ប្រភពព័ត៌មានផ្លូវការរាយការណ៍កាលពីថ្ងៃទី២៨ កក្កដា ថា ទឹកជំនន់ និងការបាក់ដីនៅប្រទេសនេប៉ាល់ និងឥណ្ឌាបណ្តាលឱ្យមនុស្សស្លាប់ជាង៩០នាក់រយៈពេលប៉ុន្មានថ្ងៃចុងក្រោយនេះ ហើយបង្ខំឱ្យមនុស្សយ៉ាងតិច២លាននាក់ចាកចេញពីលំនៅឋាន ។
នៅនេប៉ាល់ដែលរងការប៉ះពាល់ខ្លាំងបំផុត ភ្លៀងបានធ្លាក់យ៉ាងខ្លាំងចាប់តាំងពីថ្ងៃទី២៥ កក្កដា មក បណ្តាលឱ្យទឹកស្ទឹងទាំងឡាយជន់ជោរនាំឱ្យមានទឹកជំនន់ និងការបាក់ដីបំផ្លាញផ្ទះ និងស្ពានជាច្រើន ។
លោក JHANKA NATH DHAKAL អ្នកនាំពាក្យក្រសួងមហាផ្ទៃនេប៉ាល់និយាយថា ចាប់តាំងពីថ្ងៃទី២៥ កក្កដា មក មនុស្ស៧៣នាក់ស្លាប់ក្នុងទឹកជំនន់ និងការបាក់ដី ។ រូបភាពតាំងឡាយផ្សាយដោយកងទ័ពដែលចូលរួមក្នុងប្រតិបត្តិការជួយសង្គ្រោះបង្ហាញប្រជាជនដែលឡើងលើដំបូលផ្ទះត្រូវជម្លៀសចេញតាមកាណូតកៅស៊ូ ។
ទឹកជំនន់ក៏ប៉ះពាល់ដែរដល់រដ្ឋអាសាមភាគឦសានឥណ្ឌា ដែលនៅទីនោះមានមនុស្សស្លាប់១៩នាក់ ។
ប្រមុខរដ្ឋាភិបាលរដ្ឋអាសាម លោក SARBANANDA SONOWAL គូសបញ្ជាក់កាលពីថ្ងៃទី២៨ កក្កដា ថា មនុស្សប្រមាណ២លាននាក់គ្មានទីជម្រក ដោយសារទឹកជំនន់ដែលជន់លិចភូមិ៣.០០០ក្នុងស្រុក២១ ៕
ចែករំលែកព័តមាននេះ