ប្រទេសកូរ៉េខាងត្បូង ៖ តាមរបាយការណ៍មួយឱ្យដឹងថា នៅពេលដែលការប្រកួតប្រជែងទូទាំងសកលលោក បានធ្វើឲ្យឧស្សាហកម្មដែក និងគីមីមានសក្តានុពលខ្លាំង ការរឹតបន្តឹងលើការនាំចូលផលិតផលដែកថែបរបស់កូរ៉េ មានការកើនឡើងយ៉ាងឆាប់រហ័សនៅក្នុងប្រទេសកំពុងរីកចម្រើន ។
យោងតាមទីភ្នាក់ងារផ្សព្វផ្សាយពាណិជ្ជកម្ម និងការវិនិយោគកូរ៉េ (KOTRA) ក្រៅពីការស៊ើបអង្កេតទាំង២៣ នៃការប្រឆាំងនឹងការលក់បង្ខូចថ្លៃទំនិញ ឬការពារពីហានិភ័យនៅក្នុងការនាំចេញរបស់កូរ៉េខាងត្បូង ដែលបានចាប់ផ្តើមធ្វើនៅពាក់កណ្តាលឆមាសទី១ឆ្នាំនេះ។ គេសង្កេតឃើញថា មាន១៩ប្រទេសស្ថិតក្នុងទីផ្សារកំពុងអភិវឌ្ឍន៍ដូចជា ប្រទេសឥណ្ឌា ថៃ ម៉ាឡេស៊ី វៀតណាម និងក្រុមប្រឹក្សាកិច្ចសហប្រតិបត្តិការឈូងសមុទ្រ (GCC) ។
បទប្បញ្ញត្តិបរទេសដែលប៉ះពាល់ដល់ការនាំចេញដែកថែបរបស់ប្រទេសកូរ៉េ មានការកើនឡើងយ៉ាងខ្លាំង ។ មានពាក្យបណ្តឹងចំនួន១៧ ត្រូវបានគេដាក់នៅពាក់កណ្តាលឆមាសដំបូង ដោយមានចំនួន១៤បណ្តឹងពីប្រទេសប្រទេសឥណ្ឌា និងប្រទេសជាច្រើនទៀតនៅអាស៊ីអាគ្នេយ៍ ។
នៅថ្ងៃទី៣០ មិថុនា មានប្រទេសចំនួន២៩ បានធ្វើនិយ័តកម្មលើការនាំចូលផលិតផលរបស់កូរ៉េចំនួន១៦៩ផលិតផល ។ នៅថ្ងៃទី៣១ ធ្នូ ការរឹតបន្តឹងការនាំចូលផលិតផលដែកថែបមានចំនួន១៣០ ឬ៧៦,៩%នៃចំនួនសរុប ។ ការកើនឡើង៩% បន្ទាប់ពីចុងឆ្នាំមុនបានចង្អុលបង្ហាញពីរបាំងដ៏ខ្ពស់ក្នុងការធ្វើពាណិជ្ជកម្មដែកថែប ។ នេះបើតាមរបាយការណ៍របស់ KOTRA បានរាយការណ៍ ។
ប្រទេសឥណ្ឌា គឺជាប្រទេសដែលកំណត់និយ័តកម្មញឹកញាប់បំផុតនៃការនាំចូលរបស់កូរ៉េខាងត្បូង ដោយមានចំនួន៣១ករណី ឬឡើងទៅដល់៥ករណី គិតពីថ្ងៃទី៣១ ខែធ្នូ ។ បន្ទាប់មកគឺសហរដ្ឋអាមេរិក (២១ករណី), ចិន (១១ករណី), ឥណ្ឌូណេស៊ី (១១ករណី), ប្រេស៊ីល (១០ករណី), ថៃ និងតួកគី (៩ករណីជាប់គ្នា) ។
ការលក់បង្ខូចថ្លៃទំនិញ (Antidumping) គឺជាបទប្បញ្ញត្តិទូទៅបំផុត ក្នុងនោះមានចំនួន១១៨ករណី ឬ៦៩,៨% ពោលគឺមានការកើនឡើង៤% គិតត្រឹមខែធ្នូ ដែលផ្តល់ជាលទ្ធផលមាន៤៤ជំហាននៃការពារពីហានិភ័យ ។
របាយការណ៍បានរំពឹងថា វិធានការគាំពារនិយមលើវិស័យពាណិជ្ជកម្មនឹងកើនឡើងនៅឆមាសទី២ឆ្នាំនេះ ។ បណ្តាប្រទេសដែលមានសេដ្ឋកិច្ចកំពុងរីកចម្រើន គឺទំនងជាអំពាវនាវឲ្យមានវិធានការការពារហានិភ័យដើម្បីការពារឧស្សាហកម្មរបស់ខ្លួន សូម្បីតែនៅពេលដែលជនបរទេសមិនបានពឹងពាក់ទៅលើការអនុវត្តពាណិជ្ជកម្មមិនស្មើភាពគ្នា មានដូចជាការលក់បង្ខូចថ្លៃទំនិញ ព្រមទាំងការបង្កើតរនាំងគ្មានពន្ធគយជាច្រើនទៀត រួមមានទាំងការអនុញ្ញាតនាំចូល និងប្រព័ន្ធវិញ្ញាបនបត្រដទៃទៀត ។
លោក Song Yu-hwang ប្រធានការិយាល័យជំនួយពាណិជ្ជកម្ម បាននិយាយថា ៖ « ក្រុមហ៊ុននាំចេញរបស់កូរ៉េត្រូវតែឃ្លាំមើលលើនិន្នាការឧស្សាហកម្មនៅបរទេស និងគោលនយោបាយរបស់រដ្ឋាភិបាលបរទេស ត្រូវតែកំណត់វិធានការតទល់ទុកជាមុនឲ្យបានច្រើន ខណៈពេលដែលពួកគេព្យាយាមចៀសវាងគុណវិបត្តិនៃលទ្ធផលបរាជ័យរបស់ពួកគេ ក្នុងការដោះស្រាយជាវិជ្ជមានតាមរយៈពាក្យបណ្តឹងលើការលក់បង្ខូចថ្លៃទំនិញ ឬការស៊ើបអង្កេតជាបន្តបន្ទាប់ ។ KOTRA នឹងជួយខ្នះខ្នែងយ៉ាងសកម្មដល់ក្រុមហ៊ុននាំចេញដែលទទួលរងនូវរលកគាំពារនិយម ដោយធ្វើពិពិធកម្ម (ធ្វើឲ្យប្លែកគ្នា) នៃទីផ្សារនាំចេញ និងការជំរុញទៅកាន់ទីផ្សារបរទេសតាមរយៈការវិនិយោគដោយផ្ទាល់ » ៕
ចែករំលែកព័តមាននេះ