រាជធានីភ្នំពេញ ៖ នៅក្នុងប្រទេសកម្ពុជា គិតរយៈពេល៧ខែដើមឆ្នាំ២០១៦នេះ គ្រោះធម្មជាតិផ្សេងៗបានបង្កឱ្យមនុស្សស្លា.ប់ និងរងរបួសមានចំនួន៣៤០៧នាក់ បំផ្លាញផ្ទះអស់ជិត៨ពាន់ខ្នង គោ-ក្របីងាប់ចំនួន៦០ក្បាល
រាជធានីភ្នំពេញ ៖ នៅក្នុងប្រទេសកម្ពុជា គិតរយៈពេល៧ខែដើមឆ្នាំ២០១៦នេះ គ្រោះធម្មជាតិផ្សេងៗបានបង្កឱ្យមនុស្សស្លាប់ និងរងរបួសមានចំនួន៣៤០៧នាក់ បំផ្លាញផ្ទះអស់ជិត៨ពាន់ខ្នង គោ-ក្របីងាប់ចំនួន៦០ក្បាល បើប្រៀបធៀបរយៈពេលដូចគ្នា កាលពីឆ្នាំ២០១៥កន្លងទៅ គឺមានការកើនឡើង ។
លោកកែវ វី នាយខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងនៅថ្ងៃទី២៨ កក្កដា នេះថា គិតចាប់ពីខែមករា រហូតមកដល់ខែកក្កដា ឆ្នាំ២០១៦ នេះ កម្ពុជាបានទទួលរងនូវគ្រោះធម្មជាតិ ខ្យល់ព្យុះ ខ្យល់កន្ត្រាក់ និងផ្គរភ្លៀង កើតឡើងចំនួន២០១លើក បណ្តាលឱ្យមនុស្សស្លាប់ចំនួន១២នាក់ រងរបួសចំនួន១៦១នាក់ ផ្ទះសម្បែងខូចខាតទាំងស្រុង មានចំនួន១៤៤៦ខ្នង ខូចមធ្យមចំនួន៦៤១៥ខ្នង សាលារៀន៣៩ខ្នង និងអគារផ្សេងៗចំនួន៣៣ខ្នង ។
លោកបន្តថា សម្រាប់គ្រោះធម្មជាតិដោយរន្ទះបាញ់វិញ បានសម្លាប់មនុស្សចំនួន៧៨នាក់ របួស៩៦នាក់ ព្រមទាំងសត្វពាហនៈ មានគោក្របីចំនួន៦០ក្បាល ប៉ុន្តែករណីរន្ទះបាញ់នេះ ភាគច្រើនបានកើតឡើងនៅតាមទីជនបទ និងទីដាច់ស្រយាលតែម្តង ដែលគ្រោះធម្មជាតិនេះ មានការកើនឡើង បើប្រៀបធៀបទៅនឹងឆ្នាំកន្លងទៅ ។
លោកនាយខុទ្ទកាល័យ គណៈកម្មាធិការជាតិ គ្រប់គ្រងគ្រោះមហន្តរាយ បានធ្វើការអំពាវនាវដល់បងប្អូនប្រជាពលរដ្ឋទាំងអស់ សូមឱ្យមានការប្រុងប្រយ័ត្នខ្ពស់ដោយខ្លួនឯង ពិសេសគប្បីកុំប្រើប្រព័ន្ធអេឡិចត្រូនិច និងគ្រឿងផ្សេងៗ ខណៈដែលមេឃកំពុងរកភ្លៀងនោះ ព្រោះក្នុងរយៈពេលចុងក្រោយនេះ ករណីគ្រោះធម្មជាតិតែងកើតឡើងជាញឹកញាប់ណាស់ ៕
ចែករំលែកព័តមាននេះ