រាជធានីភ្នំពេញ ៖ កន ចន្ថា មកពីសមាគមកីឡាប្រដាល់ក្រសួងការពារជាតិ និងមាជ សុខរ៉ា មកពីក្លិបតាព្រហ្មមានជ័យ សង្ឃឹមរកបាន៣ពិន្ទុបន្ថែមដូចគ្នា ពេលជួបកីឡាករបរទេសនៅក្នុងព្រឹត្តិការណ៍ប្រកួតដណ្តើមខ្សែក្រវាត់គោជល់ក្នុងប្រភេទទម្ងន់៦៧គីឡូក្រាមនៅលើសង្វៀនទូរទស្សន៍ CNC នាថ្ងៃសៅរ៍ ទី៣០ កក្កដា នេះ ។
កន ចន្ថា ត្រូវជួបប្រកួតជាមួយកីឡាករថៃឈ្មោះ Darki Sor.Viravan ខណៈមាជ សុខរ៉ា ជួបប្រកួតជាមួយកីឡាករឡាវឈ្មោះ Chan Chai ។ កន ចន្ថា ប្រកួតបាន២លើកឈ្នះ១ចាញ់១ មាន៤ពិន្ទុ ចំណែកមាជ សុខរ៉ា ប្រកួតបាន២លើកដូចគ្នាឈ្នះទាំង២លើក ។ ទោះបីយា៉ងណា កន ចន្ថា មានសង្ឃឹមថា អាចរកបាន៣ពិន្ទុបន្ថែមទៀត ដោយសារយោងលើប្រវត្តិធ្លាប់ប្រកួតបានរហូតដល់ទៅ១០៨ដង ឈ្នះ៨៣ដង ចាញ់២៥ដង និងធ្លាប់ផ្តួលគូប្រកួតឱ្យសន្លប់នៅលើសង្វៀនបាន៣៥ដង ។ រីឯកីឡាករថៃDarki Sor Viravan ធ្លាប់ប្រកួតបានត្រឹមតែ៨៣ដងឈ្នះ៦២ដង ចាញ់១៦ដង ស្មើ៥ដង តិចជាងកីឡាករកម្ពុជា ។ ប៉ុន្តែកីឡាករកម្ពុជាមិនអាចធ្វេសប្រហែសបានដែរ ព្រោះកីឡាករថៃរូបនេះ មិនមែនជាជើងអន់នោះទេ ។
ចំណែកមាជ សុខរ៉ា ទោះបីជាប្រវត្តិប្រកួតតិចជាងកីឡាករឡាវ Chan Chai ក៏គេនៅតែមានសង្ឃឹមថា ឈ្នះដែរ ដោយសារកីឡាកររូបនេះមានមហិច្ឆតាខ្ពស់ក្នុងការសម្រេចគោលដៅ ។ មាជ សុខរ៉ា ធ្លាប់ប្រកួតបានត្រឹមតែ៣០ដងប៉ុណ្ណោះ ក្នុងនោះឈ្នះ២៤ដង ចាញ់១ដង ស្មើ៥ដង និងផ្តួលគូប្រកួតឱ្យសន្លប់បាន១៥ដង ខណៈកីឡាករឡាវធ្លាប់ប្រកួតបានរហូត ដល់ទៅ៨៦ដង ឈ្នះ៦០ដង ចាញ់២៣ដង និងស្មើ៣ដង ច្រើនជាងកីឡាករកម្ពុជាជាងពាក់កណ្តាល ។ ចាំមើល មាជ សុខរ៉ាអាចសម្រេចគោលដៅរបស់ខ្លួនបានដោយរបៀបណា ខណៈកីឡាករឡាវ ត្រូវគេមើលឃើញថា មានសមត្ថភាពពិបាកផ្តួលអីុចឹងនោះ។
ក្រៅពីគូដណ្តើមខ្សែក្រវាត់នៅលើសង្វៀនដដែលក៏មានការប្រកួតជាលក្ខណៈមិត្តភាពរវាងកីឡាករកម្ពុជានិងកម្ពុជាផងដែរ ដូចជាកីឡាករ គឿម សុវណ្ណនឿត មកពីក្លិបឃ្លាំងមឿងកីឡា ប្រកួតជាមួយកីឡាករ គុន សំណង មកពីក្លិបគីសែមានរិទ្ធ និងកីឡាករ ផាន់ សារុន មកពីក្លិបខ្លារខិនមានរិទ្ធ ប្រកួតជាមួយកីឡាករ វៀត ប៊ុនឌឿន មកពីសមាគមកីឡាប្រដាល់ក្រសួងការពារជាតិ ។
ដោយឡែក នៅថ្ងៃអាទិត្យ ទី៣១ កក្កដា នៅលើសង្វៀនទូរទស្សន៍ CNC ដដែលនេះ ក៏មានការប្រកួតប្រដាល់ដើម្បីកំដរអារម្មណ៍ទស្សនិកជននាថ្ងៃសម្រាកចុងសប្ដាហ៍ផងដែរ។ ចំណែកសមាសភាពកីឡាករដែលចូលរួមប្រកួតមានកីឡាករ ឈិន វណ្ណី មកពីក្លិបអប់រំកាយកីឡាស្រុកអន្លង់វែង ប្រកួតជាមួយកីឡាករ ម៉ៅ ប៉ោក មកពីក្លិបតាឡីដំរីមានរិទ្ធ ។ កីឡាករ សុខ កាន មកពីក្លិបឃ្លាំងមឿងកីឡា ប្រកួតជាមួយកីឡាករ ឡុង សុធា មកពីក្លិបខ្លារខិនមានរិទ្ធ។ កីឡាករ អម ខេម មកពីក្លិបអរុណរះប្រកួតជាមួយកីឡាករ លី ហ៊ាង មកពីក្លិបកុមារទេព ។ កីឡាករ ហេង ពៅ មកពីក្លិបកងពលតូចលេខ៧០ ប្រកួតជាមួយកីឡាករ លីន វីរៈ មកពីក្លិបបុរីរាជសីហ៍មានរិទ្ធ ។ កីឡាករ ចាន់ សំអាត មកពីក្លិបកងពលតូចអន្តរាគមន៍លេខ៨ ភ្នំទ្រព្យ ប្រកួតជាមួយកីឡាករ ម៉ន លីហួរ មកពីក្លិបការិយាល័យទី៥ កងទ័ពជើងគោក និងកីឡាករ លីន គឹមផៃ មកពីក្លិបបុរីរាជសីហ៍មានរិទ្ធ ប្រកួតជាមួយកីឡាករ ឃឿន រិទ្ធី មកពីក្លិបរស្មីកុមារកំព្រា ៕
ចែករំលែកព័តមាននេះ