រាជធានីភ្នំពេញ ៖ ចាប់តាំងពីបានប៉ះគ្នាក្នុងនាមប្រទេស និងប្រទេស ក្រុមបាល់ទាត់ជម្រើសជាតិកម្ពុជាធ្លាប់ឈ្នះក្រុមសិង្ហបុរីតែម្ដងគត់កាលពីឆ្នាំ១៩៧២ ក្នុងព្រឹត្តិការណ៍រំលឹកខួបក្រុងហ្សាការតា នៅប្រទេសឥណ្ឌូណេស៊ី
រាជធានីភ្នំពេញ ៖ ចាប់តាំងពីបានប៉ះគ្នាក្នុងនាមប្រទេស និងប្រទេស ក្រុមបាល់ទាត់ជម្រើសជាតិកម្ពុជាធ្លាប់ឈ្នះក្រុមសិង្ហបុរីតែម្ដងគត់កាលពីឆ្នាំ១៩៧២ ក្នុងព្រឹត្តិការណ៍រំលឹកខួបក្រុងហ្សាការតា នៅប្រទេសឥណ្ឌូណេស៊ី បើគិតមកដល់ពេលនេះមានរយៈពេល៤៤ឆ្នាំហើយ ដែលកម្ពុជាមិនធ្លាប់ឈ្នះសោះសូម្បីតែស្មើក្រុមតោមួយនេះ ។ អ៊ីចឹងហើយទើបការយកឈ្នះក្រុមសិង្ហបុរី២-១ក្នុងការប្រកួតមិត្តភាពអន្តរជាតិClear នៅពហុកីឡដ្ឋានជាតិអូឡាំពិក កាលពីយប់ថ្ងៃទី២៨ កក្កដា ត្រូវបានចាត់ទុកថា ជាការបំបែកកំណត់ត្រាប្រវត្តិសាស្ត្រចាស់បើកទំព័រប្រវត្តិសាស្ត្រថ្មីរបស់ក្រុមបាល់ទាត់កម្ពុជា ធ្វើឱ្យអ្នកគាំទ្រគ្រប់ស្រទាប់វណ្ណៈ ជាពិសេសអ្នកទៅទស្សនាផ្ទាល់ជាង៥ម៉ឺននាក់សប្បាយរីករាយយ៉ាងខ្លាំង ។ ភ្លាមៗសម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិតបានប្រកាសផ្ដល់ប្រាក់រង្វាន់ដល់ការហត់នឿយរបស់ក្រុមបាល់ទាត់កម្ពុជាចំនួន៣៣.០០០ដុល្លារអាមេរិកផងដែរ ។
ការប្រកួតដែលស្ថិតនៅក្រោមតំណក់ទឹកភ្លៀងមិនដាច់គ្រាប់នោះ គេសង្កេតឃើញនៅតែមានអ្នកទស្សនាច្រើនដែលតាមព័ត៌មានថាមានរហូតដល់ជាង៥ម៉ឺននាក់មិនចាញ់ការប្រកួតមុនៗ ទោះបីមុនការប្រកួតមានកើតហេតុចលាចលវាយតប់គ្នាក្នុងចំណោមអ្នកមកទស្សនាផ្ទាល់បង្កឱ្យមានការភ្ញាក់ផ្អើលក្ដី ។ ក្រុមអ្នកបង្កហេតុធ្វើឱ្យប៉ះពាល់ដល់បរិយាកាសប្រកួតបាល់ទាត់នាយប់នោះត្រូវបានចាប់ខ្លួនភ្លាមៗ ហើយក៏មានការដោះស្រាយឱ្យស្ងប់ស្ងាត់ផងដែរ ក្នុងពេលការប្រកួតចាប់ផ្ដើម ។ អ៊ីចឹងហើយទើបអ្នកទស្សនានៅតែមានអារម្មណ៍ស្រស់ស្រាយ និងអបអរសាទរនៅពេលក្រុមកម្ពុជារកគ្រាប់បាល់បានមុន ហើយចុងក្រោយក៏រកបានមួយគ្រាប់បន្ថែមទៀត នៅពេលក្រុមសិង្ហបុរីប្រឹងរកគ្រាប់បាល់បាន១គ្រាប់តាមស្មើនៅតង់ទី១ ។ អ្វីដែលធ្វើឱ្យគេកោតសរសើរមិនដាច់ពីមាត់នោះ គឺក្រុមកម្ពុជានៅសល់គ្នាតែ១០នាក់ប៉ុណ្ណោះក្នុងតង់ទី២ដោយសារខ្សែការពារម្នាក់ត្រូវអាជ្ញាកណ្ដាលផ្ដល់កាតក្រហមបណ្ដេញចេញដោយសារធ្វើឱ្យមានកំហុសប៉ុន្តែនៅតែអាចទប់ជាប់ការវាយលុករបស់ក្រុមភ្ញៀវមិនឱ្យរកគ្រាប់បាល់តាមស្មើបាន ។
នៅក្នុងការប្រកួតនេះ កីឡាករឆ្នើមរបស់កម្ពុជាចាន់ វឌ្ឍនាកា ដែលជាMan of the matchទទួលបានប្រាក់១.០០០ដុល្លារពីណាហ្គាវើល ជាអ្នករកគ្រាប់បាល់ឱ្យក្រុម
កម្ពុជានាំមុខក្រុមភ្ញៀវមុនតាមរយៈការទាត់បាល់ហ្វ្រីឃីកចម្ងាយប្រមាណ២០ម៉ែត្រចូលទីគូប្រកួតយ៉ាងស្អាតនៅនាទីទី១៩ បន្ទាប់ពីខ្សែការពារសិង្ហបុរីធ្វើឱ្យកីឡាករកម្ពុជាសុះ ស៊ូហាណា ដួល ។ ប៉ុន្តែ៤នាទីក្រោយមក ប្រធានក្រុមសិង្ហបុរី Khairul Armi បានតែតបាល់បញ្ចូលទីក្រុមកម្ពុជាវិញ ធ្វើឱ្យការប្រកួតកាន់តែមានសភាពតានតឹងនៅលើទីលាន។
ជាភ័ព្វសំណាងរបស់ក្រុមកម្ពុជាមុនពេលអាជ្ញាកណ្តាលជនជាតិវៀតណាម លោកHoang Anh Tuan ផ្លុំកញ្ចែបញ្ចប់ការប្រកួតតង់ទី១ ខ្សែបម្រើ ទិត្យ ឌីណា បានទាត់បាល់បញ្ចូលទីគូប្រកួតធ្វើឱ្យក្រុមកម្ពុជានាំមុខក្រុមសិង្ហបុរីក្នុងលទ្ធផល ២-១ ។ គ្រាប់បាល់មាសដែលជួយឱ្យក្រុមកម្ពុជាបំបែកកំណត់ត្រាប្រវត្តិសាស្ត្ររបស់ខ្លួននេះបានមកពីកីឡាករ ចាន់ វឌ្ឍនាកាប្រើបច្ចេកទេសបណ្ដើរបាល់ឆ្លងកាត់ខ្សែការពារដ៏ក្រាស់របស់ក្រុមភ្ញៀវ ហើយបញ្ជូនបាល់យ៉ាងស្អាតឱ្យមិត្តរួមក្រុមទាត់បញ្ចូលទីតែម្ដង។
គ្រូបង្វឹកក្រុមកម្ពុជា លោក Lee Tae Hoon សប្បាយចិត្តរកអ្វីប្រៀបផ្ទឹមមិនបាន ឡើយបន្ទាប់ពីការរៀបចំទម្រង់លេងរបស់លោកលើកនេះ ធ្វើឱ្យក្រុមគោព្រៃកម្ពុជាដណ្ដើមបានជោគជ័យតាមការចង់បាន ។ ជាពិសេសនៅពេលដែលលោកសម្រេចចិត្តដកកីឡាករ ចាន់ វឌ្ឍនាកា នៅនាទីទី៨៤ ដោយដាក់ជំនួសកីឡាករ ប្រាក់ មុន្នីឧត្តម ដើម្បីទប់កុំឱ្យក្រុមតោសិង្ហបុរីមានឱកាសរកគ្រាប់បាល់តាមស្មើបានមុនការប្រកួតត្រូវបញ្ចប់។
ផ្អែកតាមប្រវត្តិប៉ះគ្នា នេះជាជំនួបលើកទី១៧រវាងក្រុមទាំងពីរកម្ពុជា-សិង្ហបុរីដែលទទួលស្គាល់ដោយសហព័ន្ធកីឡាបាល់ទាត់អន្តរជាតិ (FIFA) ។ ការប៉ះគ្នាកន្លងមក កម្ពុជាធ្លាប់ឈ្នះតែ១លើកគត់ក្នុងលទ្ធផល៣-០ កាលពីថ្ងៃទី១០ ខែមិថុនា ឆ្នាំ១៩៧២ ក្នុងព្រឹត្តិការណ៍រំលឹកខួបក្រុងហ្សាការតា នៅប្រទេសឥណ្ឌូណេស៊ី។ អ៊ីចឹងហើយទើបការប្រកួតឈ្នះលើកនេះ ចាត់ទុកជាការបំបែកកំណត់ត្រាប្រវត្តិសាស្ត្រចាស់ បន្ទាប់ពីក្រុមកម្ពុជាប៉ះក្រុមសិង្ហបុរីគ្រប់លើកគឺឱកាសស្មើក៏មិនមានផង ៕
ចែករំលែកព័តមាននេះ