារនិវាសនជនពីប្រព្រឹត្តកម្មមិនត្រឹមត្រូវពាក់ព័ន្ធនឹងពន្ធ និងការការពារចំណូលពន្ធក្នុងស្រុកតាមរយៈកិច្ចសហប្រតិបត្តិការក្នុងការប្រយុទ្ធប្រឆាំងនឹងអំពើគេចវេសពន្ធ។ ម្យ៉ាងវិញទៀត ការសម្រចបាននូវកិច្ចព្រមព្រៀងរវាងកម្ពុជា និងប្រទេសជាដៃគូ ធ្វើឡើងស្របតាមគោលនយោបាយរាជរដ្ឋាភិបាល និងដើម្បីបំពេញកាតព្វកិច្ចក្រោមក្របខណ្ឌអាស៊ាន។ អគ្គនាយកដ្ឋានពន្ធដារបានខិតខំកសាងនូវគំរូ DTA កម្ពុជា ដែលមានលក្ខណៈសមស្របទៅនឹងបរិយាកាសប្រព័ន្ធពន្ធដារ និងច្បាប់ស្តីពីសារពើពន្ធនៃប្រទេសកម្ពុជា ដោយមានធាតុផ្សំមកពី OECD Model, UN Model, ASEAN Model និងគំរូកិច្ចព្រមព្រៀងប្រទេសមួយចំនួន ដែលមានស្ថានភាពពន្ធ និងសេដ្ឋកិច្ចប្រហាក់ប្រហែលនឹងកម្ពុជា ដែលធ្វើឡើងដោយមានការពិចារណា និងយកមូលដ្ឋានប្រយោជន៍ជាតិជាធំ។
គួរបញ្ជាក់ផងដែរថាកាលពីថ្ងៃទី២០ ខែឧសភា ឆ្នាំ២០១៦ កន្លងទៅថ្មីៗនេះ ព្រះរាជាណាចក្រកម្ពុជា និងសាធារណរដ្ឋសិង្ហបុរីបានចុះហត្ថលេខាលើកិច្ចព្រមព្រៀង DTA ដែលនេះជាកិច្ចព្រមព្រៀងដំបូងបង្អស់ត្រូវបានចុះហត្ថលេខា ហើយនេះជាសមិទ្ធផលថ្មីមួយទៀតក្នុងចំណោមសមិទ្ធផលសំខាន់ៗជាច្រើនដែលរាជរដ្ឋាភិបាលសម្រេចបានក្នុងបរិបទនៃសមាហរណកម្មសេដ្ឋកិច្ចអាស៊ាន។ លើសពីនេះទៅទៀតកម្ពុជាបាននិងកំពុងធ្វើការចរចាលើកិច្ចព្រមព្រៀង DTA ជាមួយបណ្តាប្រទេសអាស៊ាន និងអាស៊ីជាដៃគូមួយចំនួនទៀត។
លោកអគ្គនាយករងនៃអគ្គនាយកដ្ឋានពន្ធដាបានសង្កត់ធ្ងន់ថា សិក្ខាសាលានាថ្ងៃនេះរៀបចំឡើងដោយផ្តោតសំខាន់លើ ទស្សនាទាន ទិដ្ឋភាពទូទៅ គោលការណ៍សំខាន់ៗ និងធ្វើការប្រៀបធៀបរវាងគំរូកិច្ចព្រមព្រៀង DTA របស់កម្ពុជា ជាមួយគំរូស្តង់ដារអន្តរជាតិរួមមាន គំរូ OECD និង UN ព្រមទាំងពន្យល់បកស្រាយលម្អិតអំពីកិច្ចព្រមព្រៀង DTA រវាងប្រទេសកម្ពុជា និងប្រទេសសិង្ហបុរី ៕
ចែករំលែកព័តមាននេះ