ខេត្តកំពង់ស្ពឺ ៖ លោកឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ មេបញ្ជាការរងកងទ័ពជើងគោក និងជាមេបញ្ជាការ បញ្ជាការដ្ឋានជាតិកម្លាំងពិសេស ប្រឆាំងភេរវកម្មបានថ្លែងថា ការពង្រឹងគុណភាព និងសមត្ថភាពនាយទាហាន គឺសំខាន់ណាស់ ព្រោះថា ការខិតខំប្រឹងប្រែងយកអស់កម្លាំងកាយចិត្តរបស់នាយទាហាន គឺជាអនាគតនៃថ្នាក់ដឹកនាំ កងទ័ពនៅពេលខាងមុខ ដើម្បីបម្រើជាតិមាតុភូមិប្រកបដោយមោទនភាព ។
នៅក្នុងពិធីបិទការប្រកួតកីឡាផ្ទៃក្នុងរបស់វិទ្យាស្ថាកងទ័ពជើងគោកប្រចាំឆ្នាំ២០១៦ កាលពីថ្ងៃទី២៨ កក្កដា ២០១៦ លោកឧត្តមសេនីយ៍ឯកបានឱ្យដឹងថា «ការប្រកួតកីឡាផ្ទៃក្នុងរបស់វិទ្យាស្ថានកងទ័ពជើងគោក ប្រចាំឆ្នាំ២០១៦ បានបង្កើតឱ្យមានភាពសប្បាយរីករាយជាមួយគ្នា ជួយការពារសុខភាព បង្កជាមិត្តភាព សាមគ្គីភាព និងការខិតខំប្រកួតប្រជែងផ្ទៃក្នុង» ។
លោកបន្តទៀតថា កាយសម្បទារឹងមាំ ភាពក្លាហាន សមត្ថភាព និងភាពជាអ្នកដឹងនាំ គឺជាមូលដ្ឋានរបស់កងទ័ព ។ វិញ្ញាសានៃកីឡានាពេលនេះ គឺបានបង្កប់នូវអត្ថន័យនូវកាជួយគ្នា សាមគ្គីគ្នាស្រឡាញ់គ្នា ដើម្បីទៅដល់គោលដៅទាំងអស់គ្នា។ លោកថា កំណែទម្រង់ និងប្រសិទ្ធិភាពរបស់កងទ័ព គឺមាន២ផ្នែករួមមានផ្នែករឹងនិងផ្នែកទន់។ ផ្នែករឹងសំដៅលើសម្ភារគ្រឿងសព្វាវុធ គ្រឿងបច្ចេកទេសជីវភាពរស់នៅរបស់កងទ័ព និងផ្នែកទន់សំដៅលើគុណភាព សមត្ថភាពនិងឆន្ទៈរបស់កងទ័ព។ នៅគ្រប់កាលៈទេសៈនៃប្រទេសកម្ពុជា គឺត្រូវការកងទ័ពដើម្បីការពារជាតិការពារបូរណភាពទឹកដី។
លោកបានថ្លែងទៀតថា កងទ័ពខ្លាំង គឺអាស្រ័យលើកងទ័ពគ្រប់ជាន់ថ្នាក់ គ្រប់ឋានានុក្រម ដូច្នេះការពង្រឹងគុណភាព និងសមត្ថភាពនាយទាហាន គឺសំខាន់ណាស់ ព្រោះថាការខិតខំប្រឹងប្រែង យកអស់កម្លាំងកាយចិត្តរបស់នាយទាហាននៅថ្ងៃនេះ គឺជាអនាគតនៃថ្នាក់ដឹកនាំកងទ័ពនៅពេលខាងមុខ ដើម្បីបម្រើជាតិមាតុភូមិប្រកបដោយមោទនភាព។
ជាមួយគ្នានេះ លោកឧត្តមសេនីយ៍ឯក ហ៊ុន ម៉ាណែត បានថ្លែងអំណរគុណ និងកោតសរសើរចំពោះការខិតខំរៀបចំការប្រកួតកីឡាផ្ទៃ ក្នុងរបស់វិទ្យាស្ថានកងទ័ពជើងគោកប្រចាំឆ្នាំ២០១៦ និងអរគុណចំពោះភាគីមិត្ត ដែលបានចូលរួមសហការ និងជួយដល់វិស័យកងទ័ពនៅកម្ពុជាផងដែរ ។
ចែករំលែកព័តមាននេះ