អាស៊ាន ៖ មីយ៉ាន់ម៉ាបានចងសម្ព័ន្ធភាពជាមួយបណ្តាប្រទេសផលិតស្ករចំនួន៧នៅក្នុងតំបន់ ដើម្បីបង្កើនកិច្ចសហប្រតិបត្តិការ ជំរុញការធ្វើពាណិជ្ជកម្ម និងការរៀបចំសម្រាប់សហគមន៍សេដ្ឋកិច្ចអាស៊ាន ក្នុងគោលបំណងបង្កើតទីផ្សារតែមួយសម្រាប់ទុន ទំនិញ ការងារ និងសេវាកម្ម ។
ប្រទេសចំនួន៧រួមមាន កម្ពុជា ឥណ្ឌូណេស៊ី ម៉ាឡេស៊ី មីយ៉ាន់ម៉ា ហ្វ៊ីលីពីន ថៃ និងវៀតណាម បានចុះហត្ថលេខាលើកិច្ចព្រមព្រៀងនេះនៅទីក្រុងបាងកក កាលពីថ្ងៃទី១៦ កក្កដាកន្លងទៅ ។ សម្ព័ន្ធភាពនេះ នឹងចាប់ផ្តើមដំណើរការរយៈពេល២ឆ្នាំ ដែលប្រទេសថៃជាប្រធាន ។
លោក Win Htay អនុប្រធាននៃក្រុមហ៊ុនផលិតស្ករមីយ៉ាន់ម៉ា បានថ្លែងថា ៖ « ថៃបានជំរុញឱ្យប្រទេសយើងបង្កើតសម្ព័ន្ធភាពនេះ។ បើទោះជាប្រទេសកម្ពុជា និងម៉ាឡេស៊ី មិនមានសមាគមស្ករផ្ទាល់ខ្លួនក្តី ក៏មានតំណាងក្រុមហ៊ុនស្ករបានចូលរួមក្នុងពិធីចុះហត្ថលេខានេះដែរ » ។
សមាគមរបស់លោក នឹងធ្វើសេចក្តីព្រាងច្បាប់សម្រេចបន្ទាប់ពីបានកែសម្រួលក្រោមការណែនាំពីឧស្សាហកម្មនេះ ។ នៅពេលដែលកែសម្រួលហើយ សេចក្តីព្រាងច្បាប់នេះនឹងត្រូវដាក់ជូនទៅសភា តាមរយៈក្រសួងកសិកម្ម ។
វាមានគោលបំណងបង្កើតគោលនយោបាយដើម្បីគាំទ្រដល់ឧស្សាហកម្មស្ករ និងជួយរោងចក្រក្នុងការប្រកួតប្រជែងជាមួយបរទេស ។
សេចក្តីព្រាងច្បាប់នោះ ក៏បានលាយបញ្ចូលច្បាប់ស្ករអំពៅ និងស្ករសឆ្នាំ១៩៨៤ របស់ប្រទេសថៃផងដែរ រួមទាំងភាគហ៊ុនប្រាក់ចំណូលរវាងកសិករ និងរោងចក្រផលិត ការបង្កើតក្រុមប្រឹក្សាភិបាលឧស្សាហកម្មមួយនេះ និងមូលនិធិសង្គ្រោះបន្ទាន់សម្រាប់រោងចក្រផលិត និងកសិករ ដើម្បីទប់ស្កាត់បញ្ហាតម្លៃ ឬបញ្ហាគ្រោះធម្មជាតិផ្សេងៗ ៕
ចែករំលែកព័តមាននេះ